ဖမ်းမိ

August 29, 2022

မဲဆောက်တွင် စစ်ကောင်စီ စေလွှတ်ထားသည့် ဘုန်းကြီး ၊ သီလရှင် အပါအဝင် တရားမဝင် မြန်မာ ၃၈ ဦး ဖမ်းဆီးရမိ

ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မြို့မှာ  တော်လှန်ရေးအဖွဲ့အစည်းတွေရဲ့ လှုပ်ရှားမှုတွေကို စုံစမ်းထောက်လှမ်းဖို့ စစ်ကောင်စီက စေလွှတ်ထားတဲ့  ဘုန်းကြီး ၊ သီလရှင် အပါအဝင် တရားမဝင် မြန်မာ ၃၈ ဦး ဖမ်းဆီးရမိတယ်လို့ မဒီချွန်းထိုင်းသတင်းမှာ ဖော်ပြပါတယ်။

မဲဆောက်မြို့နယ်အုပ်ချုပ်ရေးဌာန၊ မြို့နယ်ရဲတပ်ဖွဲ့၊ အရန်ပြည်သူ့လုံခြုံရေးတပ်ဖွဲ့က တာဝန်ရှိသူတွေဟာ ဩဂုတ် ၂၉ ရက်  ဒီနေ့မှာ မယ်ပအုပ်စု၊ မယ်ပတိုက်ရပ်ကွက်၊ ဟွေ့ကလို့ လမ်းကြားထဲရှိ ၃ ထပ်တိုက် ၁ လုံးကို သွားရောက်စစ်ဆေးဖမ်းဆီးခဲ့တာလို့ ဆိုပါတယ်။ 

အဆိုပါတိုက်အိမ်ဟာ အရင်တုန်းက  ကိုဗစ်-၁၉  ကာလ ကွာရန်တင်းစင်တာအဖြစ် အသုံးပြုခဲ့ကြောင်း ၊ ခုနောက်ပိုင်းမှာတော့ မြန်မာတွေကို ငှားရမ်းထားဖြစ်ပါတယ်။

အဆိုပါတိုက်အိမ်ထဲမှာ ဘုန်းကြီး ၊ သီလရှင်အပါအဝင် မြန်မာနိုင်ငံသားတွေ နေထိုင်ကြပြီး ၃၈ ယောက်ဟာ တရားဝင်နေထိုင်ခွင့် အထောက်အထားမရှိတာကြောင့်  လိုအပ်သလို အရေးယူဖို့ တာ့ခ်ခရိုင်လဝက ရဲတပ်ဖွဲ့ကို ဆက်လက်ပို့ဆောင်လိုက်တယ်လို့ ဆိုပါတယ်။

ဘုန်းကြီးနဲ့ သီလရှင်တွေထဲက တချို့ဟာ တော်လှန်ရေးအဖွဲ့အစည်းတွေရဲ့ လှုပ်ရှားမှုတွေကို စုံစမ်းထောက်လှမ်းဖို့ စစ်ကောင်စီကစေလွှတ်လိုက်တာဖြစ်ကြီး တချို့ကဘန်ကောက်ကို ဆက်သွားဖို့ရှိ နေတယ်လို့  ထိုင်းသတင်းမှာဖော်ပြပါတယ်။

အခုဖမ်းဆီးရမိသူတွေကတချို့ဟာ စစ်ကောင်စီက စေလွှတ်ထားတာ ဟုတ်မဟုတ် ဘယ်လို သိရတယ်ဆိုတာကိုတော့ ထိုင်းသတင်းမှာအသေးစိတ်  ရေးသားဖော်ပြထားတာ မရှိသလို ဒီဗွီဘီအနေနဲ့ သီးခြား အတည်ပြုနိုင်ခြင်း မရှိပါဘူး။

