ဖယ်ရှာ

May 8, 2020

ကေအန်ယူဖွင့်လှစ်ထားသည့် COVID-19 စစ်ဆေးရေးဂိတ်ဖယ်ရှားခံရပြီးနောက်  ပစ်ခတ်မှုဖြစ်ပွား 

COVID-19 ရောဂါကာကွယ်တားဆီးရေးအတွက် ကရင်အမျိုးသားအစည်းအရုံး (ကေအန်ယူ) ဖွင့်ထားတဲ့ စစ်ဆေးရေး ဂိတ် ၂ ခုကို တပ်မတော်က ဖယ်ရှားပေးဖို့ လုပ်ဆောင်တဲ့အတွက် မေ ၆ ရက်နေ့က ပစ်ခတ်မှု ၂ ကြိမ်ဖြစ်ပွားခဲ့တယ်လို့ ကေအန်ယူဖာပွန်ခရိုင်တာဝန်ရှိသူတွေက ပြောပါတယ်။ ကရင်ပြည်နယ်၊ ဖာပွန်ခရိုင်အတွင်းက ကေအန်ယူ ထိန်းချုပ်နယ်မြေအတွင်း  COVID-19 ရောဂါပျံ့နှံ့မှု မရှိစေဖို့ရည်ရွယ်ပြီး ဒွဲလုံမြို့နယ်၊ လေးဖိုးထားအုပ်စုအတွင်းရှိ ဝါသိုးခိုကျေးရွာနဲ့ ကတိုင်တိကျေးရွာအုပ်စု ဖားလုံး လမ်းသွယ်တို့မှာ COVID-19  စစ်ဆေးဂိတ် ချမှတ်ထားပါတယ်။ အဲဒီဂိတ်တွေကို တပ်မတော် စကခ (၈) လက်အောက်ခံ ခမရ (၄၀၅) တပ်ဖွဲ့ဝင်တွေက သွားရောက်ပြီး ထွက်ခွာပေးဖို ဖိအားပေးခဲ့သလို မီးရှို့ဖျက်ဆီးလိုက်တဲ့အတွက် နှစ်ဖက် ပစ်ခတ်မှုဖြစ်ပွားခဲ့တာလို့ ကေအန်ယူဖာပွန်ခရိုင်အတွင်းရေးမှူး ပဒိုစောရော်ဘင်မှူးက ပြောပါတယ်။ “အဲဒီနေရာကနေ ဖာပွန်ခရိုင် တာဝန်ရှိသူများမှ ထွက်ခွာရန်အတွက်လည်း ဖိအားပေး ပြောဆိုတယ်။  ဖာပွန်ခရိုင် တာဝန်ရှိသူတွေကလည်း ကိုဗစ် ကူးစက်ရောဂါစောင့်ကြည့်စစ်ဆေးခြင်းဖြစ်တဲ့အတွက် အချင်းချင်းဆန့်ကျင်မှု မပြုလုပ်သင့်ကြောင်း ပြန်လည်ရှင်းပြပေမယ့် သူတို့က လက်မခံဘဲ ရောဂါစောင့်ကြည့်စစ်ဆေးတဲ့နေရာကို မီးရှို့ဖျက်ဆီးလိုက်တဲ့အတွက်  ပစ်ခတ်မှု ဖြစ်ပွားခဲ့တာ။ ” ပထမ အကြိမ်ပစ်ခတ်မှုမှာ နေ့လယ် ၁၂ နာရီကျော်အချိန်ဖြစ်ပြီး ဒွဲလုံမြို့နယ်၊ လေးဖိုးထာကျေးရွာအုပ်စု၊ ဝါသိုးခို လမ်းမပေါ်ရှိ COVID-19 ကူးစက်ရောဂါစောင့်ကြည့်စစ်ဆေးတဲ့နေရာမှာ ဖြစ်ခဲ့တာလို့ဆိုပါတယ်။ ဒုတိယအကြိမ်ပစ်ခတ်မှုကတော့  ညနေ ၄ နာရီလောက်ဖြစ်ပြီး ဒွဲလုံမြို့နယ်၊ ကတိုင်တိကျေးရွာအုပ်စု၊ ဖားလုံးလမ်းသွယ်ရှိ COVID-19 ရောဂါစောင့်ကြည့်စစ်ဆေးတဲ့ နေရာမှာဖြစ်ပွားခဲ့တာလို့ ဆိုပါတယ်။ ဒီဖြစ်စဉ်နဲ့ပတ်သက်ပြီး တပ်မတော်ဘက်ကို ဆက်သွယ်မေးမြန်းလို့ မရသေးပါဘူး။ ပြီးခဲ့တဲ့ ရက်ပိုင်းကလည်း မွန်ပြည်နယ်၊ သထုံခရိုင်ရှိ ကရင်အမျိုးသားအစည်းအရုံး (ကေအန်ယူ) တပ်မဟာ ၁ ရဲ့ COVID-19 ကြိုတင်ကာကွယ် စစ်ဆေးရေးဂိတ်ကို ဖယ်ရှားပေးဖို့ တပ်မတော်ဘက်က အင်အားနဲ့ လာရောက်တားမြစ်ရာမှာ နှစ်ဖက်တင်းမာမှုတွေ ဖြစ်ပွားခဲ့ပြီး စစ်ဆေးရေးဂိတ်ကို ပိတ်ထားလိုက်ရတာတွေ ရှိပါတယ်။ COVID-19 ရောဂါကာကွယ်ထိန်းချုပ်ရေးဆိုင်ရာ လုပ်ငန်းတွေကို တိုင်းရင်းသား လက်နက်ကိုင်အဖွဲ့အစည်းတွေ အခြေစိုက်ရာဒေသတွေမှာ ဆောင်ရွက်နိုင်ရေး  “COVID-19 ကာကွယ်ထိန်းချုပ်ကုသရေးနှင့် စပ်လျဉ်း၍ တိုင်းရင်းသား လက်နက်ကိုင်အဖွဲ့အစည်းများနှင့် ညှိနှိုင်းပူးပေါင်းဆောင်ရွက်ရေးကော်မတီ”ကို  ဖွဲ့စည်းလိုက်ကြောင်း  နိုင်ငံတော်သမ္မတရုံးက ဧပြီလ ၂၇ ရက်နေ့ ရက်စွဲနဲ့ ကြေညာခဲ့ပါတယ်။
1 year Ago

