ဖမ်းဆီးခေါ်ဆောင်ခံရသည့်

January 12, 2020

ဖမ်းဆီးခေါ်ဆောင်ခံရသည့် လမ်းခင်းလုပ်သား ၃ ဦးထဲမှ ၂ ဦး ပြန်လွတ်လာ

ကျောက်ဖြူမြို့နယ်မှာ အမည်မသိ လူတစုရဲ့ ဖမ်းဆီးခေါ်ဆောင်ခံရတဲ့ လမ်းခင်းလုပ်သား ၃ ဦးထဲက ၂ ဦး ဒီနေ့ မနက် ၇ နာရီလောက်က ပြန်လည်လွတ်မြောက်လာပါတယ်။ ရခိုင်ပြည်နယ် ကျောက်ဖြူမြို့နယ် ကလန့်တဲကျေးရွာအုပ်စု၊ မူရင်းကျေးရွာနဲ့ ဇင်ချောင်းကျေးရွာကြား ဘောလန်တောင်ခြေအနီးမှာ ပြီးခဲ့တဲ့ ဒီဇင်ဘာ ၂၆ ရက်နေ့ ညနေက လမ်းခင်းရာမှ ပြန်လာတဲ့ ဦးစိုးငြိမ်း အပါအဝင် ၃ ဦးကို အမည်မသိလူတစုက  ဖမ်းဆီးခေါ်ဆောင်သွားတာပါ။ ဖမ်းဆီးခေါ်ဆောင်ခံရပြီး ၁၇ ရက်အကြာ ဇန်နဝါရီ ၁၂ ရက်နေ့မှာ ၂ ဦးကို ပြန်လွှတ်ပေးလိုက်ပေမယ့် ဦးစိုးငြိမ်းတော့ မပါဘူးလို့ သားဖြစ်သူ ကိုအောင်သူရက ပြောပါတယ်။ “ဘက်ဖိုးပိုင်ရှင် ဦးမောင်ဖိုးခင်ရယ်၊ မောင်ရန်နိုင်တို့ ၂ ဦးပါ၊ သူတို့ကို ခေါ်သွားကတည်းက ၃ ယောက်လုံးကို မျက်နှာဖုံးစွပ်ပြီးတော့ လူ လေး ငါးယောက်လောက်က ကားတစီးပေါ် ဖမ်းခေါ်သွားတယ်။ ပြီးရင် စက်လှေနဲ့ တခါခေါ်သွားပြီးတော့ တနေရာအရောက်မှာ ဦးစိုးငြိမ်းကို ချထားခဲ့တယ်၊ ပြီးတော့ စက်လှေနဲ့ ဆက်ခေါ်သွားပြီးတော့ တနေရာအရောက်မှာ မိုးကာနဲ့ မိုးထားတဲ့အဆောင်တခုမှာ တယောက် တနေရာစီ ခွဲပြီးတော့ထားတယ်၊ ထမင်းတော့ ကျွေးထားတယ်လို့ သူတို့က ပြောတယ်။ စက်လှေနဲ့ မျက်နှာဖုံးစွပ်ပြီးတော့ လုံးတော်ပေါက်တံတားနားကို လိုက်ပို့ပြီးတော့ ပြန်လွှတ်ပေးလိုက်တာပေါ့၊ သူတို့ကို ဦးစိုးငြိမ်း မပါဘူးလားလို့ မေးတော့ မျက်နှာဖုံး စွပ်ထားတဲ့အတွက် အတိအကျမသိဘူးလို့ပဲ ပြောတယ်။”  ပြန်လွတ်လာတဲ့ ကိုရန်နိုင်က “ဖမ်းတဲ့အချိန်မှာ လူ(၄/၅/၆)ယောက်လောက်တော့ ရှိမယ်၊ ဘယ်အဖွဲ့အစည်းမှန်း ဆိုတာလည်း အတိအကျ မပြောနိုင်ဘူး၊ အဖွဲ့အစည်းလား၊ ပုဂ္ဂလိကလားဆိုတာကိုတော့ မသိပါဘူး။ စက်လှေနဲ့ ပြန်ခေါ်လာပြီးတော့ လုံးတော်ပေါက်တံတားနားမှာ ချပေးထားခဲ့တယ်၊ ဖမ်းသွားတုန်းကတော့ ၃ ယောက်ပေါ့၊ အခုကတော့ ကျနော်ရယ်၊ ဦးမောင်ဖိုးခင်ရ‌ယ် ၂ ယောက်ကို ပြန်လွှတ်ပေးလိုက်တာပါ။ မျက်နှာကို စွပ်ထားတဲ့အတွက် အတိအကျမသိဘူး” လို့ ပြောပါတယ်။ ဇင်ချောင်းရဲကင်းစခန်းမှူး ရဲအုပ် အောင်ဇော်မင်းက “၂ ယောက် ပြန်လွတ်လာတာပါ။ သူတို့ ပြောတာတော့ အခုမနက် ၇ နာရီလောက်ကပေါ့၊ သူတို့ ဒီကိုပြန်ရောက်တာတော့ ၁၁ နာရီလောက်ဖြစ်မယ်၊ လူ လေး ငါး ခြောက်ယောက်လောက်က ဝိုင်းပြီးတော့ ဖမ်းသွားတယ် ဆိုတာလောက်ပဲ သိရသေးတယ်၊ ကျန်တာတော့ သူတို့ကို အတိအကျ မစစ်ရသေးဘူး၊ လက်ရှိကတော့ လူပျောက်နဲ့ပဲ ဖွင့်ထားသေးတယ်” လို့ ပြောပါတယ်။ ဖမ်းဆီးခေါ်ဆောင်သွားသူတွေက အခုလို ၂ ဦးသာ ပြန်လွှတ်ပေးခဲ့တာကြောင့် ဦးစိုးငြိမ်း အသက်အန္တရာယ်ဖြစ်မှာကို မိသားစုဝင်တွေမှာ စိုးရိမ်နေကြပါတယ်။ နောင်နောင်
2 years Ago

