ဗလင်စီယာ

November 9, 2020

ဗလင်စီယာကို ဂိုးပြတ်ရှုံးနိမ့်ခဲ့ခြင်းအတွက် အပြည့်အဝတာဝန်ရှိကြောင်း ရီးရဲလ်နည်းပြ ပြော

ဗလင်စီယာအသင်းကို ဂိုးပြတ်ရှုံးနိမ့်ခဲ့တဲ့အတွက် သူ့မှာ တာဝန်ရှိတယ်လို့ ရီးရဲလ်နည်းပြ ဇီဒန်းက ပြောပါတယ်။  ဒီပွဲမှာ ဗလင်စီယာအသင်းက ၄ ဂိုး ၁ ဂိုးနဲ့ အနိုင်ရရှိခဲ့ပြီး ဒါဟာ ဇီဒန်းလက်ထက်မှာ ပထမဆုံးအကြိမ် ၄ ဂိုးပေးခဲ့ရတာလည်း ဖြစ်ပါတယ်။ ဗလင်စီယာအသင်းအတွက် ကားလို့စ်ဆိုလာက ပင်နယ်တီကနေ ဟက်ထရစ် သွင်းယူပေးခဲ့တာ ဖြစ်ပြီး ဒါဟာ ၂၁ ရာစုအတွင်း လာလီဂါပြိုင်ပွဲမှာ ပထမဆုံးလည်း ဖြစ်ပါတယ်။ ဒီပွဲမှာ ဘင်ဇီမာက ရီးရဲလ်အသင်းအတွက် ဦးဆောင်ဂိုးသွင်းပေးခဲ့ပေမယ့် ဆိုလာရဲ့ ပင်နယ်တီ ဟက်ထရစ်အပြင် ဗာရာနီရဲ့ ကိုယ့်ဂိုးကိုယ်သွင်းယူမှုကြောင့် ဂိုးပြတ်ခဲ့တာပါ။ ဒါဟာ ဘာစီလိုနာအသင်းကို ၅ ဂိုး ၁ ဂိုးနဲ့ ရှုံးနိမ့်ပြီးနောက်ပိုင်း ပထမဆုံးအကြိမ် ၄ ဂိုး ပေးရတာလည်း ဖြစ်ပါတယ်။ ဒီပွဲရလဒ်ကြောင့် ရီးရဲလ်အသင်းဟာ အောက်တိုဘာ‌လ နိုင်ငံတကာ ပွဲစဉ်တွေအပြီး ကစားခဲ့တဲ့ ၇ ပွဲမှာ ပေးဂိုး ၁၄ ဂိုးအထိရှိလာပြီး အသင်းအနေနဲ့ ခံစစ်ပြဿနာကို ဖြေရှင်းရတော့မယ်လို့ ဇီဒန်းက ဝန်ခံပါတယ်။ အသင်းရလဒ်အတွက် အပြစ်တင်မှုတွေကိုလည်း လက်ခံတယ်လို့ သူက ပြောပါတယ်။ “ပင်နယ်တီ ၃ လုံးနဲ့ own goal ၁ ဂိုးပေးရတာ တာ်တော်များပါတယ်။ ကျနော်ဟာ နည်းပြဖြစ်တဲ့အတွက် ဒါဟာ ကျနော့်အမှားပါ။ ဒီအတွက် အဖြေကို ရှာဖွေရပါမယ်။ ဘာတွေ ဖြစ်ခဲ့သလိုဆိုတာ ပြောဖို့ ခက်နေပါတယ်။ ဆိုးရွားတဲ့ နေ့တစ်နေ့ပါ။ ဘာစောကဒမှ မရှိပါဘူး။ ခံစစ်ကို အခုထက် ပိုတိုးတက်အောင် လုပ်ရပါမယ်။ ကျနော်တို့ထက် ဗလင်စီယာအသင်းဘက်က နည်းဗျူဟာပိုင်း ပိုကောင်းခဲ့တယ်လို့ မထင်ပါဘူး။ ကျနော်တို့ ပွဲကိုကောင်းကောင်းစတင်နိုင်ခဲ့ပြီး ဂိုးရရှိပြီးနောက်မှာ အားလုံးပြောင်းလဲသွားခဲ့ပါတယ်။ ဒါဟာ နားလည်ရခက်ပါတယ်။ ဒါပေမဲ့ တာဝန်အရှိဆုံးကတော့ ကျနော်ပါပဲ။”  ဗာရာနီရဲ့ ကိုယ့်ဂိုး ကိုယ်သွင်းယူမှုဟာ ပြိုင်ပွဲစုံ ၅ ပွဲအတွင်း ဒုတိယအကြိမ်မြောက်ဖြစ်ပြီး ကွင်းလယ်ဖန်တီးရှင် အစ္စကိုဟာလည်း ဒီပွဲမှာ ခြေစွမ်းပြဖို့ ရုန်းကန်ခဲ့ရပါတယ်။  ဒီပွဲမှာ အစ္စကိုဟာ အောက်တိုဘာ ၁၇ ရက်နေက်ပိုင်း ပထမဆုံးအဖြစ် ရီးရဲလ်အသင်းမှာ ပါဝင်ခဲ့ပြီး လူစားလဲမခံရခင် ၈၃ မိနစ်အတွင်း ကန်သွင်းမှု တကြိမ်နဲ့ ဖန်တီးမှု တကြိမ်သာ ရှိခဲ့ပါတယ်။  ဒီပွဲမှာ ရီးရဲလ်အသင်းအတွက် အားထားရတဲ့ ကွင်းလယ်လူ ကတ်စမဲရိုးနဲ့ တိုက်စစ်မှူး ဟာဇတ်တို့ဟာ ကိုနာဗိုင်းရပ်စ် ကူးစက်ခံရမှုကြောင့် ပါဝင်နိုင်ခဲ့ခြင်းမရှိဘဲ ဇီဒန်းကတော့ အစ္စကိုဟာ ပွဲပန်းနေတာကြောင့်လို့ ကာကွယ်ပြောဆိုပါတယ်။
11 months Ago

