ပြန်လည်ဖွင့်လှစ်

May 17, 2022

ထိုင်းစာသင်ကျောင်းများ ကိုဗစ်-၁၉ စည်းမျဉ်းစည်းကမ်းနှင့်အညီ ပြန်လည်ဖွင့်လှစ်

ထိုင်းနိုင်ငံမှာ စာသင်ကျောင်းတွေကို ဒီကနေ့ မေ ၁၇ ရက်က စတင်ကာ ဖွင့်လှစ်လိုက်ပြီဖြစ်ကာ ကျောင်းသူကျောင်းသားတွေ၊ ဆရာဆရာမတွေနဲ့ ပညာရေးဝန်ထမ်းတွေအနေနဲ့ ကိုဗစ်-၁၉ ရောဂါကူးစက်မှုဆိုင်ရာ ရောဂါကာကွယ်ရေး စည်းကမ်းချက်တွေ၊ စည်းမျဉ်းတွေနဲ့အညီ လိုက်နာကြဖို့ ညွှန်ကြားထားတယ်လို့ ထိုင်းသတင်းတွေမှာ ရေးပါတယ်။

ကျောင်းတွေတိုင်းမှာ စာသင်ခန်းတွေ၊ ကျောင်းပရဝုဏ်တွေနဲ့ ဘေးပတ်ပတ်လည် ဧရိယာတွေကိုလည်း ကိုဗစ်-၁၉ ရောဂါကူးစက်မှုကနေ ကာကွယ်နိုင်ရေး စည်းကမ်းတွေ တင်းကျပ်ထားပြီး အရေးပေါ်အခြေအနေအတွက်လည်း ကြို တင်စီမံထားတယ်လို့ နေးရှင်းသတင်းမှာ ဖော်ပြပါတယ်။

စာသင်ကျောင်းထဲ တစုံတယောက်မှာ ကိုဗစ်-၁၉ ရောဂါပိုး စစ်ဆေးတွေ့ရှိရတယ်ဆိုရင် ကျောင်းကို ပိတ်ချလိုက်ဖို့ မလိုအပ်ပေမယ့် အမြန်ဆုံး လျင်မြန်ထိရောက်တဲ့ အစီအစဉ်အရ လိုက်နာရမှာဖြစ်ပြီး အဓိက ရည်ရွယ်ချက်ကတော့ ကျောင်းသူကျောင်းသားတွေအနေနဲ့ အပြည့်အဝ သင်ယူနိုင်စေဖို့နဲ့ သင်ယူမှု ဆုံးရှုံးမှု ပြဿနာကို လျှော့ချနိုင်ဖို့ဖြစ်တယ်လို့ ဆိုပါတယ်။

တကယ်လို့များ လူနာတယောက်ကို စာသင်ခန်းတခုမှာ တွေ့ရှိခဲ့ရင် အဆိုပါအခန်းကို သန့်ရှင်းရေးအတွက် အချိန် ၃ ရက်ကြာ ပိတ်ထားသင့်ပြီး အတန်းတွေကိုတော့ အွန်လိုင်းပေါ်ကတဆင့်သာ ဆက်လက်သင်ကြားသင့်ပြီး ဒီအ တောအတွင်း တခြားအတန်းတွေကိုတော့ ပုံမှန်အတိုင်း ပြန်လည်ဖွင့်လှစ်ထားနိုင်မယ်လို့ ဆိုပါတယ်။

ထိုင်းနိုင်ငံတဝန်းမှာတော့ လက်ရှိအချိန်ထိ ကိုဗစ်- ၁၉ ကူးစက်ရောဂါ ကူးစက်ခံရသူပေါင်း ၄ ဒသမ ၃၈ သန်းကျော်၊ သေဆုံးသူပေါင်း ၂၉,၅၅၃ ယောက်နဲ့ ရောဂါပြန်လည်ပျောက်ကင်းသက်သာလာသူပေါင်း ၄ ဒသမ ၂၉ သန်းကျော် ရှိနေ တာပါ။

