ဖူးကက်

June 23, 2022

ဖူးကက်တွင် အလုပ်သမားအခွင့်အရေး ချိုးဖောက်ခံရသည့် မြန်မာအလုပ်သမား လျော်ကြေး ဘတ် ၁၂၀,၀၀၀ ကျော်ရရှိ

ထိုင်းတောင်ပိုင်း ဖူးကက်ခရိုင် ဖူးကက်မြို့ရှိ မြန်မာအလုပ်သမား ၁ ဦး လုပ်ငန်းခွင်အခွင့်အရေး ချိုးဖောက်ခံရတာကြောင့် တရားရင်ဆိုင်ရာမှာ လျော်ကြေးငွေ ဘတ် ၁၂၀,၀၀၀ ကျော် ပြန်ရခဲ့ပါတယ်။

ဖူးကက်မြို့ ဟက်ပီးဟောလီးဒေးဟိုတယ်မှာ အလုပ်လုပ်ခဲ့တဲ့ မြန်မာရွှေ့ပြောင်းလုပ်သား တင်ကိုဦး ဆိုသူမှာ လွန်ခဲ့တဲ့ ၂ နှစ် ကိုဗစ်-၁၉ ပြန့်ပွားချိန်ကစ သူတို့ဟိုတယ်လုပ်ငန်း အဆင်မပြေဖြစ်လို့ လုပ်အားခ တဝက်လျှော့ခံခဲ့ရပြီး မနှစ် အောက်တိုဘာလက ဟိုတယ်လုပ်ငန်း ရပ်စဲလိုက်တာနဲ့ လုပ်အားခ လုံးဝမရခဲ့ကြောင်း၊ ဒါကြောင့် ထိုက်သင့်တဲ့လုပ်အားခတွေ ပြန်ရဖို့ ဖူးကက်ခရိုင် အလုပ်သမားတရားရုံးကို ဦးတိုက်လျှောက်ထား တိုင်ကြားပေးခဲ့တာလို့ လူ့အခွင့်အရေးနဲ့ ဖွံ့ဖြိုးရေးဖောင်ဒေးရှင်း- ဖူးကက်ရုံးခွဲ (Human Rights and Development Foundation-HRDF) ရဲ့ တရားရေးဌာနရှေ့နေ ခွန်ထာနိဒါးပီယချုတ်က ဒီဗွီဘီကို ပြောပါတယ်။

“သူ့ရဲ့ကေ့စ်ကတော့ လွန်ခဲ့တဲ့ ၂ နှစ်ကျော် ကိုဗစ်-၁၉ ရောဂါ ပြန့်ပွားနေတဲ့ အချိန်ကတည်းကပါ။ အစပိုင်းက အလုပ်ပုံမှန်ဆင်းပေမဲ့ လုပ်အားခ တဝက်လျှော့ခံခဲ့ရတယ်။ မနှစ်က သူတို့ဟိုတယ်လုပ်ငန်း ပိတ်သိမ်းလိုက်တော့ အလုပ်ဖြုတ်ခံရတယ်။ အဲဒီနစ်နာမှုတွေ အားလုံးကို တွက်ချက်ပြီး အလုပ်ရှင်အနေနဲ့ သူ့ကို စုစုပေါင်း ဘတ် ၁၅၂,၂၄၀ ပေးလျော်ဖို့ တရားရုံးက ဆုံးဖြတ်ခဲ့ပါတယ်။ ဒီလ ၇ ရက်နေ့က အလုပ်ရှင်က လာရောက်ညှိနှိုင်းတဲ့အခါမှာ နောက်ဆုံး ဘတ် ၁၂၀,၀၀၀ နဲ့ ပြေလည်သွားကြတယ်။”

အလုပ်ရှင်က တရားရုံးကို ငွေလာရောက်ပေးချေရာမှာ နောက်ကျတဲ့အတွက် နောက်ကျကြေး နောက်ထပ် ဘတ် ၁,၅၀၀ ဆောင်းပြီး စုစုပေါင်း ဘတ် ၁၂၁,၅၀၀ ကို ဇွန် ၁၅ ရက်နေ့က ကာယကံရှင် အလုပ်သမား တင်ကိုဦးလက်ထဲကို အပ်ခဲ့တယ်လို့ ဆိုပါတယ်။

ဖူးကက်ခရိုင်ထဲက တရားဝင်မှတ်ပုံတင်ထားတဲ့ ရွှေ့ပြောင်းအလုပ်သမား ၅၃,၀၀၀ ကျော်ရှိပြီး မြန်မာရွှေ့ပြောင်းလုပ်သားက အများဆုံးလို့ ဆိုပါတယ်။