November 16, 2019

ဖမ်းဆီးခေါ်ဆောင်ခံရသည့် သလူမော်ရွာသား ၂ ဦးနှင့်အဆက်အသွယ်မရသဖြင့် မိသားစု စိုးရိမ်

တပ်မတော်စစ်ကြောင်းတခုက ဖမ်းဆီးခေါ်ဆောင်သွားတဲ့ ရခိုင်ပြည်နယ် အမ်းမြို့နယ် ကဏန်းပြင်ကျေးရွာအုပ်စု သလူမော်ကျေးရွာက ဒေသခံ နှစ်ဦးနဲ့ အဆက်အသွယ်မရတာကြောင့် မိသားစုဝင်တွေ စိုးရိမ်နေကြတယ်လို့ ကဏန်းပြင်ကျေးရွာအုပ်စုအုပ်ချုပ်ရေးမှူး ဦးခင်မောင်ဝင်းက ပြောပါတယ်။ သလူမော်ရွာကနေ တတ်တောင်မြို့ကို အိမ်ဆောက်ဖို့သွားတဲ့ ဦးသိန်းကျော်ထွန်းပါ နှစ်ဦးကို လွန်ခဲ့တဲ့ ၁၁ ရက်က ရေပုတ်ရွာမှာ စခန်းချနေတဲ့ တပ်မတော်စစ်ကြောင်းတခုက ဖမ်းဆီးသွားတာလို့ ဆိုပါတယ်။ “ဦးသိန်းကျော်ထွန်းနဲ့ ကိုဦးသန်း ဆိုတဲ့ နှစ်ယောက်ပေါ့။ ရွာက စက်လှေနဲ့ သွားတယ်။ မြိုင်ဆိုက်မှာ ဆင်းပြီးတော့ ဆိုင်ကယ်နဲ့ တတ်တောင်ကို သွားတဲ့အချိန်မှာ ရေပုတ်ရွာက ဖြတ်ပြီးတော့ သွားရတယ်။ အဲဒီရွာ လမ်းဘေးမှာရှိတဲ့ ဘုရားကြီးတောင်ပေါ်မှာ တပ်မတော်စစ်ကြောင်းက စခန်းချထားလေ့ရှိတယ်။ သူတို့က လာတဲ့ဆိုင်ကယ်တွေကို တားပြီး စစ်ဆေးတယ်၊ မသင်္ကာတဲ့လူတွေကို ဖမ်းထားလိုက်တယ်။ အဲဒါအခုအချိန်ထိ သေသလား၊ ရှင်သလားဆိုတာ မသိရဘူး” ဦးခင်မောင်ဝင်းက ပြောပါတယ်။ “အခုချိန်ထိ ဘယ်မှာ ရှိလဲဆိုတာကို မသိရသေးဘူး၊ အရမ်းစိုးရိမ်နေရတာပေါ့” လို့ ဖမ်းဆီးခံရတဲ့ ဦးသိန်းကျော်ထွန်းရဲ့ဇနီး ကလေး နှစ်ယောက်အမေ ဒေါ်ချစ်ချစ်ဇော်က ပြောပါတယ်။ ဦးသိန်းကျော်ထွန်းပါ နှစ်ဦး ဖမ်းဆီးခံရတဲ့ကိစ္စနဲ့ပတ်သက်ပြီး အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက “အဲဒါတော့ ကျနော် မကြားသေးဘူးခင်ဗျ။ မစိုးရိမ်ပါနဲ့ဗျာ၊ တပ်မတော်က လိုအပ်လို့ ခေါ်ယူစစ်ဆေးတယ်ဆိုလည်း ဘာမှအသက်အန္တရာယ် မဖြစ်ပါဘူး” လို့ ဒီဗွီဘီကို ပြောပါတယ်။ ရခိုင်ပြည်နယ်မှာ မြန်မာ့တပ်မတော်နဲ့ ရက္ခိုင်တပ်မတော်တို့ တိုက်ပွဲဖြစ်နေတာ တနှစ်နီးပါး ကြာမြင့်လာချိန် အပြစ်မဲ့ အရပ်သား သေဆုံးမှုတွေ၊ မသင်္ကာမှုကြောင့် ဖမ်းဆီးခံရတာတွေ၊ ဖမ်းဆီးခံရပြီး စစ်ဆေးနေစဉ်အတွင်း သေဆုံးတာတွေဟာ တနေ့ထက်တနေ့ တိုးလာနေသလို ရွာလုံးကျွတ် ထွက်ပြေးတိမ်းရှောင်လာကြတဲ့အတွက် စစ်ဘေးရှောင်စခန်းတွေမှာ စစ်ဘေးရှောင် ဦးရေဟာလည်း တနေ့ထက်တနေ့ တိုးလာနေပါတယ်။ နောင်နောင်
2 years Ago
Up