ဗန်းမော်

January 13, 2023

ဗန်းမော်တွင် ဘိလပ်မြေသယ်ကားတိမ်းမှောက်ပြီး ၂ ဦးသေဆုံး၊ ၃ ဦးဒဏ်ရာရ

ကချင်ပြည်နယ်၊ ဗန်းမော်မြို့နယ်မှာ ဇန်နဝါရီ ၁၂ ရက် နေ့လယ်ပိုင်းက ဘိလပ်မြေသယ် မော်တော်ယာဉ်တစီး တိမ်းမှောက်ပြီး အမျိုးသမီးနှစ်ဦး သေဆုံးကာ သုံးဦး ထိခိုက်ဒဏ်ရာ ရခဲ့တယ်လို့ သိရပါတယ်။

ဘိလပ်မြေတင်ဆောင်လာတဲ့ တုန်ဖုန်း (ဒေသအခေါ်) မော်တော်ယာဉ်ဟာ  ၃ မိုင် မြို့ရှောင်ပတ်လမ်းမှာ တိမ်းမှောက်ခဲ့ပြီး အသက် ၅၀ ခန့်နဲ့ အသက် ၂၀ ခန့် အမျိုးသမီးနှစ်ဦး သေဆုံးကာ အမျိုးသားနှစ်ဦးနဲ့ အမျိုးသမီးတဦး ထိခိုက်ဒဏ်ရာ ပြင်းထန်တဲ့အတွက် ဗန်းမော်ပြည်သူ့ဆေးရုံမှာ ဆေးကုသပေးထားတယ်လို့ ကူညီဆောင်ရွက်ပေးခဲ့တဲ့ ဒေသခံတွေဆီက သိရပါတယ်။

ပရဟိတ ဆောင်ရွက်ပေးသူတဦးက “ဗန်းမော်ကနေ ဘိလပ်မြေတင်လာတဲ့ တုန်ဖုန်းကား ၃ မိုင်မြို့ရှောင်ပတ်လမ်းမှာ အရှိန်မထိန်းနိုင်ဘဲ မှောက်တာ။ ကားဒရိုက်ဘာကတော့ ဘာမှမဖြစ်ဘူး။ ဘိလပ်မြေအိတ်တွေပိပြီး အမျိုးသမီးနှစ်ဦး သေသွားတယ်။ သုံးဦးကတော့ ဒဏ်ရာရတယ်။ ဒဏ်ရာတွေကတော့ စိုးရိမ်ရတဲ့ အနေအထားရှိတယ်” လို့ ပြောပါတယ်။

ဒီဇင်ဘာ ၉ ရက်ကလည်း ဗန်းမော်မြို့၊ မင်းလှရပ်ကွက်၊ အမှတ် ၄ အထကကျောင်း အနီးမှာ ဆွမ်းခံကြွလာတဲ့ ဦးပဉ္ဇင်းတပါးကို မော်တော်ယာဉ်တစီးက အရှိန်မထိန်းနိုင်ဘဲ ဝင်ရောက်တိုက်မိခဲ့လို့ ဦးပဉ္ဇင်းပျံလွန်တော်မူခဲ့ပါသေးတယ်။

4 weeks Ago

December 31, 2022

ဗန်းမော်မြို့နယ်တွင် စစ်ကောင်စီတပ်က လေယာဥ်ဖြင့် ဗုံးကြဲ၊ ရွာသား ၁ ဦး သေဆုံး

ကချင်ပြည်နယ်၊ ဗန်းမော်မြို့နယ်၊ ဧရာ၀တီမြစ်ကြောင်း တလျှောက်ရှိ အနောက်ဖက်ကမ်းဒေသ ကျေးရွာတွေကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခဲ့တာကြောင့် မြစေတီရွာသား တယောက် သေဆုံးခဲ့တယ်လို့ ဒေသခံတွေက ပြောပါတယ်။

ရေလဲ၊ ကောင်းစင့်၊ ပါပေါင်း၊ မြစေတီကျေးရွာ၊ ငှက်ပျောတောနဲ့ အထက်သဖန်းပင်ရွာတွေ ဘက်ကို ဒီဇင်ဘာ ၂၉ ရက်နဲ့ ၃၀ ရက် မနက်ပိုင်းတွေက စစ်ကြောင်း ထိုးလာသလို မြစေတီ၊ ပါပေါင်းစတဲ့ ဧရာ၀တီမြစ်ကြောင်း တလျှောက် ရဟတ်ယာဉ် တစီး၊ တိုက်လေယာဥ် နှစ်စီးနဲ့ ဗုံးကြဲ တိုက်ခိုက်ခဲ့တာပါ။

ဒီဇင်ဘာ ၃၀ ရက် မနက် ၉ နာရီဝန်းကျင်လောက်မှာ ရေလဲရွာ၊ ကိုဦးဆိပ်၊ ရွာလည်ဆိပ်၊ မိကုန်းစွယ်နဲ့ ကောင်းစင့်ရွာဘုရားဆိပ်တွေမှာ ဆိုက်ကပ်ထားတဲ့ ရွှေစက်လှေ  သုံးစီးနဲ့ ​ကျောက်တင်ထားတဲ့ တန်ခွန်မော်တော် တစီးကိုလည်း မီးရှို့ဖျက်ဆီးသွားခဲ့တယ်လို့လည်း ကျေးရွာဒေသခံ တဦးက ပြောပါတယ်။

စစ်ကောင်စီတပ်ဖွဲ့၀င်တွေဟာ မီးရှို့ဖျက်ဆီးခဲ့ပြီးနောက် ပါပေါင်းရွာဘက်ကို စစ်ကြောင်း  နှစ်ကြောင်း ခွဲသွားခဲ့ကာ မနက် ၁၁ နာရီ လောက်မှာ လေကြောင်းကနေ တိုက်ခိုက်ခဲ့တာလို့ ဆိုပါတယ်။

လက်ရှိ ပါပေါင်းရွာမှာ စစ်ကောင်စီ၀င်တွေ အင်အားအလုံးအရင်းနဲ့ တပ်ထိုင်ထားကာ လေယာဥ်ပျံတွေ ညအချိန်ထိ ၀ဲနေတာကြောင့် ကျေးရွာဒေသခံတွေနဲ့ ရွှေလုပ်ငန်း လုပ်ကိုင်နေသူတွေဟာ ဗန်းမော်မြို့ပေါ်နဲ့ ဘေးလွတ်ရာနေရာတွေ၊ ဘုန်းကြီးကျောင်းတွေနဲ့  စစ်ရှောင်စခန်းတွေမှာ  စစ်ရှောင်နေကြရပါတယ်။

1 month Ago
More News
Up