ဖမ်းဆီးခံရသူများ

February 2, 2022

ကနီမြို့နယ်၌ မိုင်းပေါက်ကွဲသဖြင့် ၁ ဦး သေဆုံး၊ စစ်တပ်ဖမ်းသွားသူ ၇ ဦးအနက် ၂ ဦးအလောင်း ပြန်တွေ့

စစ်ကိုင်းတိုင်း၊ ကနီမြိုနယ်၊ ကင်းစံပြကျေးရွာမှာ ဖေဖော်ဝါရီ ၁ ရက်နေ့ မနက် ၇ နာရီလောက်က စစ်‌ကောင်စီတပ်ထောင်ထားတဲ့ မိုင်းပေါက်ကွဲတာကြောင့် အမျိုးသမီးတစ်ဦး သေဆုံးခဲ့တယ်လို့ ဒေသခံတွေက ပြောပါတယ်။

ကင်းစံပြကျေးရွာကို စစ်ကောင်စီတပ်က ဇန်နဝါရီ ၂၉ ရက်နေ့က ဝင်ရောက်စီးနင်း တပ်စွဲခဲ့တာကြောင့် ကျေးရွာသားတွေ ဘေးလွတ်ရာကို ထွက်ပြေးခဲ့ရပါတယ်။ ဒီနောက် စစ်ကောင်စီတပ် ကျေးရွာအတွင်းကနေ ပြန်ထွက်သွားချိန် နေအိမ်ပြန်နေစဉ်မှာ မိုင်းပေါက်ကွဲခဲ့တာလို့ သိရပါတယ်။

သေဆုံးအမျိုးသမီးရဲ့ အစ်ကိုဖြစ်သူက “သေဆုံးသူက ကျနော့်ညီမဝမ်းကွဲပါ။ အမည်က မနန်းဝေမာပါ။ အသက်က ၃၉ နှစ်ပါဗျ။ အိမ်ထောင်သည်ပါ။ ကလေးသုံးဦးရဲ့မိခင်ပါ။ ဒီ စစ် (-) တွေ မိန်းမလို မိန်မရှာလုပ်ရပ်တွေ လုပ်သွားကြတာ။ မီးဖိုချောင်အတွင်းက ကြောင်အိမ်မှာ မိုင်းထောင်ထားခဲ့ကြတာ။ သူတို့ပြန်သွားလို့ ကိုယ်အိမ်ကိုပြန်နေရင်း ဒီကောင်တွေထောင်ခဲ့တဲ့ မိုင်းပေါက်ကွဲပြီး ကျနော့်ညီမသေရတာ။ ဒီကောင်တွေအပေါ် ကျနော်တို့ တသက်မကျေနပ်ဘူး” လို့ ပြောပါတယ်။

ကနီမြိုနယ်၊ ကင်းစံပြကျေးရွာကို ပြီးခဲ့တဲ့ ဇန်နဝါရီ ၂၉ ရက်နေ့က ဝင်ရောက်တပ်စွဲခဲ့တဲ့ စစ်ကောင်စီတပ်ဟာ အပြစ်မဲ့ ပြည်သူ ၇ ဦးကိုလည်း ဇန်နဝါရီ ၃၁ ရက်နေ့က ဖမ်းဆီးသွားတယ်လို့ ဒေသခံတွေက ပြောပါတယ်။

ဖေဖော်ဝါရီ ၁ ရက်နေ့ ညနေပိုင်းမှာတော့ အသက် ၅၂ နှစ်အရွယ် ဦးစန်းအောင်ရဲ့ အလောင်းကို ရင်ဘတ်မှာ ဓားထိုးဒဏ်ရာနဲ့ သေဆုံးလျက်တွေ့ရပြီး ဒီကနေ့မှာတော့ အသက် ၂၅ နှစ်အရွယ် ကိုဆင်ပေါက်ရဲ့ အလောင်းကို လည်ပင်းဓားခုတ်ဒဏ်ရာနဲ့ ကမ်းစပ်တနေရာမှာ ပြန်တွေ့ရတယ်လို့ မျက်မြင်တွေ့သူတယောက်က ပြောပါတယ်။ 

နောက်ထပ်တယောက်ကိုတော့ ပြည်သူ့ကာကွယ်ရေးအဖွဲ့ဝင်တွေက အသက်ရှင်လျက် ရေကန်ထဲက ကယ်ဆယ်နိုင်ခဲ့ပြီး ကျန် ၄ ယောက်ကတော့ ဘာသတင်းမှ မရသေးဘူးလို့ တပ်ဖွဲ့ဝင်တယောက်က ပြောပါတယ်။

10 months Ago

December 1, 2021

နတ်မောက်မြို့ ၌ ဖမ်းဆီးခံထားရသူများကို မိသားစုဝင်များ အဆက်အသွယ်မရဖြစ်နေ

မကွေးတိုင်း၊ နတ်မောက်မြို့နယ်မှာ ပြီးခဲ့တဲ့ နိုဝင်ဘာလကုန်ပိုင်းရက်တွေက စစ်ကောင်စီ တပ်ဖွဲ့ဝင်တွေဟာ ဒေသခံပြည်သူတွေရဲ့ နေအိမ်တွေကို ညအချိန်မတော် ဝင်ရောက်ရှာဖွေ ဖမ်းဆီးတာတွေ ပြုလုပ်နေတယ်လို့ ဒေသခံတွေဆီက သိရပါတယ်။

