ဗိုလ်ချုပ်မွေးနေ့အထိမ်းအမှတ်

February 13, 2020

ညောင်လေးပင်တွင် ဗိုလ်ချုပ်မွေးနေ့အထိမ်းအမှတ် ပဲပြုတ်နံပြားကျွေး

ပဲခူးတိုင်းဒေသကြီး ညောင်လေးပင်မြို့မှာ ဖေဖော်ဝါရီ ၁၃ ရက်မနက်က ဗိုလ်ချုပ်အောင်ဆန်း ၁၀၅ နှစ်မြောက်မွေးနေ့အထိမ်းအမှတ်အနေနဲ့ ကျောင်းသား/ကျောင်းသူ တွေ ပရဟိတအဖွဲ့တွေ တက်ကြွလှုပ်ရှားသူတွေစုပေါင်းပြီး ပဲပြုတ်နဲ့ နံပြား ကျွေးမွေးလှူဒါန်းခဲ့ကြပါတယ်။ အမျိုးသားခေါင်းဆောင်ကြီး ဗိုလ်ချုပ်အောင်ဆန်းရဲ့ တိုင်းပြည်အတွက် စွန့်လွှတ်စွန့်စား အနစ်နာခံခဲ့တာတွေကို မျိုးဆက်သစ်လူငယ်တွေ အမြဲတမ်းအမှတ်ရစေဖို့ ဗိုလ်ချုပ်အောင်ဆန်းရဲ့ စိတ်ဓာတ်နဲ့ အကျင့်ကောင်းတွေကို အတုယူတတ်စေဖို့စတဲ့ ရည်ရွယ်ချက်နဲ့ဗိုလ်ချုပ်မွေးနေ့မှာ ဗိုလ်ချုပ်ကြိုက်နှစ်သက်တဲ့ ပဲပြုတ်နဲ့ နံပြားကို ရတာဖြစ်တယ်လို့ ဦး​ဆောင်​ပြုလုပ်သူ ဦးမျိုးမင်းက ပြောပါတယ်။ ‘ကြည်ရေ... ပဲပြုတ်နဲ့ နံပြားရရင်စားချင်တယ်’ ဆိုတဲ့စကားဟာ သိပ်ချစ်စရာကောင်းတဲ့ အသုံးအနှုန်းဖြစ်ပြီး ဗိုလ်ချုပ်တစ်ယောက်ဖြစ်ပေမယ့် အမိန့်သံမပါဘဲ ရရင်စားချင်တယ်ဆိုတဲ့ စကားသုံးသွားတာဟာ ဗိုလ်ချုပ်ရဲ့ နူးညံ့တဲ့နှလုံးသားကို မြင်မိကြမှာဖြစ်ပြီး ဗိုလ်ချုပ်ကို လေးစားချစ်ခင်တာကြောင့် ဗိုလ်ချုပ်မွေးနေ့မှာ သူသိပ်ကြိုက်တဲ့ ပဲပြုတ်နဲ့ နံပြားကို ကျွေးမွေးလှူဒါန်းရတာ”  ဗိုလ်ချုပ်​​​အောင်ဆန်းမွေး​နေ့အထိမ်းအမှတ် ဗိုလ်ချုပ်ရုပ်တုရှေ့မှာ ဗိုလ်ချုပ်ကြိုက်နှစ်သက်တဲ့ ပဲပြုတ်နဲ့ နံပြားချပ် ၂၀၀၀ ကျော်ကို ကျွေးခဲ့တာမှာ မြို့​ပေါ်ရှိ ဌာနဆိုင်ရာ​တွေ၊ အရပ်ဘက်အဖွဲ့အ စည်း​တွေ၊​ ကျောင်းသား/​ကျောင်းသူ​၊ ​ဒေသခံ​ပြည်သူ​တွေ တက်​ရောက်ခဲ့​ကြပါတယ်။ ဗိုလ်ချုပ်အောင်ဆန်းကို ၁၉၁၅ ခုနှစ် ဖေဖော်ဝါရီ ၁၃ ရက်နေ့မှာ နက်မောက်မြို့မှာ မွေးဖွားခဲ့တာဖြစ်ပြီး ၁၉၄၇ ခုနှစ် ဇူလှိုင် ၁၉ ရက်နေ့မှာ မသမာသူတွေရဲ့ လုပ်ကြံမှုကြောင့် သေဆုံးသွားခဲ့ရပြီး ဒီနေ့ ဖေဖော်ဝါရီ ၁၃ ရက်နေ့ဆိုရင် ဗိုလ်ချုပ်မွေးနေ့ဟာ ၁၀၅ ပြည့်သွားပြီ ဖြစ်ပါတယ်။ သတင်း - နေလင်းထိုက်
2 years Ago

