ဖွဲ့စည်းပုံ

April 27, 2019

ဖွဲ့စည်းပုံပြင်ဆင်ရေး လူထုဟောပြောပွဲ ကနီတွင် ပြုလုပ်

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးနဲ့ပတ်သက်ပြီး မြို့နယ်လုံးဆိုင်ရာ လူထုဟောပြောပွဲ၊ မြို့တွင်းလှည့်လည်ချီတက်လမ်းလျှောက်လှုပ်ရှားမှုကို ဧပြီ ၂၇ ရက် မနက်ပိုင်းက စစ်ကိုင်းတိုင်း၊ ကနီမြို့မှာ ပြုလုပ်ခဲ့ပါတယ်။ ဒီပွဲကို ကနီမြို့နယ်အတွင်းက စိတ်ပါဝင်စားတဲ့ ပြည်သူတွေ၊ အမျိုးသား ဒီမိုကရေစီအဖွဲ့ချုပ်ပါတီဝင်တွေ၊ လွှတ်တော်ကိုယ်စားလှယ်တွေ စုစုပေါင်း ၁၅၀၀ ကျော် တက်ရောက်ခဲ့ကြပြီး စာရေးဆရာ ထင်လင်းဦး၊ စာရေးဆရာ မာန် (တောင်လုံးပြန်)တို့က လာရောက်ဟောပြောခဲ့တာဖြစ်ပါတယ်။ ကနီမြို့မှာ ပြုလုပ်တဲ့ ၂၀၀၈ ဖွဲ့စည်းပုံ ပြင်ဆင်ရေး လူထုချီတက်လမ်းလျှောက်ပွဲ၊ ဟောပြောပွဲမှာ ၂၀၀၈ ဖွဲ့စည်းပုံ အခြေခံဥပဒေပြင်ဆင်ရေး၊ ဒီမိုကရေစီစံနှုန်းနဲ့မညီတဲ့ ဥပဒေပုဒ်မ ပြင်ဆင်ရေး၊ ၂၁ ရာစုပင်လုံ ညီလာခံ အောင်ရမည် စတဲ့ ဗွီနိုင်း ဆိုင်းဘုတ်တွေကိုလည်း ကိုင်ဆောင်ကာ ချီတက်ရာလမ်းတလျှောက် ကြွေးကြော်ခဲ့ကြပါသေးတယ်။ ပြီးခဲ့တဲ့ ၂၀၁၈ နှစ်ကုန်ပိုင်းက NLD ပါတီဝင်တဦးကနေ ၂၀၀၈ ဖွဲ့စည်းပုံပြင်ဆင်ရေး ပူပေါင်းကော်မတီဖွဲ့စည်းဖို့ လွှတ်တော်မှာ အရေးကြီးအဆို တင်သွင်းပြီး နောက်ပိုင်း နိုင်ငံအနှံ့မှာ ဖွဲ့စည်းပုံပြင်ဆင်ရေး လူထုလှုပ်ရှားမှုတွေ ပေါ်ပေါက်နေတာလည်း ဖြစ်ပါတယ်။ စစ်ကိုင်းတိုင်းမှာ မြို့နယ် ၃၀ ကျော်ရှိရာ ၂၀ ကျော်မှာ  ဖွဲ့စည်းပုံပြင်ဆင်ရေး လူထုဟောပြောပွဲတွေ၊ ဆန္ဒဖော်ထုတ်ပွဲတွေ ပြုလုပ်ထားပြီးဖြစ်ပါတယ်။
2 years Ago

