ဖျက်သိမ်း

April 27, 2019

လွဲမှားစွာ ပုံစံ ၇ ထုတ်ပေးမှု ဖျက်သိမ်းပေးရန် ကံမတောင်သူများ ဆန္ဒပြ

မကွေးတိုင်းဒေသကြီး ကံမမြို့မှာ လယ်ယာမြေဥပဒေစိုးမိုးရးနဲ့ လွဲမှားစွာ ပုံစံ ၇ ထုတ်ပေးမှု ဖျက်သိမ်းပေးရေးအတွက် ကရင်စုကျေးရွာက တောင်သူ ၂၀၀ ကျော်ဟာ ဧပြီ ၂၆ ရက်နေ့က ခွင့်ပြုချက်နဲ့ ငြိမ်းချမ်းစွာ စီတန်းလှည့်လည် ဆန္ဒထုတ်ဖော်ခဲ့ပါတယ်။ လယ်ယာမြေဥပဒေစိုးမိုးရေး၊ ဥပဒေမဲ့ရယူထားတဲ့ ပုံစံ ၇ များ ဖျက်သိမ်းပေးရေး၊ မြေနုကျွန်းလုပ်ကိုင်ခွင့်များ အမြန်ဆုံးချထားပေးရေးအတွက် ဗီနိုင်းဆိုင်းဘုတ်တွေကိုင်ပြီး ကြွေးကြော်သံတွေနဲ့ ကံမမြို့ပေါ်မှာ လမ်းလျှောက် ဆန္ဒထုတ်ဖော်ခဲ့တာပါ။ “၂၀၁၆ခုနှစ် ၁၀ လပိုင်းကတည်းက ပုံစံ ၇ အလွဲအမှားတွေဖြစ်ခဲ့တာကို ဒီနေ့ထိ ပယ်ဖျက်ပြင်ဆင်တာတွေ လုပ်မပေးလို့ ဥပဒေမဲ့ ပုံစံ ၇ ရရှိထားတဲ့သူတွေက တရားစွဲတာတွေ တောင်သူတွေ ခံစားနေရတယ်။ လယ်ယာမြေဥပဒေကို တောင်သူတွေ လိုက်နာဖို့ အကြိမ်ကြိမ်ညွှန်ကြားပြီး အထက်လူကြီးတွေကျ ပျကွက်နေတာကို သိစေဖို့ ဆန္ဒဖော်ထုတ်တာပါ” လို့ ဆန္ဒပြပွဲ ဦးဆောင်သူ တောင်သူ ဦးဟန်မင်းဇော်က ပြောပါတယ်။ “တန်းစီဇယား ၃ ကြိမ်တင်ခဲ့ပြီး လုပ်ပိုင်ခွင့်မရခဲ့ဘူး။ ကရင်စုကျေးရွာနဲ့ အနီးဆုံးနေရာမှာ ပေါ်ထွန်းတဲ့ မြေနုကျွန်းဖြစ်လို့ လုပ်ပိုင်ခွင့်ရမယ်လို့ပြောပြီး ဒီနေ့ထိလက်တွေ့မှာ မရခဲ့ဘူး။ တာဝန်ရှိအဆင့်ဆင့်က အရေးယူရမယ့် ကိစ္စတွေမှာ အကာအကွယ်ပေးနေပြီး