February 21, 2020

လေထုထဲ ကာဗွန်များဖယ်ရှားပြီး ရေခဲအရည်ပျော်မှု နှေးအောင်လုပ်ရန် သြစတြေးလျ သိပ္ပံပညာရှင် ပြော

ကမ္ဘာကြီးပူနွေးမှုက အန္တာတိကရေခဲပြင်ကို ထုနဲ့ထည်နဲ့ အရည်ပျော်စေပြီး  လေထုထဲက ကာဗွန်တွေကို ဖယ်ရှားပစ်တာက ရေခဲအရည်ပျော်ဖြစ်စဉ်ကို နှေးအောင် လုပ်ဆောင်တဲ့ တခုတည်းသော နည်းလမ်းဖြစ်တယ်လို့ သြစတြေးလျ ရာသီဥတုသိပ္ပံပညာရှင်က ပြောလိုက်ပါတယ်။ အန္တာတိကတိုက်ရဲ့  စံချိန်တင်အပူဆုံး   ၁၈ ဒသမ ၃ ဒီဂရီ စင်တီဂရိတ်ကို  ဖေဖော်ဝါရီလ ၆ ရက်က အဲဒီမှာရှိတဲ့ သုတေသနစခန်းမှာ တိုင်းတာရရှိခဲ့ပါတယ်။ ပိုမိုပူပြင်းတဲ့ အပူချိန်တွေဆက်ရှိမယ်ဆိုရင် ကမ္ဘာ့ပင်လယ်ရေမျက်နှာပြင် မြင့်တက်တာကို အလွန်အကျွံဖြစ်စေနိုင်ပါတယ်။   မကြာသေးခင်က လူသားတွေရဲ့ လုပ်ဆောင်ချက်ကြောင့် ကမ္ဘာကြီးဟာ ပိုမိုပူနွေးလာပြိး အကျိုးဆက်အနေနဲ့ အန္တာတိက တိုက်မှာရှိတဲ့ ရေခဲပြင် အများအပြား အရည်ပျော်လာတယ်လို့ ယူးဆောက်ဝေးတက္ကသိုလ် သုတေသီ ဇိုး သောမတ်စ်က ဖေဖော်ဝါရီလ ၁၉ ရက်မှာ ပြောခဲ့ပါတယ်။  “ကျမတို့တွေ့ရတာတော့ အနောက်အန္တာတိကရေခဲလွှာကနေ စပြီး အရည်ပျော်တာပေါ့။ ကျမတို့ အဆင့်တခုကို ရောက်ချိန်မှာ အရည်မပျော်အောင် ကြိုးပမ်းပေမယ့်လည်း ဆက်အရည်ပျော်နေမှာ ဖြစ်ပါတယ်” လို့ နယူးဆောက်ဝေးတက္ကသိုလ် သုတေသီ ဇိုး သောမတ်စ်က ပြောခဲ့ပါတယ်။  “ရေခဲလွှာအရည်ပျော်တာနဲ့ တဖြည်းဖြည်းချင်း လူတွေ နေရာပျောက်ကုန်လိမ့်မယ်။ ကျွန်းငယ်ဒေသတွေမှာ အဲဒီလို ဖြစ်နေပြီဆိုတာ ကျွန်မတို့ သိပါတယ်။ ဒါက တဖြည်းဖြည်း ဆက်ဖြစ်နေပြိး ဒီရေတက်ချိန်မှာလည်း နေအိမ်တွေ ရေလွှမ်းခံရလိမ့်မယ်။  နောက်တော့ သာမန် ဒီရေတက်ချိန်ပေါ့။ အဲဒီနောက်ပိုင်း ဒီရေကျချိန်မှာတောင် ရေလွှမ်းတာတွေ ကြုံရပါလိမ့်မယ်”လို့ သုတေသီ ဇို သောမတ်စ်က ရှင်းပြခဲ့ပါတယ်။  ဒီလို ရေခဲအရည်ပျော်ဖြစ်စဉ်ကို နှေးကွေးစေဖို့ လေထုထဲမှာရှိတဲ့ ကာဗွန်တွေကို ဖယ်ရှားခြင်းကသာ တခုတည်းသောနည်းလမ်း ဖြစ်တယ်လို့လည်း သုတေသီ ဇိုး သောမတ်စ်က အကြံပြုခဲ့ပါတယ်။ 
1 year Ago
Up