ဖယ်ခုံ

January 11, 2023

စစ်တိုက်လေယာဉ်ပျံဝဲနေသဖြင့် ကရင်နီစစ်ရှောင်ကျောင်းများ ပိတ်ထားရ

ကရင်နီ (ကယား) ပြည်နယ်နဲ့ ရှမ်းပြည်နယ်တောင်ပိုင်း ဖယ်ခုံမြို့နယ်တွေမှာ မနေ့ ဇန်နဝါရီ ၁၀ ရက်က စစ်ကောင်စီရဲ့ တိုက်လေယာဉ် အနီးကပ်ပျံဝဲမှုကြောင့် ကလေးငယ်တွေ ထိတ်လန့်ပြီး ကျောင်းမတက်တော့တဲ့အတွက်‌ ကျောင်းပိတ်ထားရတယ်လို့ ဆရာမတဦးက ပြောပါတယ်။

ဖယ်ခုံမြို့နယ်နဲ့၊ ဒီးမော့ဆိုမြို့နယ်တွေမှာ မနေ့က တနေ့တည်းမှာ စစ်ကောင်စီရဲ့ တိုက်လေယာဉ် ၄ ကြိမ်တိတိ ပျံဝဲခဲ့တာလို့  ဆရာမက ပြောပါတယ်။

“မနေ့က လေယာဉ်လာတော့ ကလေးတွေက တချို့ကငိုတယ်။ တချို့က ဘုရားရှိခိုးတာပေါ့နော်။ လန့်လည်း လန့်ကုန်တဲ့အခါကျတော့ လေယာဉ်လာဝဲပြီး ပြန်သွားတဲ့အခါကျတော့ အိမ်ပြေးပြန်ကြတာလေ။ အဲဒီကနေစပြီးတော့ ကျောင်းပိတ်တာ။ ဒီနေ့လည်းပိတ်လိုက်တယ်။”

ခဏခဏ လာဝဲတဲ့အတွက် ဘယ်အချိန် ဗုံးအကြဲခံနေရမလဲဆိုပြီး စိုးရိမ်နေကြရတယ်လို့လည်း အဲဒီဆရာမက ဆက်ပြောပါတယ်။

“ခဏခဏတော့ လာဝဲနေတယ်။ ဘယ်အချိန်ကြဲမလဲမသိဘူး။ လန့်နေရတာ။ သူတို့ပျံတာ နိမ့်နိမ့်လေးပဲလေ။”

မနေ့က ဇန်နဝါရီ ၁၀ ရက် မနက် ၉ နာရီဝန်းကျင်က နေပြည်တော်ကနေ စစ်ကော်စီတိုက်လေယာဉ် ၄ စီး ထွက်ခွာခဲ့ပြီးနောက်မှာတော့ ကရင်နီပြည်နယ်မှာ တိုက်လေယာဉ် အနီးကပ်ပျံသန်းမှုတွေ လုပ်ခဲ့တာပါ။

မနေ့က လေယာဉ်ပျံဝဲချိန်မှာလည်း ကလေးငယ်တွေ အပါအဝင် ဒေသခံတွေက ဗုံးကြဲခံရမှာ ကြောက်လန့်ပြီး ပုန်းအောင်းခဲ့ကြရပါတယ်။

အလားတူပဲ ချင်းပြည်နယ်က ချင်းအမျိုးသားတပ်ဦး (CNF) ဌာနချုပ်၊ ဗစ်တိုးရီးယားစခန်းကို ဇန်နဝါရီ ၁၀ ရက် ညနေ ၄ နာရီခွဲလောက်မှာ စစ်​ကောင်စီတပ်က လေကြောင်းကနေ ဗုံးကြဲတိုက်ခိုက်လို့ CNF တပ်ဦး တပ်ဖွဲ့ဝင် ၅ ဦး သေဆုံးခဲ့ရပြီး အိမ်ရာအဆောက်အဦတွေလည်း ထိခိုက်ပျက်စီးသွားခဲ့ပါတယ်။အာဏာသိမ်းစစ်ကောင်စီက ထာဝရငြိမ်းချမ်းရေးအတွက်ဆိုပြီး  ၂၀၂၃ ခု ဇန်နဝါရီ ၁ ရက်ကနေ ဒီဇင်ဘာ ၃၁ ရက်အထိ စစ်ရေးဆိုင်ရာလှုပ်ရှားမှုတွေ ရပ်စဲကြောင်း ကြေညာခဲ့ပေမဲ့ တိုင်းရင်းသားဒေသအသီးသီးတွေမှာ ဇန်နဝါရီ ၁ ရက်ကစပြီး တိုက်ပွဲတွေ ဖြစ်ပွားနေသလို စစ်ကောင်စီတပ်က လေကြောင်းအသုံးပြုပြီး တိုက်ခိုက်မှုတွေ နေ့စဉ်နဲ့အမျှ လုပ်ဆောင်နေပါတယ်။

