ဖူသရက်

September 1, 2021

၂၀၂၀ တိုကျို မသန်စွမ်းအားကစားပြိုင်ပွဲတွင် ထိုင်းဝှီးချဲအပြေးသမား ၂ ဦး ငွေနှင့်ကြေး ဆုတံဆိပ်ရ

ဂျပန်နိုင်ငံမှာ ကျင်းပနေတဲ့ ၂၀၂၀ တိုကျိုမသန်စွမ်းအားကစားပြိုင်ပွဲမှာ ထိုင်းဝှီးချဲ အပြေးသမား ၂ ယောက်က ပွဲစဉ်တခုတည်းမှာ ငွေနဲ့ ကြေးဆုတံဆိပ်တွေ အသီးသီး ရရှိခဲ့ကြပါတယ်။

သူတို့ နှစ်ယောက်လုံးဟာ အမျိုးသား မီတာ ၁၅၀၀ ပြိုင်ပွဲတခုတည်းမှာပဲ ဆုတံဆိပ်တွေ ရရှိခဲ့ကြတာဖြစ်ပြီး ရွှေတံဆိပ်ဆုကိုတော့ အသက် ၃၅ နှစ်အရွယ် ဆွစ်ဇာလန် ကစားသမား မာဆယ်လ် ဟပ်ဂ်က အချိန် ၂ မိနစ်၊ ၄၉ ဒသမ ၅၅ စက္ကန့်နဲ့ စံချိန်သစ်တင် ရရှိသွားခဲ့တာပါ။

ဒုတိယနေရာကို ရရှိခဲ့သူ အသက် ၄၀ အရွယ် ထိုင်းကစားသမား ပရာဝပ်က အချိန် ၂ မိနစ်၊ ၅၀ ဒသမ ၂၀ စက္ကန့်နဲ့ ပန်းဝင်ခဲ့ကာ တတိယ ကြေးတံဆိပ်ဆုကိုတော့ အချိန် ၂ မိနစ်၊ ၅၀ ဒသမ ၆၈ စက္ကန့်နဲ့ နောက်ထပ် ထိုင်းကစားသမားတယောက်ဖြစ်တဲ့ ဖူသရက်က ရရှိသွားခဲ့တာ ဖြစ်ပါတယ်။

၂၀၂၀ တိုကျိုမသန်စွမ်းအားကစားပြိုင်ပွဲကိုတော့ ပြီးခဲ့တဲ့ တိုကျိုအိုလံပစ်အားကစားပြိုင်ပွဲအပြီး ၁၆ ရက်အကြာ ဩဂုတ် ၂၄ရက်က စတင်ကာ ကျင်းပနေတာ ဖြစ်ပါတယ်။

ဒီပြိုင်ပွဲကိုလည်း ကိုဗစ်-၁၉ ကပ်ဘေးကြောင့် ပရိသတ်တွေ ကြည့်ရှုခွင့်မပေးပဲ စည်းမျဉ်းစည်းကမ်းတင်းကျပ်ထားပြီး လာမယ့် စက်တင်ဘာ ၅ ရက်နေ့အထိ ကျင်းပသွားမှာ ဖြစ်ပါတယ်။

လက်ရှိအချိန်ထိ နိုင်ငံအလိုက် ဆုတံဆိပ် ရရှိမှုမှာတော့ တရုတ်နိုင်ငံက ရွှေတံဆိပ် ၆၃ ခုအပါအဝင် ဆုတံဆိပ်ပေါင်း ၁၃၄ ခုနဲ့ ဦးဆောင်နေပြီး သူ့နောက်မှာ ဗြိတိန်က ရွှေတံဆိပ် ၂၉ ခု၊ ရုရှားက ၂၆ ခုစီနဲ့ ရပ်တည်နေပါတယ်။

3 months Ago
Up