စစ်အာဏာသိမ်းတာကို ကန့်ကွက်တဲ့အနေနဲ့ မကွေးတိုင်းဒေသကြီး ချောက်မြို့ အမှတ်-၂ ရေနံချက်စက်ရုံရှေ့မှာ စက်ရုံ ဝန်ထမ်းတွေနဲ့ အခြားဌာန ဝန်ထမ်း အင်အား ၂၀၀ လောက် စုပေါင်းပြီး အနီရောင်ဖဲကြိုးလှုပ်ရှားမှုကို ဒီနေ့ညနေ ပြုလုပ်ခဲ့ပါတယ်။
MPPE ရောင်းဝယ်ရေးအဖွဲ့၊ ရေနံချက်စက်ရုံဝန်ထမ်းအဖွဲ့တို့က ကမ္ဘာမကြေဘူး သီချင်းသံပြိုင်သီဆိုပြီး စစ်အာဏာရှင်အလိုမရှိ၊ စစ်အာဏာရှင်စနစ် ကျဆုံးပါစေလို့ ကြွေးကြော်ခဲ့ကြပါတယ်။
ချောက်မြို့နယ်ပညာရေးအဖွဲ့၊ မြို့ဈေးအဖွဲ့၊ ရေနံချောင်းရေနံမြေက ရေနံဝန်ထမ်းပေါင်းစုံ စုပေါင်းပြီး ဒီနေ့ မွန်းလွဲ ၁ နာရီခွဲလောက်ကလည်း အနီရောင်ဖဲကြိုးလှုပ်ရှားမှု ပြုလုပ်ခဲ့ကြတယ်လို့ သိရပါတယ်။
တပ်မတော်ကာကွယ်ဦးစီးချုပ် ရုံးစိုက်ရာ ဇေယျာသီရိမြို့နယ်မှာရှိတဲ့ ရေဆင်းမွေးမြူရေးဆိုင်ရာ ဆေးတက္ကသိုလ်ရှိ ဌာနပေါင်းစုံမှ ဆရာ၊ ဆရာမတွေ၊ ကျောင်းသား/သူ ဟောင်းတွေ ဌာနအသီးသီးမှ ဝန်ထမ်းတွေ စုပေါင်းပြီး စစ်အာဏာရှင်ဆန့်ကျင်ရေး ဖဲကြိုးနီ ကမ်ပိန်းပြုလုပ်နေပါတယ်။
ဖဲကြိုးနီလှုပ်ရှားမှုကို မွေးမြူရေးဆိုင်ရာ ဆေးတက္ကသိုလ် မုဒ်ဦးရှေ့နဲ့ ဘွဲ့နှင်းသဘင်( ရွှေရတု) ခန်းမရှေ့မှာ ဒီကနေ့ ပြုလုပ်ခဲ့တာဖြစ်ပါတယ်။
မနေ့ကလည်း ဇေယျာသီရိမြို့နယ် ရေဆင်းတက္ကသိုလ် သုံးခုထဲက တစ်ခုဖြစ်တဲ့ ရေဆင်းစိုက်ပျိုးရေးတက္ကသိုလ်ရှိ ဆရာ ဆရာမတွေ၊ ကျောင်းသား/သူ ဟောင်းတွေနဲ့ ကျောင်းသား ကျောင်းသူတွေက ဖဲကြိုးနီကမ်ပိန်းတွေ ပြုလုပ်ပြီး စစ်အစိုးရကို ဆန့်ကျင်ကန့်ကွက်ခဲ့ကြပါတယ်။
မကွေးတိုင်းဒေသကြီး ချောက်မြို့က ကျန်းမာရေးနဲ့ ကုသရေးဝန်ထမ်းတွေ စုပေါင်းပြီး ဖဲကြိုးနီကမ်ပိန်းကို ဖေဖော်ဝါရီ ၅ ရက် မနက်က ချောက်မြို့ပြည်သူဆေးရုံမှာ ပြုလုပ်ခဲ့ပါတယ်။
အဆိုပါကမ်ပိန်းကို ချောက်မြို့နယ် ကျန်းမာရေးနဲ့ ကုသရေးဝန်ထမ်း ၁၀၀ လောက် စုပေါင်း ပြုလုပ်ပြီး စစ်အာဏာရှင်စနစ် ကျဆုံးပါစေဆိုပြီး ကြွေးကြော်ခဲ့ပါတယ်။