ဒီလို မတရားအလုပ်ဖြုတ်ခံရတဲ့ ကေ့စ်အပြင် အခြား လုပ်အားခအပြည့်မရတာ၊ လုပ်ငန်းခွင် အခွင့်အရေး ချိုးဖောက်ခံရတဲ့ အမှုတွေလည်း ကူညီဆောင်ရွက်ပေးနေတယ်လို့ HRDF ရှေ့နေက ပြောသွားပါတယ်။

6 days Ago

January 25, 2022

ထိုင်းတွင် ကြောင်ပျောက်ရှာနေသည့် ဂျပန်မိန်းကလေး ကြော်ငြာခ ဘတ် ၃ သိန်းနှင့် ဆုငွေ ဘတ် သောင်းချီ အကုန်ကျခံရှာဖွေ

ထိုင်းတောင်ပိုင်း၊ ဖူးကက်ခရိုင်မှာ  ဂျပန်မိန်းကလေး တယောက်က  သူ့ရဲ့ ချစ်လှစွာသော ကြောင်လေး ၂ ကောင်ပျောက်ဆုံးသွားလို့  စိုးရိမ်သောကဖြစ်နေပြီး အဆိုပါကြောင်လေးတွေပြန်တွေ့ဖို့  ငွေသိန်းချီအကုန်ကျခံကာ လိုက်လံရှာဖွေနေပါတယ်။ 

ခိမ်း လို့ခေါ်တဲ့ ဂျပန်မိန်းကလေးဟာ ပြီးခဲ့တဲ့နှစ် နိုဝင်ဘာလက ထိုင်းနိုင်ငံကိုအလည်ခရီး ရောက်ခဲ့ပြီး သူနဲ့အတူ ကြောင်လေး ၄ ကောင်ပါခေါ်ဆောင်လာခဲ့ရာမှာ အဲဒီထဲက ကိုမာ့ကျန် (ကြောင်ထီး )  နဲ့ တေမာ့ကျန် ( ကြောင်မ ) လို့အမည်ပေးထားတဲ့ကြောင် ၂ ကောင်ဟာ လွန်ခဲ့တဲ့ ၂ ပတ်က သူတည်းခိုရာ ကမာလာရပ်ကွက်နေအိမ်ကနေ  ပျောက်ဆုံးသွားခဲ့တယ်လို့ ဆိုပါတယ်။ 

သူဟာကြောင်ကလေးတွေကို မိသားစုဝင်လိုချစ်ခင်ကြောင်း၊  ကြောင်ပျောက်သွားတာ အင်မ တန်စိတ်ပူမိပြီး ပထမကတော့ ကြောင်ရှိတဲ့နေရာသတင်းပေးနိုင်သူကို ၁ ကောင် ထိုင်းဘတ်ငွေ ၁ သောင်းစီဆုချမယ်လို့ ဆိုင်းဘုတ်ငယ်နဲ့ ကြော်ငြာခဲ့တယ်လို့ မျက်ရည်တွေကျရင်း သတင်းထောက်ကို ပြောပါတယ်။ 

ဒါပေမဲ့ သူ့ကြောင်ဟာ ရိုးရိုးဂျပန်ကြောင်မျိုးသာဖြစ်ပြီး လူတွေကသိပ်စိတ်တ်မဝင်စားလို့  ကြောင် ၁ ကောင် ဆုငွေ ၁ သောင်းမှ ဘတ် ၃ သောင်းထိ တိုးမြှင့်ကာ  ဆိုင်းဘုတ်နဲ့ကြော်ငြာခ ဘတ် ၃ သိန်း အကုန်ကျခံပြီး ဖူးကက်မြို့ ကထုရပ်ကွက် ကော်ဟတ်ဆူရင်းလမ်းမကြီးပေါ်ရှိ အထင်ကရ မီးပွိုင့်မှာ ကြော်ငြာထား တာလို့ ပြောပါတယ်။ 

မနေ့ကတော့အဆိုပါကြောင်နဲ့တူနဲ့ ကြောင် ၁ ကောင်ကို ထိုင်းပြည်သူ ၁ ဦးက ကမာလာရပ်ကွက်ရှိ ဟိုတယ်တစ်ခုအနီးမှာတွေ့ရှိကြောင်း၊ ကိုမာ့ကျန် ဆိုပြီးသူ့ နာမည်ခေါ်လိုက်ရာမှာ ကြောင်က လှုပ်လှုပ်ရှားရှားဖြစ်သွားပေမယ့် လိုက်ဖမ်းလို့မရသေးကြောင်း ၊ ဒါကြောင့် ကြောင်ပြန်ရ အောင်ဆောင်ရွက်ပေးနိုင်သူအနေနဲ့ ဖုံးနံပါတ် ၀၈၃ ၈၃၂၁၉၅၅ ကိုဆက်သွယ်ပေးဖို့ ပိုင်ရှင်က သတင်းထောက်ကိုပြောသွားပါတယ်။

Photo Credit-PBS/Khaosod

5 months Ago
More News
Up