ပြန်လည်လွတ်မြောက်

January 25, 2022

ဖမ်းဆီးခံ Dawei Watch သတင်းဌာနက ၃ ဦး ပြန်လည်လွတ်မြောက်

တနင်္သာရီတိုင်းအခြေစိုက် Dawei Watch သတင်းဌာနက သတင်းထောက် ကိုဇော်၊ မမိုးမြင့်နဲ့ ဒီဇိုင်နာကိုသားကြီးတို ၃ ဦးကို စစ်တပ်က နေအိမ်အသီးသီးမှာ ဇန်နဝါရီ ၁၉ ရက်မနက်ပိုင်းက ဖမ်းဆီးသွားခဲ့ပြီးတဲ့နောက်  ဇန်နဝါရီ ၂၅ ရက် ဒီနေ့ မွန်းလွဲပိုင်းမှာ ပြန်လွှတ်ပေးလိုက်ပါတယ်။

အဲဒီလို Dawei Watch သတင်းဌာနက သတင်းထောက်တွေကို ပြန်လွတ်လာတာနဲ့ပတ်သက်လို့ Dawei Watch သတင်းဌာနကလည်း  သူ့ရဲ့ အွန်လိုင်းစာမျက်နှာမှာ တရားဝင် အတည့်ပြု ထုတ်ပြန်ထားပါတယ်။ 

ပြီးခဲ့တဲ့ ဇန်နဝါရီ ၁၉ ရက် မနက်အစောပိုင်းက နေအိမ်မှာ စစ်တပ်က လာရောက်ဖမ်းဆီးသွားတာဖြစ်ပြီး ထားဝယ်မြို့မရဲစခန်းမှာ ထားရှိကာ ၆ ရက်ကြာအောင် စစ်ဆေးမေးမြန်းမှုတွေပြုလုပ်ခဲ့တယ်လို့ လွတ်မြောက်လာခဲ့တဲ့ သတင်းထောက် ကိုဇော်က ပြောပါတယ်။ 

ဖမ်းဆီးပြီး စစ်ဆေးမေးမြန်းရာမှာ ညှဉ်းပန်းနှိပ်စက်တာမရှိဘဲ Dawei Watch သတင်းဌာနရဲ့ လုပ်ငန်းလည်ပတ်မှုအခြေအနေတွေကိုမေးမြန်းခဲ့တယ်လို့ ဆိုပါတယ်။ 

လတ်တလော Dawei Watch သတင်းဌာနက သုံးယောက်စလုံးပြန်လွတ်လာပေမဲ့  လိုအပ်ရင် ရဲစခန်းက ပြန်လည်ဆက်သွယ်ဦးမယ်လို့လည်း သိရပါတယ်။ 

Dawei Watch သတင်းဌာနဟာ ၂၀၁၂ ခုနှစ်တည်းက စတင်ကာ ဒေသတွင်းသတင်းတွေနဲ့ တခြားဒေသအသီးသီးက သတင်းတွေကို ရေးသားထုတ်ဝေနေတာ ဖြစ်ပါတယ်။

စစ်အာဏာသိမ်းပြီးနောက် တနင်္သာရီတိုင်းမှာ မြိတ်အခြေစိုက် DVB သတင်းထောက် ကိုအောင်ကျော်၊ Mizzima သတင်းဌာန အလွတ်တန်း သတင်းထောက် ကိုဇော်ဇော်၊ ထားဝယ်အခြေစိုက် Dakkina သတင်းဌာန သတင်းထောက် ကိုနိုင်လင်းထွန်းတို ဖမ်းဆီးခဲ့ရပြီး ပြန်လည်လွတ်မြောက်ခဲ့ပါတယ်။

Dawei Watch သတင်းဌာနက သတင်းထောက်တွေကတော့ ပထမဦးဆုံး ခေါ်ယူဖမ်းဆီးမေးမြန်းခံရတာဖြစ်ပါတယ်။

