ဖားကန့်မြေပြို

January 17, 2016

ဖားကန့်မြေပြိုသည့်ကိစ္စ လုပ်ငန်းရှင်များ၏ အတွေ့အကြုံအားနည်းချက်ကြောင့်ဟု ဆို

ကျောက်စိမ်းအဓိကတူးဖော်နေကြတဲ့ ဖားကန့်ဒေသမှာ မြေစာပုံပြိုကျတာ အကြိမ်ကြိမ်ဖြစ်ခဲ့ပြီး ဒါဟာ အစိုးရနဲ့ လုပ်ငန်းရှင်တွေရဲ့ အတွေ့အကြုံနည်းခဲ့ကြတာကြောင့်လို့ ကျောက်မျက်  လုပ်ငန်းရှင်များအသင်းချုပ် ဥက္ကဋ္ဌက ပြောပါတယ်။ “အန္တရာယ်ရှိတယ်လို့ ဆိုင်းဘုတ်ထောင်ထားရင်တော့ မသွားသင့်တော့ဘူးပေါ့။ ကျွန်တော်တို့ ဆီမှာတော့ ဒီနေ့ဆိုင်းဘုတ်တင် နောက်နေ့ ပျောက်သွားတာမျိုး၊ အန္တရာယ်ကို အန္တရာယ်လို့ မသိတာတွေ ရှိတယ်။ လုပ်ငန်းရှင်ပိုင်းကလည်း အင်မတန်မြင့်တဲ့ မြေစာပုံမပုံဖို့၊ ပုံတဲ့အခါမှာ လည်း လှေကားထစ်လို ပုံရမှာလား စသည်ဖြင့် အတွေ့အကြုံမရှိတဲ့ ပြဿနာလို့ ယူဆပါတယ်။ အစိုးရပိုင်းကလည်း ဒီလိုဖြစ်နေတာတွေ့ပြီဆိုရင် လမ်းညွှန်မှုတွေ လုပ်ရမှာပါ။ ဒါပေမယ့် ကျွန်တော်တို့ နိုင်ငံမှာ ဒီလို မိုင်း(ကျောက်မျက်၊သတ္တုတွင်း)ကြီးတွေ နည်းပါတယ်” လို့ မြန်မာနိုင်ငံ ကျောက်မျက် ရတနာ လုပ်ငန်းရှင်များအသင်းချုပ် ဥက္ကဋ္ဌ ဦးရုံးမူက ပြောပါတယ်။ ဒီအတွက် အန္တရာယ်မရှိအောင် စွန့်ပစ်ကြဖို့ လုပ်ငန်းရှင်တွေကို စာပို့ထားတယ်လို့ သူက ဆိုပါတယ်။ အသင်း အနေနဲ့ကတော့ အန်ဂျီအိုဖြစ်တဲ့အတွက် လိုက်နာရမယ့် ပုံစံတွေပဲ ပြောနိုင်ပြီး အရေးယူတာ မလုပ်နိုင်ဘူး လို့လည်း သူက ပြောပါတယ်။ လက်ရှိ ဖားကန့်ဒေသမှာ စက်ယန္တရားကြီးတွေနဲ့ တူးဖော်နေကြတဲ့အပေါ်မှာလည်း “မကြာသေးခင်ကပဲ လုပ်ငန်းရှင်ကြီးတွေ အားလုံးခေါ်ပြီး အစည်းအဝေးလုပ်ပါတယ်။ နိုင်ငံတော်အစိုးရက သတ်မှတ်တဲ့ စက်ယန္တရား နှုန်းထားအတိုင်း တူးဖော်ကြဖို့၊ အလွန့်အကျွံမလုပ်ဖို့၊ ဘာပဲဖြစ်ဖြစ် သားစဉ်မြေးဆက်အတွက်ကို စဉ်းစား လေးစားလိုက်နာဖို့ ထပ်ဆင့်ပြောထားတာလည်းရှိပါတယ်။ အလွန်အကျွံလုပ်မယ်ဆိုရင်တော့ ဥပမာ နှစ် နှစ်ဆယ်နဲ့ကုန်မယ့်ဟာကို ဆယ်နှစ်နဲ့ ကုန်သွားမှာပေါ့” လို့ ဆိုပါတယ်။ လုပ်ငန်းအမျိုးအစားအလိုက် ပတ်ဝန်းကျင်ထိခိုက်မှု ဆန်းစစ်ခြင်းဆိုင်ရာ လုပ်ထုံးလုပ်နည်းနဲ့ ထုတ်လွှတ်မှု လမ်းညွှန်ချက်တွေကို ပတ်ဝန်းကျင်ထိန်းသိမ်းရေးနဲ့ သစ်တောရေးရာ ၀န်ကြီးဌာနက ဇန်န၀ါရီ ၁၄ ရက်နေ့မှာ ထုတ်ပြန်လိုက်ပြီ ဖြစ်ပါတယ်။
6 years Ago

