ပြန်လွှတ်ပေးရန်

November 15, 2021

အမေရိကန်ဂျာနယ်လစ် ဒန်နီဖှန်စတာကို စစ်ကောင်စီက ပြန်လွှတ်ပေး

ထောင်ဒဏ် ၁၁ နှစ် ချမှတ်ခံထားရတဲ့ အမေရိကန် ဂျာနယ်လစ် ဒန်နီဖှန်စတာကို စစ်ကောင်စီက ဒီကနေ့ နိုဝင်ဘာ ၁၅ ရက်မှာ ပြန်လွှတ်ပေးလိုက်တယ်လို့ အေဂျင်စီသတင်းတွေမှာဖော်ပြပါတယ်။ 

ဖမ်းဆီးခံ အမေရိကန် သတင်းထောက်ဟာ အကျဉ်းထောင်ကနေ ပြန်လွတ်လာပြီး မကြာခင်မှာ လေယာဉ်နဲ့ အိမ်ပြန်လာတော့မယ်လို့ ကုလသမဂ္ဂဆိုင်ရာ အမေရိကန် သံအမတ်ဟောင်း ဘီလ်ရစ်ချတ်ဆန်ကို ကိုးကားပြီး အေပီသတင်းမှာရေးပါတယ်။ 

အင်းစိန်ထောင်မှာ ၅လကျော်ကြာ ဖမ်းဆီးထိန်းသိမ်းထားတဲ့ Frontier Myanamr ရဲ့အုပ်ချုပ်မှုအယ်ဒီတာ ဒန်နီဖှန်စတာကို ဒီနေ့နေ့လယ်ပိုင်းက ပြည်နှင်ဒဏ်ပေးပြီး ရန်ကုန်လေဆိပ်ကနေ ကာတာလေဆိပ်ကို ပို့ဆောင်ပေးမယ်လို့ ဘီလ်ရစ်ချတ်ဆန်စင်တာရဲ့ ထုတ်ပြန်ချက်မှာ ပါရှိပါတယ်။

နစ်ကေးအေရှ ဂျပန်သတင်းမှာလည်း ဒန်နီဖှန်စတာ ဒီကနေ့ညနေ ပြန်လွတ်လာမှာဖြစ်တယ်လို့ စစ်တပ် သတင်းရင်းမြစ်ကို ကိုးကားပြီးဖော်ပြထားပါတယ်။ 

ဒန်နီဖှန်စတာကို အင်းစိန်ထောင်တွင်းတရားရုံးကနေ  နိုဝင်ဘာ ၁၂ ရက် မနက်က မှ ရာသတ်ကြီးဥပဒေပုဒ်မ ၅၀၅ (က) နဲ့ ထောင်ဒဏ် ၃ နှစ်၊ မတရားသင်းဆက်သွယ်မှု ဥပဒေ ပုဒ်မ ၁၇ (၁) နဲ့ ထောင်ဒဏ် ၃ နှစ်၊  လ၀ကအမှု အတွက် ထောင်ဒဏ်  ၅ နှစ်နဲ့  ဒဏ်ငွေကျပ် ၁ သိန်း၊  စုစုပေါင်း ထောင်ဒဏ် ၁၁ နှစ်နဲ့ ငွေဒဏ် ကျပ် ၁ သိန်း ချမှတ်ခဲ့တာပါ။

ဒီစွဲချက်တွေအားလုံးဟာ စစ်အာဏာသိမ်းပြီးနောက် ပိတ်သိမ်းခံရတဲ့  Myanmar Now သတင်းဌာနမှာ အလုပ်လုပ်ခဲ့တယ်ဆိုတဲ့ စွပ်စွဲချက်နဲ့ အပြစ်ရှိတယ်ဆိုပြီး အမိန့်ချခဲ့တာဖြစ်ပါတယ်။

Frontier Myanmar မဂ္ဂဇင်းရဲ့ ထုတ်ပြန်ချက်မှာတော့ ဒန်နီဖှန်စတာဟာ ပြီးခဲ့တဲ့ ၂၀၂၀ ပြည့်နှစ်၊ ဇူလိုင်လကတည်းက Myanmar Now ကနေ နုတ်ထွက်ခဲ့ပြီး နောက်လမှာ Frontier မှာ အလုပ်ဝင်ရောက်ခဲ့ကာ သူအဖမ်းခံရချိန်မှာ Frontier နဲ့ ကိုးလကျော် အလုပ် လုပ်ကိုင်ခဲ့ပြီး ဖြစ်တယ်လို့ ဆိုပါတယ်။

