ဖွဲ့စည်း

September 14, 2021

သမဂ္ဂ ၁၇ ဖွဲ့ပါဝင်သည့် ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့ စတင်ဖွဲ့စည်း

သမဂ္ဂ ၁၇ ဖွဲ့ပါဝင်တဲ့ ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့ စတင်ဖွဲ့စည်းလိုက်ကြောင်း စက်တင်ဘာ ၁၃ ရက်စွဲနဲ့ ထုတ်ပြန်ထားပါတယ်။

ဆေးနှင့် ​ဆေးနှီးနွှယ် ​ကျောင်းသားသမဂ္ဂများအဖွဲ့အနေနဲ့ နွေဦးတော်လှန်ရေးမှ အစပြုကာ အာဏာရှင်ဆန့်ကျင်ရေး လူထုတော်လှန်ရေးမှာ ပြည်သူတွေနဲ့အတူ တပ်ဦးကနေ အစဉ်အမြဲပါဝင်သွားဖို့၊ အနာဂတ်ဖက်ဒရယ်ဒီမိုကရေစီနိုင်ငံတော်သစ်ရဲ့ ပညာရေး၊ ကျန်းမာရေးကဏ္ဍတွေမှာ နိုင်ငံတကာနဲ့ ရင်ဘောင်တန်းနိုင်တဲ့အထိ တိုးတက်မြင့်မားနိုင် ရေးအတွက် ကူညီပါဝင်ဆောင်ရွက်နိုင်ဖို့ ရည်ရွယ်တယ်လို့ ဆိုပါတယ်။

ခုလိုဖွဲ့စည်းမှုမှာတော့ ဆေးတက္ကသိုလ် ၅ ခု၊ သွားဘက်ဆိုင်ရာဆေးတက္ကသိုလ် ၂ ခု၊ ဆေးဘက်ဆိုင်ရာနည်းပညာတက္ကသိုလ် ၂ ခု၊ ဆေးဝါးတက္ကသိုလ် ၂ ခု၊ တိုင်းရင်းဆေး တက္ကသိုလ်၊ မွေးမြူရေးဆိုင်ရာ ဆေးတက္ကသိုလ်၊ အခြေခံကျန်းမာရေးတက္ကသိုလ်၊ သူနာ ပြုတက္ကသိုလ် ၂ ခုတို့က ကျောင်းသားသမဂ္ဂတွေ၊ မြန်မာနိုင်ငံသူနာပြု-သားဖွား သင်တန်းကျောင်းများ ကျောင်းသား သမဂ္ဂအဖွဲ့ချုပ်၊ စုစုပေါင်း ၁၇ ဖွဲ့ပူးပေါင်းဖွဲ့စည်းလိုက်တာ ဖြစ်ပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေး ကာလဟာ ၇ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာ ကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ် ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ် မှုကြောင့် အပြစ်မဲ့ကျဆုံးပြည်သူ ၁၀၈၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၈,၀၀၀ ကျော် ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

1 month Ago

August 31, 2021

ရတနာပုံမြို့ပြတော်လှန်ရေးတပ်ဖွဲ့ ဖွဲ့စည်းကြောင်း ကြေညာ

ပြည်သူတွေရဲ့ အသက်အိုးအိမ်စည်းစိမ်တွေကို ကာကွယ်ဖို့ ရတနာပုံမြို့ပြတော်လှန်ရေးတပ်ဖွဲ့ (YURF) ဖွဲ့စည်းပြီးကြောင်း ဒီနေ့ အသိပေးကြေညာလိုက်ပါတယ်။

ရတနာပုံမြို့ပြတော်လှန်ရေးတပ်ဖွဲ့ (YURF) ကို မတ်လ ၂၆ရက်မှာ စတင်ဖွဲ့စည်းခဲ့ပြီး စစ်အာဏာရှင်ဆန့်ကျင်တော်လှန်ရေးလုပ်ငန်းတွေကို ဆောင်ရွက်ခဲ့တာဖြစ်ပြီး အခုထက် ပိုမိုအင်အားကောင်းစွာ လုပ်ဆောင်နိုင်ဖို့ ဩဂုတ်လ ၃၀ ရက်စွဲနဲ့ ပြည်သူလူထုကို တရားဝင်ထုတ်ပြန်ကြေညာလိုက်တာလို့ ပြည်သူ့ဆက်ဆံရေးဌာနက ထုတ်ပြန်ပါတယ်။

