ပရီးမီးယားလိဂ်နဲ့ အံဝင်ခွင်ကျဖြစ်အောင် သင်ယူနေရဆဲဖြစ်တယ်လို့ လီဗာပူး ကွင်းလယ်ကစားသမား ဖာဘင်ဟိုက ပြောကြားလိုက်ပါတယ်။ ဘရာဇီးကစားသမား ဖာဘင်ဟိုက ပြီးခဲ့တဲ့ နွေရာသီ အပြောင်းအရွှေ့ကမှ မိုနာကို အသင်းကနေ ပြောင်းရွှေ့လာတာပါ။ ဖာဘင်ဟိုဟာ ပရီးမီးယားလိဂ် အဖွင့်ပွဲစဉ်ဖြစ်တဲ့ ဝက်စ်ဟမ်းနဲ့ပွဲမှာ ပါဝင်ကစားခွင့် မရခဲ့သလို ခရစ္စတယ်ပဲလေ့စ်၊ ဘရိုက်အသင်းတွေကို အနိုင်ရတဲ့ပွဲမှာလည်း လူစာရင်းကနေ ချန်လှပ်ခံခဲ့ရတာပါ။ ကစားသမားသစ်တဦး အနေနဲ့ လိဂ်အကြောင်းကို ပိုသိဖို့ သင်ယူနေဆဲဖြစ်ပြီး ပရီးမီးယားလိဂ်ဟာ ရုပ်ပိုင်းဆိုင်ရာအားပြုတဲ့ ပြင်းထန်တဲ့ပြိုင်ပွဲ ဖြစ်တယ်လို့ ဖာဘင်ဟိုက ပြောပါတယ်။ ဒါပေမယ့် အသင်းနဲ့ အမြန်ဆုံးအံဝင်ဖို့ အသင်းဖော်တွေရဲ့ လမ်းညွှန်မှုအတိုင်း ကြိုးစားသွားမယ်လို့ ဖာဘင်ဟိုက ပြောကြားခဲ့ပါတယ်။ အသက် ၂၄ နှစ်ရှိ ဖာဘင်ဟိုဟာ မိုနာကိုအသင်းမှာတုန်းက ၂၃၃ ပွဲအထိ ကစားပြီး ၃၁ ဂိုး သွင်းယူခဲ့ပါတယ်။

လီဗာပူးအသင်းက ခေါ်ယူလိုက်တဲ့ ဖာဘင်ဟိုဟာ ပရီးမီးယားလိဂ်မှာ ခြေစွမ်းပြ ကစားနိုင်လိမ့်မယ်လို့ ဘရာဇီးအသင်းခေါင်းဆောင် သီယာဂိုဆေးဗားလ်က ပြောကြားလိုက်ပါတယ်။ အသက် ၂၄ နှစ်ရှိ ဘရာဇီးကစားသမား ဖာဘင်ဟိုဟာ မိုနာကိုအသင်းမှာ ခြေစွမ်းပြကစားခဲ့ပြီး လီဗာပူးအသင်းက ပေါင် ၄၄ သန်းလောက်နဲ့ ဝယ်ယူခဲ့တာပါ။ ဖာဘင်ဟိုဟာ ဘရာဇီးလက်ရွေးစင်အသင်းမှာ ၄ ပွဲ ကစားခဲ့ပေမယ့် ကမ္ဘာ့ဖလား ကစားမယ့် ဘရာဇီးလက်ရွေးစင်အသင်းမှာတော့ ရွေးချယ်ခြင်း မခံရပါဘူး။ ဒါပေမယ့် ဖာဘင်ဟိုဟာ ပါးနပ်မှုရှိပြီး နည်းစနစ်ပိုင်း ကောင်းမွန်တဲ့ ကစားသမားဖြစ်လို့ ပရီးမီးယားလိဂ်မှာ ခြေစွမ်းပြလိမ့်မယ်လို့ သီယာဂိုဆေးလ်ဗားက ဆိုပါတယ်။ ဖာဘင်ဟိုဟာ ညာအစွန်ကစားသမားဖြစ်ပေမယ့် မိုနာကိုအသင်းမှာ ကွင်းလယ်နေရာ ပြောင်းလဲကစားခဲ့သူပါ။ လီဗာပူးအသင်းက ဘယ်နေရာမှာ အသုံးပြုမလဲ မသိပေမယ့် နှစ်နေရာစလုံးမှာ ခြေစွမ်းပြ ကစားနိုင်သူလို့လည်း ဘရာဇီးအသင်းခေါင်းဆောင် သီယာဂိုဆေးဗားလ်က ပြောကြားခဲ့ပါတယ်။