အလားတူ ဒီကနေ့မနက်ပိုင်းမှာပဲ ချောက်-လမ်းရွာရေနံမြေ အထွေထွေမန်နေဂျာရုံးမှာ ဝန်ထမ်းတွေ၊ ရေနံတွင်းတူးစက်အဖွဲ့ ၊သယ်ပို့စက်ပြင်အဖွဲ့ ဝန်ထမ်းတွေနဲ့ အစိုးရစက်မှုလက်မှု သိပ္ပံကျောင်း ဆရာဆရာမတွေ ကလည်း အလားတူ လှုပ်ရှားမှု ပြုလုပ်ခဲ့ကြပါတယ်။
အာဏာသိမ်းစစ်အစိုးရကို ဆန့်ကျင်ကန့်ကွက်တဲ့အနေနဲ့ လက်ပံတန်း၊ ကျောက်ဖြူ၊ မြစ်ကြီးနားမြို့တို့က ကျန်းမာရေးဝန်ထမ်းတွေက ဖဲကြိုးနီကမ်ပိန်း ပြုလုပ်ခဲ့ကြပါတယ်။
ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်က ကျန်းမာရေးဝန်ထမ်းအားလုံးပါဝင်တဲ့ Red Ribbon ကမ်ပိန်းကို ဖေဖော်ဝါရီ ၃ ရက် မနက်ပိုင်းက လက်ပံတန်းမြို့ ပြည်သူ့ဆေးရုံမှာ ပြုလုပ်ခဲ့ကြပါတယ်။
မြို့နယ်ဆရာဝန်ကြီး ဒေါက်တာရဲဝင်းက "ကျနော်တို့ ကျန်းမာရေးဝန်ထမ်းတွေ အားလုံး ဆန္ဒတူ၊ သဘောတူ ကျနော်တို့ ရွေးချယ်ထားတဲ့ အစိုးရကို အုပ်ချုပ်စေချင်ပြီးတော့ ကျနော်တို့ ရွေးချယ်ထားတဲ့ အစိုးရရဲ့ တာဝန်ပေးချက်တွေကိုပဲ ဆောင်ရွက်ဖို့ လိုလားပါတယ်။ အဲ့ဒီအတွက် အခုလိုဆန္ဒ ဖော်ထုတ်ရတာဖြစ်ပါတယ်။” လို့ ပြောပါတယ်။
အလားတူ ရခိုင်ပြည်နယ် ကျောက်ဖြူခရိုင်ပြည်သူ့ဆေးရုံကြီးက ကျန်းမာရေးဝန်ထမ်းတွေကလည်း ဒီနေ့မနက်ပိုင်းက စစ်အာဏာရှင်အလိုမရှိဆိုတဲ့ ဆိုင်းဘုတ်ကို ကိုင်ဆောင်ပြီး ဖဲကြိုးနီကမ်ပိန်း ပြုလုပ်ခဲ့ကြပါတယ်။
လှုပ်ရှားမှုမှာပါဝင်တဲ့ ဆရာဝန် ၁ ဦးက “ပြည်သူတွေ ရွေးချယ်တင်မြှောက်ထားတဲ့ နိုင်ငံတော်သမ္မတနဲ့ နိုင်ငံတော်အတိုင်ပင်ခံအပါအဝင် လွှတ်တော်ကိုယ်စားလှယ်တွေကို မတရားဖမ်းဆီးထိန်းသိမ်းထားပြီး စစ်အာဏာသိမ်းတဲ့အပေါ်ကို မကျေနပ်သလို စစ်အာဏာရှင်စနစ်ကို ကြုံတွေ့ဖူးခဲ့ပြီ ဖြစ်တာကြောင့် ထပ်မကြုံချင်တဲ့အတွက် အခုလိုပြုလုပ်ရတာ” လို့ ပြောပါတယ်။ အလားတူ ကချင်ပြည်နည် မြစ်ကြီးနားမြို့၊ ခုတင် ၅၀၀ ဆံ့ အထွေထွေရောဂါကုပြည်သူ့ဆေးရုံကြီးက ကျန်းမာရေးဝန်ထမ်းတွေကလည်း ဖဲကြိုးနီကမ်ပိန်းကို ဒီနေ့မနက်ပိုင်းက ပြုလုပ်ခဲ့ကြပါတယ်။
သတင်း - ဝဏ္ဏထွန်း၊ နောင်နောင်၊ မီးမီး