4 mins Ago

October 18, 2021

မိုးကုတ်ရေပူကျောင်းဆရာတော် ပြန်လည်လွတ်မြောက်

မိုးကုတ်မြို့မှာ စစ်အာဏာရှင်ဆန့်ကျင်ရေးလှုပ်ရှားမှုမှာ ပါဝင်တဲ့အတွက် ရာဇသတ်ကြီး ပုဒ်မ ၅၀၅ (ခ)နဲ့ တရားစွဲဆို ထောင်ချခံရတဲ့ မိုးကုတ်ရေပူကျောင်း ဆရာတော် အောက်တိုဘာ ၁၈ ရက် ဒီကနေ့ အိုးဘိုအကျဉ်းထောင်ကနေ ပြန်လည်လွတ်မြောက်လာပါတယ်။

မိုးကုတ်မြို့မှာ မတ်လ ၁၁ရက်နေ့က စစ်အာဏာရှင်အလိုမရှိကြောင်း ဆန္ဒပြသပိတ်ကို ဖြိုခွင်းခဲ့ပြီး ရေပူကျောင်း ဆရာတော်ကို ဖမ်းဆီးကာ ပုဒ်မ ၅၀၅ (ခ) နဲ့ ဧပြီလ ၉ ရက်နေ့က ထောင်ဒဏ် (၃) နှစ် အမိန့်ချခံခဲ့ရတာဖြစ်ပါတယ်။

ဒါ့အပြင် ရေပူကျောင်းဆရာတော်နဲ့အတူ ဖမ်းဆီးထောင်ချခံရတဲ့ ဦးဇင်း ဦးရေဝတနဲ့ မိုးကုတ်မြို့က ပြည်သူတချို့လည်း လွတ်မြောက်တဲ့အထဲပါတယ်လို့ သိရပါတယ်။

စစ်အာဏာသိမ်းပြီးနောက် ဆန္ဒပြမှုတွေနဲ့ပတ်သက်လို့ ပြစ်ဒဏ်ချပြီးသား အကျဉ်းသား ၁၃၁၆ ဦးနဲ့  တရားစွဲခံထားရသူ အယောက် ၄၃၂၀ ကို ပြန်လွှတ်ပေးမယ်လို့ အောက်တိုဘာ ၁၈ ရက်နေ့ မွန်းလွဲပိုင်းမှာ စစ်ကောင်စီက ကြေညာလိုက်ပြီးနောက် အခုလို နိုင်ငံရေးအကျဉ်းသားတွေ ပြန်လွတ်လာတာပါ။

3 months Ago

DVB သတင်းထောက် ကိုအောင်ကျော် အကျဉ်းထောင်မှ ပြန်လည်လွတ်မြောက်

ထောင်ဒဏ် ၂ နှစ်ချမှတ်ခံထားရတဲ့ တနင်္သာရီတိုင်းဒေသကြီး၊ မြိတ်မြို့အခြေစိုက် DVB သတင်းထောက် ကိုအောင်ကျော် ဒီကနေ့ အောက်တိုဘာ ၁၈ ရက်နေ့မှာ အကျဉ်းထောင်ကနေ ပြန်လည်လွတ်မြောက် လာပါတယ်။  

ဒီဗွီဘီသတင်းထောက် ကိုအောင်ကျော်ဟာ အကျဉ်းထောင်အတွင်းမှာ ရက်ပေါင်း ၂၃၁ ရက် ကြာဖမ်းဆီးခံရပြီးနောက် ဒီကနေ့ ပြန်လည်လွတ်မြောက်လာတာဖြစ်ပြီး နေအိမ်ကို ပြန်ရောက်နေပြီလို့ သိရပါတယ်။

