မွန်ပြည်နယ်၊ သထုံမြို့နယ်၊ မြေနီကုန်းကျေးရွာအနီးက ဓာတ်ငွေ့ပိုက်လိုင်းတစ်ခု ဇန်နဝါရီ ၂၀ ရက် မနက် ၂ နာရီခွဲလောက်မှာ ဖောက်ခွဲဖျက်ဆီးခံရလိုက်ရတယ်လို့ စစ်ကောင်စီအုပ်ချုပ်ရေး တာဝန်ရှိသူတွေနဲ့ ဒေသခံတွေက ဒီဗွီဘီကို ပြောပါတယ်။
အဲဒီဓာတ်ငွေ့ပိုက်လိုင်းကို အမည်မသိလူတစ်စုက ဆွဲမိုင်းအသုံးပြုပြီး ဖောက်ခွဲ ဖျက်ဆီးခဲ့တာဖြစ်ပြီး ဓာတ်ငွေ့ပိုက်လိုင်း ၂ ပေ ထက်မနည်း ထိခိုက်ပျက်စီးခဲ့ကာ အမြင့်ပေ ၁၀ လောက်ရှိတဲ့ မီးတောက်မီးလျှံတွေ ၄ နာရီလောက် ထွက်ပေါ်ခဲ့တာပါ။
ဒေသခံတွေကတော့ အဲဒီဓာတ်ငွေ့ပိုက်လိုင်းဟာ ထိုင်းနိုင်ငံကို တင်ပို့ရောင်းချနေတဲ့ ဓာတ်ငွေ့ပိုက်လိုင်း တစ်ခုဖြစ်တယ်လို့ ပြောဆိုကြပြီး ဒေသဆိုင်ရာ စစ်ကောင်စီအုပ်ချုပ်ရေး တာဝန်ရှိသူတွေကတော့ မြိုင်ကလေး ဘိလပ်မြေစက်ရုံသို့ ပို့ဆောင်နေတဲ့ ဓာတ်ငွေ့ပိုက်လိုင်း ဖြစ်တယ်လို့ ပြောပါတယ်။
ဓာတ်ငွေ့ပိုက်လိုင်း ပေါက်ကွဲပြီးနောက် စစ်ကောင်စီတပ်ဖွဲ့ဝင်တွေနဲ့ အုပ်ချုပ်ရေး တာဝန်ရှိသူတွေ လာရောက် စစ်ဆေးနေပါတယ်။
သထုံမြို့နယ်မှာ စစ်တပ် အာဏာသိမ်ပြီးနောက် ဓာတ်ငွေ့ပိုက်လိုင်း ၄ ကြိမ်ထက်မနည်း ပေါက်ကွဲမှု ဖြစ်ခဲ့ပါတယ်။
စစ်ကိုင်းတိုင်း ဝက်လက်မြို့နယ်က ရွာတစ်ရွာနားမှာရှိတဲ့ မိုင်တဲလ်တာဝါတိုင် ၂ ခုကို စက်တင်ဘာ ၁၆ ရက် ည ၁၂ နာရီလောက်က တပြိုင်နက်ထဲ ဖောက်ခွဲဖျက်ဆီးလိုက်တယ်လို့ ဖောင်းဒိုင်းဖောင်းဒိုင်းအဖွဲ့က ထုတ်ပြန်ကြေညာထားပါတယ်။
“ဖောက်ခွဲတာ ဟုတ်ပါတယ်။ စစ်ကောင်စီရဲ့ထောက်တိုင်တွေကို ဒါပထမဆုံးစပြီး ဖောက်ခွဲ ဖျက်ဆီးတာပဲ။ ရွာအမည်တွေတော့ ထည့်မရေးပါနဲ့ဗျာ ဒေသခံတွေ နာမှာ စိုးလို့ပါ” လို့ ဖောင်းဒိုင်း အဖွဲ့က ပြောပါတယ်။
ဝက်လက်မြို့နယ်အတွင်းက ဖောင်းဒိုင်းဖေါင်းဒိုင်းအဖွဲ့ဟာ စက်တင်ဘာ ၁၁ ရက်ကလည်း ပျူစောထီးအဖွဲ့ဝင်တစ်ဦးကို ရှင်းလင်းသုတ်သင်ခဲ့တာဖြစ်ပါတယ်။