ဒန်နီဖှန်စတာဟာ ပြည်တွင်းအခြေစိုက် သတင်းဌာနတခုဖြစ်တဲ့ Frontier Myanmar မဂ္ဂဇင်းမှာ မန်နေဂျင်းအယ်ဒီတာ တာဝန်ထမ်းဆောင်နေစဉ်  ပြီးခဲ့တဲ့ မေလတုန်းက ရန်ကုန်အပြည်ပြည်ဆိုင်ရာ လေဆိပ်မှာ ဖမ်းဆီးခံခဲ့ရတာ ဖြစ်ပါတယ်။

မကြာသေးခင်သီတင်းပတ်က ကုလသမဂ္ဂဆိုင်ရာ အမေရိကန် သံအမတ်ဟောင်းလည်းဖြစ် နယူးမက္ကဆီကိုပြည်နယ် အုပ်ချုပ်ရေးမှူးဟောင်းလည်းဖြစ်တဲ့  ဘီလ်ရစ်ချတ်ဆန်ဟာ လူသားချင်းစာနာမှု အကူအညီပေးရေး ပုဂ္ဂလိကခရီးစဉ်အနေနဲ့ မြန်မာနိုင်ငံကိုသွားရောက်ပြီး စစ်ခေါင်းဆောင်နဲ့တွေ့ဆုံခဲ့ပါတယ်။

မြန်မာနိုင်ငံမှာ အကြမ်းဖက်စစ်ကောင်စီရဲ့ မတရားစစ်အာဏာသိမ်းမှု ၉ လကျော်အကြာ ရှိလာခဲ့ချိန်မှာ ရဲနဲ့ စစ်တပ်အင်အားစုတွေရဲ့ ပစ်မှတ်ထား အကြမ်းဖက်ဖြိုခွင်းမှုကြောင့် အရပ်ဘက်လူမှုအဖွဲ့အစည်းတွေ၊ သတင်းသမားတွေ၊ အရပ်သားပြည်သူတွေ ထိခိုက်ဒဏ်ရာရရှိတာတွေ၊ ဖမ်းဆီးခေါ်ဆောင်တာတွေ၊ သေဆုံးမှုတွေလည်း ပိုမိုမြင့်တက်နေပါတယ်။

နယ်စည်းမခြား သတင်းထောက်များအဖွဲ့(RSF)တော့ လက်ရှိမြန်မာနိုင်ငံအကျဉ်း ထောင် တွေထဲမှာ ဖမ်းဆီးခံထားရတဲ့ သတင်းသမား အယောက် ၅၀ လောက် ရှိနေပြီလို့ ဆိုပါတယ်။

11 months Ago

August 12, 2021

ရုပ်ရှင်ဒါရိုက်တာ သိန်းဒန်ကို ပြန်လွှတ်ပေးရန် တောင်းဆို

ရန်ကုန် အင်းစိန်ထောင်မှာ နိုင်ငံရေးအကျဉ်းသားအဖြစ် ဖမ်းဆီးခံထားရတဲ့ မြန်မာရုပ်ရှင် ဒါရိုက်တာ သိန်းဒန်ကို အမြန်ဆုံးပြန်လွှတ်ပေးဖို့ ဂျပန်ရုပ်ရှင်လောက မိတ်ဆွေတွေက တောင်းဆိုပါတယ်။

အသက် ၃၇ နှစ်အရွယ် ဒါရိုက်တာသိန်းဒန်ဟာ ဂျပန်နိုင်ငံမှာ အမြဲတမ်းနေထိုင်ခွင့်ရနေသူဖြစ်ကာ ဖေဖော်ဝါရီလ အာဏာသိမ်းမှုရဲ့ စစ်တပ်ဆန့်ကျင်ရေး ဆန္ဒပြပွဲမြင်ကွင်းတွေကို ရိုက်ကူးခဲ့ပြီး ဆန္ဒပြ လူငယ်တွေနဲ့လည်း ရင်းရင်းနှီးနှီးရှိတာကြောင့် စစ်တပ်ရဲ့နှိမ်နင်းမှုမှာ ပစ်မှတ်ထားခံရတယ်လို့ ဆိုပါတယ်။