November 30, 2015

ဖားကန့်တွင် စွန့်ပစ်မြေစာပုံ ထပ်မံပြိုကျ၊ လူတဦး သေဆုံး

ကချင်ပြည်နယ် ဖားကန့်ဒေသမှာ ကျောက်စိမ်းတူးဖော်ရေးလုပ်ငန်းက မြေစာပုံပြိုကျတာကြောင့် လူပေါင်း ၁၀၀ ကျော် သေဆုံးခဲ့ပြီး တပတ်အတွင်းမှာပဲ နောက်ထပ် မြေစာပုံပြိုကျပြီး လူတဦး သေဆုံးသွားပါတယ်။ ရေမဆေးကျောက်ရှာဖွေသူတွေဟာ ပြီးခဲ့တဲ့  နိုဝင်ဘာ ၂၈ ရက်၊ မနက် ၄ နာရီခွဲက  နမ့်မော်ကျေးရွာနားက ရတနာပြည့်ဖြိုး ကုမ္ပဏီလုပ်ကွက်ထဲမှာ ၀င်ရောက်ရှာဖွေရင်း သူတို့ပေါ်ကို မြေစာပုံ ပြိုကျခဲ့တာလို့ ဖားကန့်မြို့နယ် အထွေထွေအုပ်ချုပ်ရေးရုံးမှ ၀န်ထမ်းတဦးက ဒီဗွီဘီကို ပြောပါတယ်။ "ရတနာပြည့်ဖြိုးကုမ္ပဏီပိုင် လုပ်ကွက်ထဲမှာ သူတို့က စွန့်ပစ်ဖို့ ပုံထားတဲ့ မြေစာပုံပေါ့၊ အမြင့်က ၄၅ ပေလောက်ရှိပါတယ်။ အဲဒီမြေစာပုံပေါ်ကို ရေမဆေးကျောက်ရှာတဲ့ လူ ၄ ယောက်က တက်ရှာတာ၊ အဲဒီမြေစာပုံက မြေစာပြန်ပြိုတာပေါ့၊ တယောက်သေတယ်၊ ကျန်တဲ့ ၃ ယောက်ကတော့ ဘာမှမဖြစ်ဘူး။" သေဆုံးသူဟာ နမ့်မော်ရွာကဆိုတာပဲသိပြီး ကျန်တဲ့အချက်အလက်တွေတော့ မသိရဘူးလို့ တာဝန်ကျဝန်ထမ်းက ပြောပါတယ်။ ဒီကိစ္စနဲ့ပတ်သက်ပြီး ဖားကန့်မှာ ကျောက်လုပ်ငန်းတွေ လုပ်ကိုင်နေသူ ကိုဇော်မိုးထက်ကတော့ သူတို့ ၄ ယောက်လုံး ရခိုင်ပြည်နယ်က လာတာဖြစ်ကြောင်း၊ ကုမ္ပဏီ လုပ်ကွက်ထဲကို ခွင့်ပြုချက်မရဘဲနဲ့ ၀င်ရောက်ပြီး ရေမဆေးကျောက်တွေ ရှာဖွေတူးဖော်စဉ် ကျင်းထဲကို ပြုတ်ကျသွားတဲ့အတွက် တဦးသေဆုံးပြီး ကျန်တဲ့ ၃ ဦးက ဒဏ်ရာအနည်းငယ် ရကြတယ်လို့ ဆိုပါတယ်။ အဲဒီဒေသမှာ ကျောက်တူးလုပ်ငန်းကြောင့် မတော်တဆ ထိခိုက်ဒဏ်ရာရမှုတွေ အမြဲလိုဖြစ်ပွားလေ့ရှိရာမှာ ဒီမတိုင်ခင် ရှေ့နိုဝင်ဘာလ ၂၆ ရက်နေ့ကလည်း ဆိတ်မူကျေးရွာအုပ်စု ဆိုင်းတောင်ဘက်မှာ မြေစာတင်ကားတစီးက လူ ၂ ဦးကို ကြိတ်မိလို့  တဦးသေဆုံး၊ တဦးပေါင်ကျိုးသွားတယ်လို့ ကိုမိုးဇော်ထက်က ဆက်ပြောပါတယ်။ သေဆုံးသူမှာ မြန်မာနိုင်ငံအလယ်ပိုင်း ကန့်ဘလူမြို့နယ်မှ ကိုစံတင်ဆိုသူဖြစ်ပြီး ပေါင်ကျိုးသူမှာ တနယ်တည်းသား ကိုဖိုးထက်လို့ ဆိုပါတယ်။ ဒီယာဉ်တိုက်မှုဖြစ်ပွားပြီး နောက်တနေ့ နိုဝင်ဘာ ၂၇ ရက်နဲ့ ၂၈ ရက်နေ့မှာ  ကချင်အမျိုးသားဖွံ့ဖြိုးရေးအဖွဲ့ ဦးဆောင်တဲ့ လူအင်အား ၃၀၀ လောက်က ကျောက်တူးကုမ္ပဏီတွေကို ဆန္ဒပြခဲ့ကြပြီး မြေစာပုံတင်တဲ့ကားတွေ အနေနဲ့ လူအများနေထိုင်ရာ ကျေးရွာတွေမှာ ဖြတ်သန်းသွားလာခြင်း မပြုဖို့ တောင်းဆိုခဲ့ကြပါတယ်။ ဆန္ဒပြပြီးတဲ့နောက် မြေစာသည်ကားပိုင်ရှင် နေလပွင့်ကုမ္ပဏီကနေပြီး ယာဉ်တိုက်မှုမှာ သေဆုံးသွားသူအတွက် လျော်ကြေးငွေ ကျပ်သိန်းပေါင်း ၃၅၀၊ ပေါင်ကျိုးသူအတွက် သိန်း ၆၀ ပြန်ပေးခဲ့ကြောင်း၊ ကချင်လူမျိုးတွေ သေဆုံးရင်တော့ လျော်ကြေးငွေ သိန်းထောင်ချီရတဲ့အတွက် တန်းတူညီမျှ မရှိဘူးလို့ ကိုမိုးဇော်ထက်က ပြောသွားပါတယ်။ မြေစာသည်ကားတွေ ရွာအနီးနားကနေ ဖြတ်မသွားဖို့ဆိုတဲ့ ကိစ္စမှာတော့ ကုမ္ပဏီဘက်က ရွာပတ်ပတ်လည်ကို စည်းရိုးခတ်ပေးမယ်လို့ ညှိနှိုင်းခဲ့ပေမယ့် ရွာအ၀င်အထွက် လမ်းတွေမှာလည်း မတော်တဆ ထိခိုက်မှုတွေ ထပ်ဖြစ်နိုင်တာကြောင့် အပြီးသတ် ညှိနှိုင်းလို့ မရသေးဘူးလို့ ဆိုပါတယ်။ ဖားကန့်မှာ ဒီနှစ်ထဲ မြေစာပုံပြိုကျမှုတွေ ၆ ကြိမ်ထက်မနည်း ဖြစ်ပွားခဲ့ပြီး ပြီးခဲ့တဲ့ နိုဝင်ဘာ ၂၁ ရက် ဆွတ်အောင်ရွာက စုပေါင်းမြေစာပုံပြိုကျမှုမှာတော့ လူပေါင်း ၁၀၀ ကျော် သေဆုံးခဲ့ပါတယ်။
6 years Ago
More News
Up