မန္တလေးမြို့၊ ချမ်းအေးသာစံမြို့နယ်မှာ ဩဂုတ် ၂၈ ရက် ညနေပိုင်းက စစ်အာဏာရှင်စနစ်ပြုတ်ကျရေး ချီတက်ဆန္ဒပြတဲ့ မန္တလေးသပိတ်အင်အားစု စစ်ကြောင်း စစ်ကောင်စီတပ်သားတွေရဲ့ အကြမ်းဖက်ဖြိုခွင်း ခံလိုက်ရပါတယ်။
မန္တလေးသပိတ်အင်အားစု စစ်ကြောင်းစတင် ချီတက်မယ့်အချိန်မှာပဲ စစ်ကောင်စီတပ်သားတွေ အိမ်စီးကားနဲ့ ရောက်လာပြီး ပစ်ခတ်ဖြိုခွင်းတာလို့ သိရပါတယ်။
“ကျနော်တို့ စချီတက်တဲ့အချိန် ကြွေးကြော်သံတိုင်တော့ အိမ်စီးကားနဲ့ ရောက်လာပြီး သေနတ်နဲ့ ပစ်ခတ်ဖြိုခွင်းတာပဲ။ တစ်ဦး ဒဏ်ရာရပြီး တစ်ဦး ဖမ်းခံရတယ်လို့ သိရတယ်။”လို့ သပိတ်မှာ ပါဝင်သူ တစ်ဦးက ပြောပါတယ်။
ဖမ်းဆီးခံရသူမှာ အမျိုးသမီး ၁ ဦးဖြစ်ပြီး ခြေထောက်ကျည်ထိမှန်သူဟာလည်း အမျိုးသမီးဖြစ်တယ်လို့ ကနဦး သိရပါတယ်။
Photo - ( ဩဂုတ်လ ၂၅ ရက်နေ့က ချီတက်ဆန္ဒပြခဲ့တဲ့ မန္တလေး သပိတ်အင်အားစု)
စစ်ကိုင်းတိုင်း ကလေးမြို့ ဗိုလ်ချုပ်လမ်းမကြီးပေါ်မှာ ဒီနေ့မနက်က စစ်အာဏာရှင်ဆန့်ကျင်ရေး ချီတက်ဆန္ဒပြနေတဲ့ သပိတ်စစ်ကြောင်း ဖြိုခွင်းခံရပြီး ၁၀ ယောက်လောက် ရိုက်နှက်ဖမ်းဆီးခံရတယ်လို့ သိရပါတယ်။
စစ်ကြောင်းချီတက်နေတဲ့အချိန်မှာ အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေ အိမ်စီးကားတွေနဲ့ရောက်လာပြီး သေနတ်ပစ်ဖောက် ဖြိုခွင်းခဲ့တာလို့ ဆန္ဒပြရာမှာ ပါဝင်သူတဦးက ပြောပါတယ်။
“အခုမနက် ကျနော်တို့ ဆန္ဒပြနေချိန်စ စစ်ကောင်စီတပ်တွေရောက်လာပြီး သပိတ်စစ်ကြောင်းဖြိုခွင်းခံရတယ်၊ ဖမ်းဆီးခံရတာတွေလည်း ရှိတယ်။” လို့ စစ်ကြောင်းမှာ ပါဝင်သူတစ်ဦးက ပြောပါတယ်။
သပိတ်စစ်ကြောင်း ဖြိုခွင်းခံရပြီး စစ်ကြောင်းမှာပါဝင်သူ ၁၀ ယောက်လောက်ကို ရိုက်နှက်ဖမ်းဆီးတဲ့အပြင် ဆိုင်ကယ် ၃ စီးကိုလည်း စစ်ကောင်စီတပ်သားတွေ ယူသွားတယ်လို့ သိရပါတယ်။
ကလေးမြို့မှာ စစ်အာဏာရှင်ဆန့်ကျင်ရေးအတွက် နေ့စဉ် ချီတက်ဆန္ဒပြနေပြီး ဒီကနေ့ ဩဂုတ်လ ၂၆ ရက်နေ့မှာ ရက်ပေါင်း ၂၀၀ ပြည့်တာဖြစ်ပါတယ်။