April 20, 2019

ဖွဲ့စည်းပုံအခြေခံဥပဒေ ပြင်ဆင်ရေး ထောက်ခံဆန္ဒပြပွဲ လက်ပံတန်းတွင် ပြုလုပ်

ပဲခူးတိုင်းဒေသကြီး လက်ပံတန်းမြို့မှာ ဒီနေ့မနက်ပိုင်းက ၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ထောက်ခံဆန္ဒပြပွဲကို လူအင်အား ၁၅၀၀ ကျော်နဲ့ ပြုလုပ်ခဲ့ပါတယ်။ ဒီဆန္ဒဖော်ထုတ်ပွဲနဲ့ ဟောပြောပွဲကို လက်ပံတန်းမြို့ ၁ လမ်းအဝိုင်းမှ ပြည်သူ့ပန်းခြံရှေ့ထိ “၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး တို့အရေး” “၂၀၀၈ အခြေခံဥပဒေပြင်ဆင်ရေး ပူးပေါင်းကော်မတီအား ထောက်ခံပါသည်” ဆိုတဲ့ ကြွေးကြော်သံတွေနဲ့ စီတန်းလှည့်လည်လမ်းလျှောက်ခဲ့ကြပါတယ်။ ဟောပြောပွဲမှာ ဆရာထင်လင်းဦးက "၂၀၀၈ ဖွဲ့စည်းပုံအခြေခံဥပဒေက ရေးခဲ့တဲ့လူတွေက ရည်ရွယ်ချက်ရှိရှိ ပြည်သူကို လိမ်ဖို့ လုပ်ခဲ့တာ။ တနည်းအားဖြင့် ပြောမယ်ဆိုရင် စစ်အာဏာရှင်စနစ် အဲ့ဒီကနေပြီး ဒီမိုကရေစီကို အပြောင်းအလဲကာလမှာ ပြည်သူတွေဘက်ကနေ အပြည့်အဝ ပြည်သူ့အာဏာကို မလွှဲအပ်ဘဲ အစိတ်အပိုင်းတခုကို ထိန်းချုပ်ထားတာ၊ ပြီးတော့ ငြိမ်းချမ်းရေးကိစ္စတွေ တရားဥပဒေစိုးမိုးရေးကိစ္စတွေအားလုံးမှာ နောင် ပြည်သူက ရွေးကောက်တင်မြှောက်တဲ့အစိုးရမှာ လုပ်ပိုင်ခွင့် ပြည့်ပြည့်ဝဝမရအောင် ဒီ ၂၀၀၈ အခြေခံဥပဒေနဲ့ ရည်ရွယ်ချက်ရှိရှိ လုပ်ခဲ့တယ်ဆိုတာကို ပြည်သူတွေ သိစေချင်ပါတယ်" လို့ ပြောကြားခဲ့ပါတယ်။ ဦးဆောင်သူ ဦးဇော်ထက်နိုင်က "၂၀၀၈ ဖွဲ့စည်းပုံအခြေခံဥပဒေက ပြည်သူနဲ့ တပ်မတော်နဲ့ကို သွေးခွဲထားသလိုဖြစ်နေတယ်။ ပြည်သူအားလုံးက ချစ်တဲ့မြန်မာ့တပ်မတော်ကြီးဖြစ်သွားဖို့အတွက် ကျနော်တို့က ဒါကို ပြင်ဆင်ချင်တာပါ။ တပ်မတော်ကို ပြည်သူက ဒီ့ထက်ပိုပြီး လေးစားချစ်ခင်ဖို့နဲ့ လွှတ်တော်ထဲမှာ ဒီ ၂၀၀၈ ဖွဲ့စည်းပုံအခြေခံဥပဒေကို ပြင်ဆင်ဖို့အတွက် ပူးပေါင်းကော်မတီဖွဲ့ပြီး လုပ်တာကို ပြည်သူက ထောက်ခံပါတယ်ဆိုတာ ပြဖို့ ဒီနေ့ပွဲကို လုပ်တာပါ " လို့ ပြောပါတယ်။ ၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ထောက်ခံဆန္ဒဖော်ထုတ်ပွဲနဲ့ဟောပြောပွဲကို မနက် ၁၀ နာရီလောက်မှာ ပြီးစီးခဲ့ပြီး ၂၀၀၈ ဖွဲ့စည်းပုံအခြေခံဥပဒေ ပြင်ဆင်ဖို့ထောက်ခံကြောင်း လက်မှတ်၂၀၀၀ နီးပါး ရရှိခဲ့တယ်လို့ သိရပါတယ်။ သတင်း/ဓာတ်ပုံ ဝဏ္ဏထွန်း
2 years Ago
More News
Up