ကျောင်းနေအရွယ် ကလေးတွေအပါအဝင် ကာကွယ်ဆေး ထိုးပြီးစီးမှုအခြေအနေမှာတော့ ထိုင်းနိုင်ငံမှာ လူဦးရေ ၅၁ ဒသမ ၈ သန်း ကာကွယ်ဆေး အပြည့်အဝ ထိုးနှံပြီးဖြစ်ကာ နိုင်ငံ့လူဦးရေရဲ့ ၇၄ ဒသမ ၂ ရာခိုင်နှုန်းကျော် အကာအကွယ်ရရှိပြီးဖြစ်တယ်လို့ ဆိုပါတယ်။

1 month Ago

March 13, 2022

ကိုဗစ်ပိုးတွေ့သဖြင့် ၁၀ ရက်ကြာပိတ်ထားသည့် ကျင်စန်းကျော့ဂိတ် ပြန်လည်ဖွင့်လှစ်

ကိုဗစ်ပိုးတွေ့လို့ ၁၀ ရက်လောက် ယာယီပိတ်ထားတဲ့ မြန်မာ-တရုတ် အဓိက ကုန်သွယ်ရာ ကျင်စန်းကျော့ဂိတ်ကို မတ်လ ၁၂ ရက်နေ့ ညနေပိုင်းက ပြန်လည်ဖွင့်လှစ်လိုက်တယ်လို့ နယ်စပ် ကုန်သည် လုပ်ငန်းရှင်တွေက ပြောပါတယ်။

"ဖွင့်လိုက်ပြီ။ မနေ့ မတ်လ ၁၂ ရက်နေ့ ညနေပိုင်း တရုတ် စံတော်ချိန် ၃ နာရီခန့်၊ မြန်မာစံတော်ချိန် မွန်းလွဲ ၁ နာရီ ခွဲခန့်မှာ ကျင်းစန်းကျော့ - ဝမ်တိန်ဂိတ်ကို ပြန်ဖွင့်လိုက်ပြီ” လို့ ဝမ်တိန်က မြန်မာကုန်ဂိတ် လုပ်ငန်းရှင် ၁ ဦးက ပြောပါတယ်။

မနေ့ကတော့ မြန်မာနိုင်ငံက ဖရဲ၊ သခွားမွှေးကားတွေ အဓိကဝင်ဖို့ ဦးစာပေးကြောင်း ရွှေလီရှိ မြန်မာ ကုန်သည် ၁ ဦးက ပြောပါတယ်။

ဂိတ်စဖွင့်တဲ့ မတ်လ ၁၂ ရက်နေ့မှာတော့ မြန်မာဘက်ကနေ တရုတ်ဘက်ကို Export ကား ၅ စီး ထွက်ပြီး တရုတ်ဘက်ကနေ မြန်မာဘက်ကို Import ကား ၁၁ စီး ဝင်ကြောင်း နယ်စပ်ကုန်သည် လုပ်ငန်းရှင်တွေက ပြောပါတယ်။

ကိုဗစ်-၁၉ ရောဂါပြန့်ပွားမှု ထိန်းချုပ်ရေး၊ မူဆယ်ခရိုင်အဆင့် Task Force အဖွဲ့ ကတော့ မတ်လ ၁၁ ရက်နေ့က ကုန်စည် ဖြတ်သန်းစွမ်းကို စနစ်တကျ လည်ပတ်နိုင်ဖို့ A Zone အတွင်းရှိ သွင်းကုန် ကားတွေကို ရှင်းလင်းပေးဖိုနဲ့ Close Loop Management စနစ်နဲ့ ဆောင်ရွက်ဖို့ ရွှေလီအစိုးရက ညှိနှုင်းတောင်းဆိုကြောင်း ကြေညာချက် ထုတ်ပြန်ထားပါတယ်။

စစဖွင့်ချင်းမှာပဲ "A" ဇုန်ထဲက Import ကားတွေကို ၁၀၅ မိုင် ကုန်သွယ်ရေးဇုန်ဘက် သွားဖို့ထုတ်ပေးနေပြီဖြစ်ပြီး တရုတ်ဘက်ထဲက မြန်မာခါလီကားတွေ ထွက်လာဖို့တော့ လောလို့ မရသေးကြောင်း နယ်စပ်ကုန်သည် ၁ ဦး က ပြောပါတယ်။