ဒါရိုက်တာသိန်းဒန်ဟာ ဧပြီလက အဖမ်းခံရပြီး ခိတဇုမိဆီကို ရိုက်ကူးထားတဲ့ ဗွီဒီယိုတွေ ရောင်းချပြီး ရရှိခဲ့တဲ့ငွေကြေး ဒေါ်လာ ၂၀၀၀ ကို အာဏာသိမ်းမှု ဆန့်ကျင်ရေး ဆန္ဒပြပွဲတွေကို ထောက်ပံ့တယ်ဆိုတဲ့ သံသယနဲ့ စွဲချက်တင်ခံရတယ်လို့ ဒါရိုက်တာ သိန်းဒန်ရဲ့မိတ်ဆွေ ဂျပန်သတင်းထောက် Yuki Kitazumi နဲ့ တခြားရင်းမြစ်တွေ ပြောကြားချက်အရ သိရပါတယ်။

ဧပြီ ၁၇ ရက်က ဂျပန်အရာရှိတွေ နေထိုင်တဲ့ ရန်ကုန်မြို့ရှိတိုက်ခန်းတစ်ခန်းကို စစ်သားတွေ နဲ့ ရဲတွေ ဝင်ရောက်စီးနင်းခဲ့ပြီး ဒါရိုက်တာသိန်းဒန်ကို ရှာဖွေခဲ့တယ်လို့ ဆိုပါတယ်။ 

အဲ့ဒီနေ့မှာပဲ ဒါရိုက်တာသိန်းဒန်ကို ရန်ကုန်က ဟိုတယ်တခုမှာ ဖမ်းဆီးခဲ့ကြောင်း၊ နောက်ရက်မှာ အဖမ်းခံခဲ့ရတဲ့ ဂျပန်ဂျာသတင်းထောက် Yuki Kitazumi နဲ့လည်း အကျဉ်းထောင်မှာ မေလက ပြန်ဆုံခဲ့ကြပါတယ်။ 

ဧပြီ ၁၈ ရက်ညပိုင်းက ရန်ကုန် ပုဇွန်တောင်မြို့နယ်  ရေကျော်လမ်းက နေအိမ်မှာ ဖမ်းဆီးခံခဲ့ရတဲ့ ဂျပန်သတင်းထောက် Yuki Kitazumi ကတော့ မေ ၁၄ ရက်နေ့မှာ ပြန်လွတ်လာခဲ့တာပါ။

ဒါရိုက်တာ သိန်းဒန်ဟာ ကျန်းမာရေးကောင်းမွန်ပုံရပြီး သူ့ကို စစ်တပ်အဆောက်အအုံတစ်ခုမှာ မဟုတ်မမှန် ရေးသားထားချက်အပေါ် လက်မှတ်ထိုးခိုင်းဖို့ နှိပ်စက်ခဲ့ကြောင်း Kitazumi ကို ပြောကြားခဲ့တယ်လို့ ဆိုပါတယ်။

တရားရင်ဆိုင်နေရတဲ့ ဒါရိုက်တာသိန်းဒန်ဟာ အမြင့်ဆုံးထောင်ဒဏ် ၃ နှစ်ကျခံရ နိုင်တယ်လို့လည်း ဆိုပါတယ်။ 

ဂျပန်နိုင်ငံခြားရေး၀န်ကြီးဌာနမှ တာဝန်ရှိသူတွေ ပြောတာကတော့ သူတို့ဟာ ဒီအမှုကို သတိ ပြုမိထားပြီး ဒါရိုက်တာ သိန်းဒန်အပါအဝင် အကျဉ်းသားတွေကို ပြန်လွှတ်ပေးဖို့ မြန်မာစစ်တပ်ကို တောင်းဆိုထားပါတယ်။ 

ဂျပန်ဒါရိုက်တာများအစည်းအရုံးက ဥက္ကဌ ယိုအိချိဇိုင်ရဲ့နာမည်နဲ့ ဇူလိုင် ၂၁ ရက်မှာ ထုတ် ပြန်ထားတဲ့ကြေညာချက်ထဲမှာ ဒါရိုက်တာ သိန်းဒန်ကို ချက်ချင်းလွှတ်ပေးဖို့ တောင်းဆိုခဲ့ပါတယ်။

1 year Ago
More News
Up