YURF ရဲ့ ခေါင်းဆောင်တစ်ဦးက "YURF ဟာ မန္တလေးအခြေစိုက် မြေအောက် အဖွဲ့အစည်းအဖြစ်နဲ့ NUG နဲ့ တခြားလက်နက်ကိုင်တပ်ဖွဲ့တွေ ပေါ်မလာခင်ကတည်းက ဖွဲ့စည်းခဲ့ပြီး လက်နက်ကိုင်လုပ်ငန်းတွေကို လုပ်ကိုင်ခဲ့တာဖြစ်တယ်။ အဲ့ဒီတုန်းက လုပ်ငန်းစဥ်တွေကို ထုတ်မပြခဲ့ပေမဲ့ လက်ရှိမှာတော့ ပြည်သူလူထုနဲ့ ထိတွေ့နိုင်ဖို့ အခုလို အတိအလင်းကြေညာလိုက်တာပါ'' လို့ ပြောပါတယ်။

YURF မှာ လူတန်းစားအ လွှာပေါင်းစုံက နိုင်ရေးတက်ကြွတဲ့ လူငယ်လူလတ်လူကြီးတွေ ဘာသာ လူမျိုးမတူသူတွေနဲ့ စုစည်းဖွဲ့စည်းခဲ့တာပါ။

လက်ရှိမှာ YURF ဟာ ဒလန်နဲ့ စစ်ကောင်စီလက်ပါးစေတွေကို သုတ်သင်ရှင်းလင်းတာ၊ အင်အားနည်း ကင်းစခန်းတွေကို တိုက်ခိုက်တာတွေ ပြုလုပ်နေတာလို သိရပါတယ်။

နိုင်ငံရေးမျှော်မှန်းချက်များအဖြစ် "ပြည်တွင်းစစ်အပြီးတိုင် ချုပ်ငြိမ်းပြီး လူမျိုးစုတွေအားလုံးပါဝင်တဲ့ ဖက်ဒရယ်ဒီမိုကရေစီ ပြည်ထောင်စုကို ထူထောင်ဖို့၊ ပြည်သူတွေက ရွေးချယ်တင်မြှောက်ထားတဲ့ အရပ်သားအစိုးရ အဖွဲ့ရဲ့ ဖက်ဒရယ်ဒီမိုကရေစီ တည်ဆောက်ရေး လုပ်ငန်းစဥ်တွေမှာ ပါဝင်ဖို့၊ လူမျိုးစုတွေနဲ့ ပြည်သူတွေရဲ့ ဘိုးဘွားပိုင်နယ်မြေ  အသက်အိုးအိမ်စည်းစိမ်တွေကို ကာကွယ်စောင့်ရှောက်ဖို့'' စတာတွေ ဆောင်ရွက်သွားမယ်လို့ ထုတ်ပြန်ထားပါတယ်။

နိုင်ငံရေးအရ ဖက်ဒရယ်မူကိုအခြေခံတဲ့ နိုင်ငံရေးလမ်းစဥ်ကို သွားမယ်လို့ ကြေညာထားပြီး လက်ရှိမှာ NUG နဲ့ မဟာမိတ်အရ ချိတ်ဆက်နိုင်ဖို့ ကြိုးစားနေတယ်လို့ သိရပါတယ်။

"NUG နဲ့ မဟာမိတ်အနေနဲ့သွားမယ်၊ နောက်ပိုင်းကျရင် NUG အောက်က တပ်တစ်တပ်အနေနဲ့ ဆောင်ရွက်သွားဖို့ကိုတော့  ညီလာခံမှာ  ဆုံးဖြတ်မယ်'' လို့ ပြောပါတယ်။

ရဲဘော်တွေရဲ့ လက်နက်တပ်ဆင်ရေးနဲ့ ဘတ်ဂျက်ပိုင်းမှာ အခက်အခဲတွေ ရှိနေတယ်လို့လည်း သိရပါတယ်။ 

YURF နဲ့ ပတ်သက်ပြီး အခုမှ ပြည်သူလူထုကို ချပြတာဖြစ်လို့ သူတို့ရဲ့ တော်လှန်ရေးလုပ်ငန်းစဥ်တွေကို ပြည်သူတွေ စောင့်ကြည့်ပြီး တတ်နိုင်သမျှ ဝိုင်းဝန်းကူညီပေးကြဖို့ YURF ခေါင်းဆောင်က ပြောပါတယ်။

2 months Ago
More News
Up