မြန်မာနိုင်ငံကနေ တရုတ်နိုင်ငံကို တင်ပို့မယ့် ဖရဲ၊ သခွား၊ ဖရုံ၊ ကြက်သွန်တင် တရုတ်ကဲ့ကားရော မြန်မာကားတွေပါ ကားအစီးရေ ၇၃၀ လောက် ရွှေလွယ်အင်၊ ၁၀၅ မိုင် ကုန်သွယ်ရေးဇုန်တွေမှာ တရုတ်ဘက်ဝင်ဖို့ စောင့်ဆိုင်းနေတာကြောင့် တရုတ်ဘက် အသစ်တင်ပို့ဖို့ မလောကြဖို့ မူဆယ် သစ်သီးဝလံ ကုန်စည်ဒိုင် တာဝန်ရှိသူ ၁ ဦးက သူ့ရဲ့ လူမှုကွန်ရက်ကနေတဆင့် တောင်သူတွေ အပါအဝင် နယ်စပ်ကုန်သွယ်ရေးနဲ့ ဆက်စပ်သူတွေကို  အသိပေးထားပါတယ်။

မြန်မာဘက်ခြမ်း A ဇုန် ထဲမှတဆင့် Export ကားတွေ တရုတ်ဘက်ထဲ ဝင်နေပြီဖြစ်ပြီး တရုတ်ဘက်ခြမ်းထဲက သတ်မှတ်ထားတဲ့ကွင်းမှာ သတ်မှတ်နာရီအတိုင်း ပိုးသတ်ရပ်နားရမှာ ဖြစ်တာကြောင့် ကိုဗစ် ဆေးစစ်ပြီး ဆေးအောင်တဲ့ ကားတွေက အခွန်ဆောင်၊ F ဇုန်မှာ ဆေးထပ်မံ စစ်ဆေး ပြီးရင်ရောင်း၊ ရောင်းပြီးကားချိန်း၊ ပိုးထပ်စစ်ကာ ဆေးအောင်မှသာ ပြည်မကြီးထဲ တင်ပို့ခွင့်ရမယ်လို့ ဆိုပါတယ်။

တရုတ်နိုင်ငံထဲမှာ ကျန်းမာရေး၊ အကောက်ခွန်၊ အရောင်းအဝယ်၊ ကားချိန်း၊ ကျန်းမာရေး အဆင့်ဆင့် လုပ်ရမှာ ဖြစ်တာကြောင့် အနည်းဆုံး ၈ ရက်လောက် ကြာနိုင်ပြီး ရက်ကြာ အမှည့်လွန်သအသီးတွေအစား ပိုလတ်ဆတ်တဲ့ အသီးတွေ အစားထိုးတင်ပို့ကြဖို့ သစ်သီးဝလံကုန်စည်ဒိုင်က လမ်းညွှန်ချက်ထုတ်ပြန်ထားတယ်လို့ နယ်စပ်ကုန်သည် လုပ်ငန်းရှင်တွေဆီက သိရပါတယ်။

မြန်မာနိုင်ငံရဲ့ တရုတ် Export ကုန် အများဆုံး တင်ပို့နေတဲ့ ကျင်စန်းကျော့ - ဝမ်တိန် နှစ်နိုင်ငံ ကုန်သွယ်ရာဂိတ်ကို တရုတ်ဘက်က ကိုဗစ်အကြောင်းပြချက်နဲ့ မတ် ၂ ရက်နေ့ကစ ရုတ်တရက် ယာယီပိတ်လိုက်တာဖြစ်ပြီး မတ်လ ၁၂ ရက်နေ့က ပြန်လည်ဖွင့်လှစ်လိုက်တာပါ။

ဓာတ်ပုံ- နယ်စပ်ကုန်သည် လုပ်ငန်းရှင်များ

4 months Ago
More News
Up