ပြန်လွတ်လာတဲ့ သတင်းထောက်ကိုအောင်ကျော်က "မြေပြင်မှာ ပြည်သူတွေ ဖြစ်ပျက်နေတဲ့ အချက်အလက်တွေကို ကျနော်တို့ သတင်းသမားတွေက သတင်းမီဒီယာကျင့်ဝတ်အရ ဖော်ပြခဲ့တာပေါ့။ အဲဒီလို ဖော်ပြခဲ့တာကို ကျနော်တို့ကို ပုဒ်မအသီးသီးနဲ့ ဖမ်းဆီးပြီးတော့ ထောင်ချခဲ့တယ်။ ကျနော်တို့ သတင်းမီဒီယာသမားတွေက တိုင်းပြည်ရဲ့ ပြည်ကြီးပခုံး ပြည်ကြီးလက်ရုံးလို့ ခေါ်နိုင်တဲ့ စတုတ္ထမဏ္ဍိုင်ကို ထမ်းဆောင်နေတဲ့သူတွေ ဖြစ်တယ်။ ဒါကြောင့် ရာဇဝတ်သားတွေ မဟုတ်ပါဘူး။ ဒါကိုလည်း သိစေချင်တယ်။ သတင်းမီဒီယာသမားတွေကို ရန်သူလို သဘောထားပြီး ဆက်ဆံတဲ့ လုပ်ရပ်တွေကိုလည်း ဆက်ပြီးမလုပ်စေချင်တော့ဘူး။ ကျနော်ဆို စစ်ကြောရေးမှာ မင်း သတင်းအလုပ်ကို ဆက်လုပ်ဦးမှာလား ဆိုတာမျိုး ပြောတယ်။ ပြောချင်တာက ကျနော်တို့က သတင်းသမား ဖြစ်တယ်၊ ကျနော်တို့က ဒီအလုပ်ကိုပဲ လုပ်တတ်တယ်။ သတင်းမီဒီယာအလုပ်ကိုပဲ ဆက်လုပ်ဖို့ ရှိတယ်။”လို့ ပြောပါတယ်။

မြိတ်မြို့အခြေစိုက် DVB သတင်းထောက် ကိုအောင်ကျော်ကို မတ်လ ၁ ရက်နေ့က မြိတ်မြို့နေအိမ်မှာ စစ်တပ်က အကြမ်းဖက် ဝင်ရောက်ဖမ်းဆီးပြီး ပုဒ်မ ၅၀၅(က) နဲ့ တရားစွဲခဲ့တာဖြစ်ပါတယ်။ 

ဒီနောက် စစ်ကောင်စီတရားရုံးက ဇွန်လ ၂ ရက်နေ့မှာ အလုပ်ကြမ်းနဲ့ ထောင်ဒဏ် ၂ နှစ်ချမှတ်လိုက်တာဖြစ်ပါ တယ်။

ကိုအောင်ကျော်အမှုကို မြိတ်မြို့က ရှေ့နေတွေမလိုက်ရဲအောင် စစ်ကောင်စီက ဖိအားတွေ ပေးခဲ့တဲ့အတွက် ကိုအောင်ကျော်ဟာ မီဒီယာဥပဒေကိုကိုင်ပြီး တရားရုံးမှာ ကိုယ်တိုင်ပဲ ချေပခဲ့ရပါတယ်။ 

မြိတ်မြို့မှာ  ပြည်သူတွေအပေါ် စစ်တပ်ရဲ့ အကြမ်းဖက်မှုနဲ့ ပတ်သက်ပြီး သတင်းအဖြစ်မှန်အတိုင်း  တိုက်ရိုက်တင်ဆက်ခဲ့တဲ့အတွက်  စစ်တပ်က ကိုအောင်ကျော်ကို ဖမ်းဆီးတရားစွဲ ထောင်ချခဲ့တာဖြစ်ပါတယ်။

အလားတူ ထောင်ဒဏ် ၃ နှစ်ချမှတ်ခံထားရတဲ့ ပြည်မြို့အခြေစိုက် DVB သတင်းထောက်ကိုမင်းညိုလည်း ဒီနေ့ ပြန်လည်လွတ်မြောက်လာပါတယ်။

အကျဉ်းကျနေတဲ့ နိုင်ငံရေးအကျဉ်းသား ၁၃၁၆ ယောက်ကို အကျဉ်း‌ထောင် အသီးသီးကနေ ခံဝန်ကတိနဲ့ လွတ်ငြိမ်းသက်သာခွင့်ပြုလိုက်တယ်လို့အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဒီကနေ့ အောက်တိုဘာ ၁၈ ရက်မှာ ကြေညာခဲ့ပြီးနောက် အခုလို လွတ်မြောက်လာတာလည်း ဖြစ်ပါတယ်။

3 months Ago
More News
Up