ဒေသခံတဦးက “အခုတလော မြို့နယ်အတွင်းမှာ စစ်ကောင်စီတပ်သားတွေ တော်တော်လေး သောင်းကျန်းနေတယ်။ ဗိုလ်ချုပ်အောင်ဆန်းရဲ့မြို့ဖြစ်နေလို့ ပိုဖိနေတာလား မသိပါဘူးဗျာ” လို့ ပြောပါတယ်။

ပြီးခဲ့တဲ့ နိုဝင်ဘာလ ၂၅ ရက်နေ့ညပိုင်းက မိသားစုလိုက် ဖမ်းဆီးခံရတဲ့ ကိုဇင်လင်းထွန်းဇနီးဖြစ်သူ မဝေဝေနှင်းနဲ့ သားဖြစ်သူ ၁၉ နှစ်အရွယ် မောင်သူရိန်ဦးတို့ကို ဖမ်းဆီးခံရပြီးကတည်းက ဒီနေ့ချိန်အထိ အဆက်အသွယ်မရဘူးလို့ ဆွေမျိုးတဦးက ပြောပါတယ်။

“သူတို့ဖမ်းခံရပြီးကတည်းက ဘယ်မှာထားတယ်ဆိုတာကို အခုအချိန်အထိမသိရသေးဘူး။ ဆွေမျိုးမွေးချင်းအသိုင်းအဝိုင်းနဲ့ မြို့နေပြည်သူများက စိုးရိမ်ပူပန်နေကြတယ်။ သူတို့မိသားစုက နတ်မောက်အတွက် ကျရာအခန်းကဏ္ဍကနေ အင်တိုက်အားတိုက် တက်တက်ကြွကြွနဲ့ ပူးပေါင်းပါဝင်လုပ်ဆောင်ပေးတဲ့ မိသားစုလေးဖြစ်ပါတယ်။ ဒါ့ကြောင့် သူတို့မိသားစုလေးလည်း အမြန်လွတ်မြောက်စေချင်တယ်။”

နတ်မောက်မြို့နယ်၊ ဖလန်ပင် ကျေးရွာက ကိုမိုးဇော်ဌေးကိုလည်း စစ်ကောင်စီတပ်ဖွဲ့ဝင်တွေက နိုဝင်ဘာ ၂၇ ရက် နေ့ညပိုင်းက နေအိမ်ကိုဝိုင်းပြီး မျက်နှာကို အဝတ်စည်း လက်ပြန်ကြိုးတုပ်ပြီး ဖမ်းဆီးသွားတယ်လို့ သိရပါတယ်။

မိသားစုနဲ့နီးစပ်သူတဦးက “ဒီနေ့အချိန်အထိ အဆက်အသွယ်မရသေးဘူး။ လာဖမ်းတုန်းကလည်း အိမ်အောက်ဈေးခြင်းတောင်းထဲက ငွေကျပ်သုံးသောင်းလည်း ပျောက်ဆုံးသွားတယ်။ ကိုမိုးဇော်ဌေးက ရပ်ရွာထဲမှာ ရိုးသားစွာနေထိုင်သူတစ်ယောက်ဖြစ်ပြီး ဘာ့ကြောင့် ဖမ်းခံရတယ်ဆိုတာကိုတော့ အသေးစိတ်စုံစမ်းနေတုန်းပဲ၊ အခုသူ့ကို ဘယ်မှာချူပ်ထားလည်းဆိုတာ မသိရသေးဘူး” လို့ ပြောပါတယ်။

နတ်မောက်မြို့နယ်၊ တွင်းကြီးကျေးရွာနေထိုင်တဲ့ ဒေသခံအပြစ်မဲ့ပြည်သူ ၃ ဦးနဲ့ CDM ကျောင်းဆရာ ၁ ဦးတို့ကိုလည်း စစ်ကောင်စီတပ်သားတွေက နိုဝင်ဘာ ၂၇ ရက်နေ့မှာ နေအိမ်တွေကနေ ရိုက်နှက်ဖမ်းဆီးသွားပါတယ်။

နိုဝင်ဘာ ၂၉ ရက်နေ့ညကလည်း နတ်မောက်မြို့နယ်၊ တံခွန်တိုင်ကျေးရွာမှာနေထိုင်တဲ့ အသက် ၅၀ အရွယ် ဒေါ်မြမြဝင်းကို အကြမ်းဖက်ရိုက်နှက်ဖမ်းဆီးသွားပြီး နေအိမ်အတွင်းက ပစ္စည်းတွေကိုလည်း ဖျက်ဆီးသွားတယ်လို့ သိရပါတယ်။

ဒလန်တွေရဲ့ မမှန်မကန်သတင်းပေးမှုတွေကြောင့် အခုလို အပြစ်မဲ့ပြည်သူတွေ နစ်နာနေကြရတာလို့ ဒေသခံတွေက သုံးသပ်ပြောဆိုနေကြပါတယ်။

နတ်မောက်မြို့နယ်က ရပ်/ကျေးအုပ်ချုပ်ရေးမှူးတွေကို နိုဝင်ဘာ ၁၄ ရက်နေ့ နောက်ဆုံးထား နုတ်ထွက်ဖို့ ဗိဿနိုးပြည်သူ့ကာကွယ်ရေးတပ်မတော်က သတိပေးထားပေမယ့် အချို့အုပ်ချုပ်ရေးမှူးတွေဟာ နုတ်ထွက်ဟန်ပြပြီး စစ်ကောင်စီသတင်း ပေး ဒလန်လုပ်နေသူတွေ ရှိတယ်လို့ ဒေသခံတွေဆီက သိရပါတယ်။

1 year Ago
More News
Up