ဗိုလ်ချုပ်မွေးနေ့အထိမ်းအမှတ် ပုသိမ်တွင် ပိုက်ကျော်ခြင်းပြိုင်ပွဲကျင်းပ

ဖေဖော်ဝါရီ ၁၃ ရက်မှာ ကျရောက်တဲ့ အမျိုးသားခေါင်းဆောင်ကြီး ဗိုလ်အောင်ချုပ်ဆန်းရဲ့ ၁ဝ၅ နှစ် ပြည့်မွေးနေ့အထိမ်းအမှတ် ဖိတ်ခေါ်ပိုက်ကျော်ခြင်းပြိုင်ပွဲကို ပုသိမ်မြို့ ကုန်သည်လမ်းရှိ ရွှေညောင်ပင်ကလပ် ပိုက်ကျော်ခြင်းအားကစားကွင်းမှာ ဖေဖော်ဝါရီ ၁၀ ရက်မှ ၁၃ ရက်နေ့အထိ ကျင်းပပါတယ်။ ပြိုင်ပွဲကို ဧရာဝတီတိုင်းအတွင်းက ပိုက်ကျော်ခြင်း အားကစားကလပ်အသင်းတွေသာမက ရန်ကုန်၊ မန္တလေး၊ ပဲခူးနဲ့ မွန်ပြည်နယ်တွေက ကလပ်အသင်းတွေပါ လာရောက်ယှဉ်ပြိုင်ခဲ့ပြီး စုစုပေါင်း အသင်း ၁၆ သင်းပါဝင် ယှဉ်ပြိုင်နေကြပါတယ်။ အသင်းတသင်းစီမှာ မြန်မာ့လက်ရွေးစင် ကစားသမား တဦးစီ  ပါဝင်ယှဉ်ပြိုင်ခွင့်ပြုထားတယ်လို့ ဧရာဝတီတိုင်းပိုက်ကျော်ခြင်း ဆပ်ကော်မတီ ဒုတိယဥက္ကဋ္ဌ ဦးရဲလွင်က ဒီဗွီဘီကိုပြောပါတယ်။ "တစ်နိုင်ငံလုံးကလာပြိုင်တဲ့ Open Challenging ဖိတ်ခေါ်ပြိုင်ပွဲပါ၊ ပြိုင်ပွဲ စည်းကမ်းချက်တွေနဲ့အညီ လာပြိုင်ကြပါတယ်၊ ဗိုလ်ချုပ်မွေးနေ့ကိုသိစေချင်တာအပြင် ဒေသတွင်း ပိုက်ကျော်ခြင်းအားကစား ဖွံ့ဖြိုးတိုးတက်လာဖို့ ရည်ရွယ်ကျင်းပတာပါ" လို့ ဦးရဲလွင်က ပြောပါတယ်။ ဗိုလ်ချုပ်အောင်ဆန်းမွေးနေ့ကို အကြောင်းပြု ကျင်းပလို့ နောက်မျိုးဆက်တွေ ဗိုလ်ချုပ်အောင်ဆန်းကိုသိရှိပြီး ဗိုလ်ချုပ်အောင်ဆန်းလိုလူမျိုး အားကစားလောကမှာလည်း ပေါ်ထွက်လာနိုင်မယ်လို့ မျှော်လင့်ကြောင်း ဧရာဝတီတိုင်း မြန်မာ့ရိုးရာခြင်းဆပ်ကော်မတီဥက္ကဋ္ဌ ပုသိမ်မြို့နယ်မဲဆန္ဒနယ်က လွှတ်တော်ကိုယ်စားလှယ် ဦးအောင်သူထွေးက ပြောပါတယ်။ ပြိုင်ပွဲနောက်ဆုံးနေ့ ဖေဖော်ဝါရီလ ၁၃ ရက် ဗိုလ်ချုပ်အောင်ဆန်းမွေးနေ့မှာ ဆီမီးဖိုင်နယ် ပွဲစဉ်တွေ၊ တတိယ နေရာလုပွဲနဲ့ ဗိုလ်လုပွဲစဉ်တွေကျင်းပမည်ဖြစ်ပြီး ပထမဆု၊ ဒုတိယဆုနဲ့ တတိဆုဖလား ချီးမြှင့်မှာဖြစ်ပါတယ်။ ဗိုလ်ချုပ်အောင်ဆန်း ၁၀၅ နှစ်ပြည့်မွေးနေ့ ဖေဖော်ဝါရီ ၁၃ ရက်နေ့မှာ ပုသိမ်မြို့ပေါ် ရပ်ကွက်တွေမှာလည်း အားကစားပြိုင်ပွဲတွေနဲ့ ကဗျာရွတ်ပြိုင်ပွဲတွေ၊ စာဖတ်ပြိုင်ပွဲတွေလည်း ပြုလုပ်နေကြပါတယ်။ မင်းထက်မုန်း (ပုသိမ်)
2 years Ago
Up