ပြဿနာဖြစ်ရင် မြို့နယ်ပြောင်းပစ်တာပဲ ရှိတယ်။ ဒီလိုလူမျိုးတွေကို ထိရောက်စွာ အရေးယူပေးစေချင်တယ်” လို့ တောင်သူ ဦးညွန့်ဝေက ပြောပါတယ်။ မင်းတုန်းချောင်းအတွင်းက ပဇဉ်းနိမ့်ကျေးရွာအုပ်စု စီမံခန့်ခွဲခွင့်ရှိတဲ့ မြေနုကျွန်းကို ပေ ၃၀၀ ကျော်လောက်သာ ဝေးကွာပြီး အနီးဆုံးဖြစ်တဲ့ ကရင်စုရွာကတောင်သူတွေ လုပ်ကိုင်ခွင့်မရဘဲ ပေ ၄၅၀၀ ကျော်လောက် ဝေးကွာတဲ့ ဥသျှစ်ချိုအုပ်စု ရွှေတောရွာ တောင်သူတွေကို မြို့နယ် လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန တာဝန်ရှိ ဝန်ထမ်းအချို့ လွဲမှားစွာ ပုံစံ ၇ ထုတ်ပေးခဲ့တာလို့ ဆိုပါတယ်။ ကံမမြို့ မြို့နယ်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ မြို့နယ်ဦးစီးဌာနမှူး ဦးထွန်းလင်းက “ပုံစံ ၇ တွေ လွဲမှားစွာ ထုတ်ပေးလို့ ပယ်ဖျက်ဖို့လုပ်ခဲ့တယ်။ ရပ်ကျေးလယ်/စီအဖွဲ့တွေကို ၁၅ ရက်တကြိမ် ပုံစံ ၇ ဖျက်သိမ်းဖို့ ပြန်အပ်ခိုင်းတာ ၃ ကြိမ်ထိ ဆောင်ရွက်ခဲ့တာကို ပြန်မပေးလို့ ခရိုင်တင်ပြထားတယ်။ လွဲမှားစွာလုပ်ခဲ့တဲ့ ဝန်ထမ်းကို မြို့နယ်ပြောင်း အပြစ်ပေးအရေးယူခဲ့တယ်” လို့ ဒီဗွီဘီကို ပြောပါတယ်။ ပုံစံ ၇ ရှိတဲ့သူက ကရင်စုရွာတောင်သူတွေကို ကံမမြို့နယ်တရားရုံးမှာ ပိုင်နက်ကျူးကျော်မှု ရာဇသတ်ကြီးပုဒ်မ ၄၄၇ နဲ့ တရားစွဲခဲ့လို့ ရုံးချိန်းတွေ အကြိမ်ကြိမ်သွားခဲ့ရပြီး တောင်သူ ၇ ဦး ဒဏ်ငွေ ၂ သောင်းစီကျခံခဲ့ရကာ သရက်ခရိုင်တရားရုံးမှာ အယူခံဝင်ထားတယ်လို့ သိရပါတယ်။ ဘဦး
2 years Ago