November 4, 2020

ဗလင်စီယာ ကွင်းလယ်ကစားသမား ကွန်ဒေါ့ဘီယာကို အက်သလက်တီကိုအသင်း ခေါ်ယူ

အက်သလက်တီကိုမက်ဒရစ်အသင်းဟာ ဗလင်စီယာ ကွင်းလယ်ကစားသမား ဂေါ့ဖရန်ကွန်ဒေါ့ဘီယာကို ယူရို ၁၀ သန်းနဲ့ အင်္ဂါနေ့မနက်ပိုင်းမှာ ခေါ်ယူနိုင်ခဲ့ပါတယ်။  ကွန်ဒေါ့ဘီယာကို အသင်းကနေ ထွက်ခွာသွားတဲ့ သောမတ်စ်ပါတေး နေရာကို အစားထိုးဖို့ ခေါ်ယူခဲ့တာလည်း ဖြစ်ပါတယ်။ ကစားသမားဟာ ဗလင်စီယာအသင်းကနေ ထွက်ခွာဖို့ သဘောတူညီချက်ရရှိခဲ့ပြီးနောက် အက်သလက်တီကိုအသင်းနဲ့ ၂၀၂၄ ခုနှစ်အထိ စာချုပ်ချုပ်ဆိုခဲ့တာပါ။ အက်သလက်တီကိုအသင်းဟာ သူတို့ရဲ့ကွင်းလယ်လူ သောမတ်စ်ပါတေးကို အပြောင်းအရွှေ့ နောက်ဆုံးရက်မှာမှ ယူရိုသန်း ၅၀ နဲ့ ထွက်ခွာခွင့်ပေးလိုက်ရတာကြောင့် ကစားသမားသစ်တစ်ဦး ခေါ်ယူဖို့ အထူးခွင့်ပြုချက်ရရှိခဲ့တာ ဖြစ်ပါတယ်။ ကွန်ဒေါ့ဘီယာကို ခေါ်ယူနိုင်ခဲ့တဲ့အပေါ် အသင်းရဲ့ဝက်ဘ်ဆိုဒ်မှာလည်း အတည်ပြု ထုတ်ပြန်ထားပါတယ်။ အက်သလက်တီကိုအသင်းဟာ ဘယ်အသင်းမဆို သူတို့ရဲ့ကစားသမားတစ်ဦးကို စာချုပ် ဖျက်သိမ်းကြေးနဲ့ ပြောင်းရွှေ့ခွင့်ပေးလိုက်ရရင် ဒီကစားသမား နေရာကို အစားထိုးဖို့အတွက် စပိန်နိုင်ငံတွင်းမှာ ဘယ်ကစားသမားကိုမဆို သီတင်းပတ် ၄ ခုအတွင်း ခေါ်ယူခွင့်ရှိတယ်ဆိုတဲ့ လာလီဂါ စည်းမျဉ်းကြောင့် အခုလိုမျိုး ကွန်ဒေါ့ဘီယာကို ခေါ်ယူနိုင်ခဲ့တာ ဖြစ်ပါတယ်။ ကွန်ဒေါ့ဘီယာဟာ ပြီးခဲ့တဲ့နွေရာသီ အပြောင်းအရွှေ့ဈေးကွက်မှာကတည်းက ဗလင်စီယာအသင်းကနေ ထွက်ခွာဖို့ သတင်းကြီးနေခဲ့သူ ဖြစ်ပါတယ်။  ဗလင်စီယာအသင်းဟာ အသင်းရဲ့အခြေအနေကို ထိန်းသိမ်းဖို့အတွက် အသင်းကြီး ကစားသမားတွေကို ရောင်းချဖို့ ကြိုးပမ်းခဲ့ပြီး ကွန်ဒေါ့ဘီယာကို စပါးအသင်း အပါအဝင် အသင်းတော်တော်များများက လိုချင်ခဲ့ပါတယ်။ အခုချိန်မှာတော့ ဗဟိုအာဖရိက လက်ရွေးစင်ကစားသမားဟာ ပါရီဂျို၊ ဖာဟန်တောရက်စ်၊ ရိုဒရီဂို တို့လို အသင်းကနေ ထွက်ခွာခဲ့ပြီဖြစ်ပြီး ဗလင်စီယာအသင်းမှာ ၃ နှစ်ကြာ ကစားခဲ့ပါတယ်။ ကွန်ဒေါ့ဘီယာဟာ ဗလင်စီယာအသင်းကို ၂၀၁၇ ခုနှစ်မှာ အင်တာမီလန်အသင်းကနေ အငှားနဲ့ ပြောင်းရွှေ့လာခဲ့သူဖြစ်ပြီး နောက်ပိုင်းမှာ အမြဲတမ်းစာချုပ် ချုပ်ဆိုခဲ့ပါတယ်။  သူဟာ ဗလင်စီယာအသင်းအတွက် ၁၀၄ ပွဲ ကစားပေးခဲ့သူဖြစ်ပြီး အသင်းဥက္ကဋ္ဌ မာသီဟာ ဗလင်စီယာအသင်းကို ဖျက်ဆီးနေတယ်လို့လည်း အခုလအစောပိုင်းမှာ ဝေဖန်ခဲ့ပါတယ်။
12 months Ago
More News
Up