3 weeks Ago

January 10, 2023

ဖယ်ခုံတွင် တိုက်လေယာဉ်ပျံဝဲလာသဖြင့် ဒေသခံ ကလေးငယ်များ ပုန်းအောင်းနေရ

ရှမ်းပြည်နယ်(တောင်ပိုင်း) ဖယ်ခုံမြို့နယ်မှာ ဇန်နဝါရီ ၁၀ ရက် ဒီကနေ့ မနက်က စစ်ကောင်စီ တိုက်လေယာဉ် ပျံဝဲလာတာကြောင့်  ကလေးငယ်တွေအပါအဝင် ဒေသခံတွေ ဗုံးကြဲခံရမှာ ကြောက်လန့်ပြီး ပုန်းအောင်းနေကြရပါတယ်။

ဖယ်ခုံမြို့နယ်၊ လအိဒေသမှာရှိတဲ့ စစ်ဘေးရှောင်တွေနေထိုင်ရာနေရာအနီး ဒီမနက် ၈ နာရီ ၄၀ လောက်ကနေ ၉ နာရီ မိနစ် ၂၀ လောက်အထိ တိုက်လေယာဉ်တွေ အနီးကပ်ပျံဝဲခဲ့တာလို့ ဒေသခံတဦးကပြောပါတယ်။

“ကြောက်လို့ ပုန်းနေကြတာပါ။ လေယာဥ်က အသံအကြီးအကျယ်ကြီးနဲ့မို့ နိမ့်ဆင်းလိုက် ပြန်တက်လိုက် နာရီဝက်ကြာလုပ်နေတာ။ ပစ်ခတ်တာ မရှိဘူး။ လာခြိမ်းခြောက်တာမျိုးလားတော့မသိဘူး။”

လေယာဉ်တွေရောက်လာလို့ ဘုရားကျောင်းတခုမှာ ဘုရားစာစုသင်နေတဲ့ကလေးငယ်တွေက  ကျောင်းအောက်ကို ပြေးပြီး ပုန်းအောင်ခဲ့ရကြောင်းလည်း အဲဒီနေရာမှာ ရှိနေတဲ့ ဒေသခံက ပြောပါတယ်။

ဒီနေ့မနက် ၉ နာရီဝန်းကျင်က  နေပြည်တော်ကနေ စစ်ကောင်စီ တိုက်လေယာဉ် ၄ စီး ထွက်ခွာသွားတယ်လို့ ဒေသခံ မျက်မြင်တွေ့သူထံက သိရပါတယ်။

စစ်ကောင်စီအနေနဲ့ တိုက်လေယာဉ် အနီးကပ်ပျံသန်းမှုကို မကြာခဏလုပ်လေ့ရှိတယ်လို့ ဒီးမော့ဆိုမြို့နယ်က ပြည်သူတွေလည်း ပြောဆိုပါတယ်။

မနေ့ ဇန်နဝါရီလ ၉ ရက်နေ့ကလည်း တိုက်လေယာဉ်တစင်း ကရင်ပြည်နယ် ကြာအင်းဆိပ်ကြီးမြိုနယ်မှာ ဝဲပျံပြီး ခြိမ်းခြောက်ခဲ့တယ်လို့ ဒေသခံတွေက ပြောပါတယ်။

3 weeks Ago
More News
Up