August 25, 2018

မဲဆန္ဒနယ် ၃ ခုတွင် ဝင်မပြိုင်၍ နိုင်ငံရေးပါတီတခုကို ရွေးကောက်ပွဲကော်မရှင် ဖျက်သိမ်း

လာမယ့် ကြားဖြတ်ရွေးကောက်ပွဲ အနည်းဆုံး မဲဆန္ဒနယ် ၃ ခုမှာ ဝင်မပြိုင်လို့ဆိုပြီး နိုင်ငံရေး ပါတီတခုကို ရွေးကောက်ပွဲကော်မရှင်က ဖျက်သိမ်းတယ်လို့ ကြေညာလိုက်ပါတယ်။ ပြည်သူ့ဘဝဖွံ့ဖြိုးတိုးတက်ရေးပါတီကို လာမယ့်နိုဝင်ဘာ ၃ ရက်နေ့ ကျင်းပမယ့် ကြားဖြတ်ရွေးကောက်ပွဲမှာ အနည်းဆုံး မဲဆန္ဒနယ် ၃ ခုမှာ ဝင်မပြိုင်တာကြောင့် နိုင်ငံရေးပါတီအဖြစ် မှတ်ပုံတင်ထားတာကနေ ပယ်ဖျက်ပြီး ပါတီကိုလည်း ဖျက်သိမ်းတယ်လို့ ပြည်ထောင်စု ရွေးကောက်ပွဲ ကော်မရှင်က မနေ့က ရက်စွဲနဲ့ ကြေညာလိုက်တာပါ။ ပါတီရဲ့ အလုပ်အမှုဆောင်အဖွဲ့ အတည်ပြုစာကို ကော်မရှင်က ပြန်မပို့ရသေးဘူးလို့ ပြည်သူ့ဘဝဖွံ့ဖြိုးတိုးတက်ရေးပါတီ ဥက္ကဋ္ဌ ဦးမြင့်သန်းက ပြောပါတယ်။ “ကျနော်တို့က လာမယ့်ရွေးကောက်ပွဲမှာ ဝင်မပြိုင်နိုင်ပါဘူးလို့ အကြောင်းကြားထားပြီးသား။ ကျနော်တို့ပါတီရဲ့ ဗဟိုအလုပ်အမှုဆောင်စာရင်းတွေနဲ့ ပါတီဝင် စာရင်းတွေကို မေလမှာ နောက်ဆုံးထားပြီး ပေးထားတယ်။ ဒါကို အတည်ပြုတယ်ဆိုတာတောင် ဒီကနေ့အထိ အကြောင်းမပြန်သေးဘူး။ ပြီးတော့ ရွေးကောက်ပွဲဝင်ပြိုင်ဖို့အတွက် ဇွန် ၂၀ ရက်နေ့မှာ စာပို့လာတယ်။ ဇူလိုင် ၂ ရက်နေ့မှာ ကိုယ်စားလှယ်လောင်းစာရင်းပေးရမယ်တဲ့။ ကျနော်တို့ကို အတည်ပြုတဲ့စာကတော့ မရောက်သေးဘူးလေ” လို့ ပြောပါတယ်။ ပါတီကို ၂၀၁၈ ခုနှစ် ဖေဖော်ဝါရီလ ၂၂ ရက်နေ့မှာ မှတ်ပုံတင်ခွင့်ပြုခဲ့တာဖြစ်ပါတယ်။ နိုင်ငံရေးပါတီများ မှတ်ပုံတင်တဲ့ နည်းဥပဒေအရ ပြည်ထောင်စုတဝန်းလုံးမှာစည်းရုံးဖို့အတွက် ဖွဲ့စည်းတဲ့ ပါတီဟာ မှတ်ပုံတင်ခွင့်ရတဲ့နေ့ကနေ ရက်ပေါင်း ၉၀ အတွင်း ပါတီဝင်အင်အား အနည်းဆုံး ၁၀၀၀ ကို ပြည့်မီအောင် စည်းရုံးပြီး ကော်မရှင်ကို တင်ပြရမယ်လို့ ဆိုပါတယ်။ မူလနည်းဥပဒေမှာတော့ အထွေထွေရွေးကောက်ပွဲမှာ ဝင်မပြိုင်မှ ပါတီဖျက်သိမ်းခံရမှာဖြစ်ပြီး နောက်ပိုင်း ဥပဒေကို ပြင်ဆင်လိုက်တဲ့အခါမှာတော့ ကြားဖြတ်ရွေးကောက်ပွဲမှာ ဝင်မပြိုင်ရင်လည်း ပါတီကို ဖျက်သိမ်းနိုင်တာ ဖြစ်ပါတယ်။ ပြည်ထောင်စု ရွေးကောက်ပွဲ ကော်မရှင်ရဲ့ စာရင်းတွေအရ အနည်းဆုံး မဲဆန္ဒနယ် ၃ ခု ဝင်ရောက်မယှဉ်ပြိုင်လို့ ပယ်ဖျက်ခဲ့တဲ့ပါတီ ၈ ခု ရှိပြီး တခြားအကြောင်းအရာတွေနဲ့လည်း ဖျက်သိမ်းခဲ့တာတွေရှိလို့ အခုဆိုရင် ပါတီ ၁၅ ခုကို ဖျက်သိမ်းခဲ့ပြီး ဖြစ်ပါတယ်။ လက်ရှိမှာတော့ တနိုင်ငံလုံးမှာ ပါတီပေါင်း ၉၄ ခု ရှိပါတယ်။
3 years Ago
More News
Up