မကြာသေးခင်လပိုင်းတွေမှာတော့ စစ်အာဏာရှင်ဆန့်ကျင်သူတွေရဲ့ သတင်းတွေကို စုံစမ်းထောက်လှမ်းဖို့  စစ်ကောင်စီက စေလွှတ်ထားသူတွေ မဲဆောက်မြို့မှာ ရောက်ရှိနေတယ်ဆိုတဲ့ သတင်းတွေ မြန်မာအသိုက်အဝန်းကြားမှာ ကျယ်ကျယ်ပြန့်ပြန့်ထွက်ပေါ်ခဲ့ဖူးပါတယ်။ 

Ref/ Photo- Matichon

5 months Ago

August 22, 2022

မြန်မာဘက်သို့ တရားမဝင်တင်သွင်းမည့် ကား ၂ စီးနှင့် ဆိုင်ကယ် ၁၃ စီး ဖမ်းဆီးရမိ

ထိုင်း-မြန်မာနယ်စပ် တာ့ခ်ခရိုင်၊ ထာ့ဆောင်ယန်းမြို့နယ်ထဲမှာ ဩဂုတ် ၂၂ ရက်က မြန်မာဘက်ခြမ်း ကို တရားမဝင် တင်သွင်းမယ့် ကား ၂ စီးနဲ့ ဆိုင်ကယ် ၁၃ စီး ဖမ်းဆီးရမိတယ်လို့ ထိုင်းတော်ဝင်စစ်တပ်က သတင်းထုတ်ပြန်ပါတယ်။ 

အမှတ် ၃၅၀၈ ရိန်းဂျားတပ်ခွဲမှ တပ်ဖွဲ့ဝင်တွေဟာ  ထာ့ဆောင်ယန်းမြို့နယ်၊ ဘန့်မိုင် ထိုင်းလုမ့်ယင်ကျေးရွာအုပ်စုက သောင်ရင်းမြစ်ကမ်းတလျှောက် လုံခြုံရေးယူနေစဉ် ဒီနေ့မနက် စောစောက တောထဲမှာ လမ်းလျှောက်လာတဲ့ လူ ၆- ၇ ယောက်ကို တွေ့ရတာကြောင့်  စစ်ဆေးဖို့ ရပ်ခိုင်းရာမှ တောထဲကို ထွက်ပြေးသွားခဲ့တယ်လို့ တာဝန်ရှိသူက ပြောပါတယ်။ 

အဲဒီနောက် အနီးနားတဝိုက် လိုက်လံရှာဖွေစစ်ဆေးရာမှာ နံပတ်ပြား မရှိဘဲ သစ်လွင်နေတဲ့ မီးခိုးရောင် တိုယိုတာဟိုင်းလပ်ကား ၁ စီး၊ တံခါး ၄ ဘက်ပါ အဖြူရောင်အီစူဇူးကား ၁ စီးနဲ့အတူ မသင်္ကာသူ တယောက်ကို တွေ့ရှိ ဖမ်းဆီးရမိခဲ့ပြီး စစ်ဆေးခဲ့တယ်လို့ ဆိုပါတယ်။ 

စစ်ဆေးဖော်ထုတ်ချက်အရ သောင်ရင်းမြစ်ကမ်းနားက တောထဲမှာ ဝှက်ထားတဲ့  မော်တော် ဆိုင်ကယ် ၁၃ စီးကို ထပ်မံ တွေ့ရှိရပြီး ဆိုင်ကယ်နဲ့ပတ်သက်တဲ့ စာရွက်စာတမ်း အထောက်အထား တစုံတရာ မပြနိုင်ဘူးလို့ တာဝန်ရှိသူက ပြောပါတယ်။

ဆိုင်ကယ်နဲ့ကားတွေ လက်ဝယ်တွေ့ရှိ ဖမ်းဆီးရမိသူကို ဆက်လက်အရေးယူဖို့ စစ်တပ်က မဲ့မွေးနယ်မြေရဲစခန်းကို ပို့ထားတယ်လို့ တာဝန်ရှိသူတွေရဲ့စကားကို  ကိုးကားပြီး  Royal Thai Army လူမှုကွန်ရက်က ဖော်ပြပါတယ်။ 

5 months Ago
More News
Up