ပြန်ဖွင့်ခွင့်ပြု

December 5, 2020

မြစ်ကြီးနားမြို့တွင် ပြန်ဖွင့်ခွင့်ပြုခဲ့သည့် စားသောက်ဆိုင်များကို ရှောင်တခင်ဝင်စစ်မည်

မြစ်ကြီးနားမြို့နယ်မှာ ပြန်လည်ဖွင့်ခွင့်ပေးခဲ့တဲ့ စားသောက်ဆိုင်နဲ့ လက်ဖက်ရည်ဆိုင် ၁၁၀ ကို  ရှောင်တခင် ဝင်ရောက်စစ်ဆေးမှာဖြစ်ပြီး ကျန်းမာရေးစည်းကမ်းချက် မလိုက်ပါက ပိတ်သိမ်းသွားမယ်လို့ မြစ်ကြီးနားမြို့နယ် အုပ်ချုပ်ရေးမှူးက ပြောပါတယ်။ ကချင်ပြည်နယ် မြစ်ကြီးနားမြို့မှာ ကိုဗစ်-၁၉ ရောဂါပိုးကြောင့် ပိတ်ထားခဲ့ရတဲ့ စားသောက်ဆိုင်၊ လက်ဖက်ရည်ဆိုင် ၁၁၀ လောက် ဒီဇင်ဘာ၄ ရက်နေ့က စတင်ပြီး ပြန်လည်ဖွင့်လှစ်ခွင့်ပြုခဲ့တာပါ။‌ မြစ်ကြီးနားမြို့နယ် အုပ်ချုပ်ရေးမှူး ဦးသန်းဝင်းက "မြစ်ကြီးနားမြို့နယ်အတွင်းမှာ လက်ဖက်ရည်ဆိုင်တွေ၊ စားသောက်ဆိုင်တွေ ၄၀၀ ကျော်ရှိတဲ့အထဲက  နိုဝင်ဘာလအတွင်းမှာ  သက်ဆိုင်ရာ အဖွဲ့တွေဖွဲ့ပြီး လိုက်လံစစ်ဆေးရာမှာ (A) အဆင့်သတ်မှတ်ထားသော ဆိုင်‌ပေါင်း ၁၁၀ ခန့်ကို ဖွင့်ခွင့်ပေးခဲ့တာဖြစ်ပါတယ်။ ဖွင့်ခွင့်ပြုပြီး နောက်ပိုင်းမှာတော့ သက်ဆိုင်ရာ အဖွဲ့အစည်းတွေနဲ့ နယ်မြေပိုင်းခြားပြီး ရှောင်တခင် လိုက်လံစစ်ဆေးမှာ ဖြစ်ပါတယ်” လို့ ပြောပါတယ်။ ပြန်လည်ဖွင့်လှစ်ခွင့်ရတဲ့ ဆိုင်တွေအနေနဲ့  လက်သန့်စင်စေတာ၊ ကိုယ်အပူချိန်တိုင်းတာ၊ ဆိုင်အကျယ်အဝန်းနဲ့ နေရာအလိုက် စားပွဲတွေကို တစ်နေရာနှင့်တနေရာ ၆ ပေအကွာ ထားရှိ‌‌စေတာ၊ စားပွဲမှာ အကာများ ထားရှိစေတာ စတဲ့ သတ်မှတ်ချက်တွေ ထားရှိပြီး လိုက်နာမှုမရှိပါက ဆိုင်ကို ပြန်ပိတ်ခိုင်းမယ်လို့ ဆိုပါတယ်။ ကချင်ပြည်နယ်မှာ ကိုဗစ်-၁၉ ရောဂါပိုးတွေ့ရှိသူ စုစုပေါင်း ၂၇၄ ဦးရှိပြီး ဖားကန့်မြို့နယ်က ၁၆၇ ဦး၊ မြစ်ကြီးနားမြို့နယ်က ၃၅ ဦးနဲ့ အများဆုံးတွေ့ရှိထားတယ်လို့ ကျန်းမာရေးဝန်ကြီးဌာနရဲ့ ထုတ်ပြန်ချက်အရ သိရပါတယ်။ ထူးထူး( ဗိုလ်ကလေး)
5 months Ago

August 3, 2020

ကဗျာဝကမ်းခြေကို ကျန်းမာရေး လမ်းညွှန်ချက်နှင့်အညီ ပြန်ဖွင့်ခွင့်ပြုရန် ဒေသခံများ တောင်းဆို

တရားဝင်ဖွင့်လှစ်ခွင့်မရသေးပေမယ့် ခရီးသွားဧည့်သည်တွေ လာရောက်လည်ပတ်မှု ရှိလာနေပြီဖြစ်တဲ့ ကဗျာဝကမ်းခြေကို ကျန်းမာရေးဌာနရဲ့ လမ်းညွှန်ချက်တွေနဲ့အညီ ပြန်လည်ဖွင့်လှစ်ပေးဖို့ ဒေသခံတွေက လိုလားနေကြပါတယ်။ မွန်ပြည်နယ်အတွင်းက စားသောက်ဆိုင်တွေကို အကန့်အသတ်နဲ့ ပြန်လည်ဖွင့်လှစ်ခွင့်ပြုနေပေမယ့် ကဗျာဝကမ်းခြေကို ခရီးသွားတွေ လာရောက်လည်ပတ်မှုများလည်း ရှိလာနေပြီး ဝါတွင်းကာလ အခါကြီးရက်ကြီးတွေမှာ လည်ပတ်သူတွေ ထောင်နဲ့ချီပြီး ရှိလာနိုင်လို့ ခုလို တောင်းဆိုတာလို့ ကဗျာဝကျေးရွာ ရပ်မိရပ်ဖတဦးဖြစ်သူ ဦးမြတ်စိုးအောင်က ပြောပါတယ်။ “လက်ရှိအနေအထားက ကိုဗစ်ကာလ မပြီးဆုံးသေးပေမယ့် လာရောက်လည်ပတ်ကြသူတွေက တော်တော်များများ ရှိလာနေကြပါပြီ။ ခုလို တရားဝင်ဖွင့်ခွင့်မပြုပေမဲ့ လာရောက်လည်ပတ်မှုရှိနေလို့ မတားဆီးနိုင်ရင်တောင်မှ စိုးရိမ်ရတဲ့ အနေအထားမို့ ကျန်းမာရေးဌာနရဲ့ လမ်းညွှန်ချက်တွေအတိုင်း အသိပညာပေးမှုတွေ၊ စစ်ဆေးမှုတွေ၊ စနစ်တကျ ကြပ်မတ်ထိန်းသိမ်းမှုတွေနဲ့ ပြန်လည်ဖွင့်လှစ်ပေးဖို့ တောင်းဆိုပါတယ်။ ကမ်းခြေကို အမှီပြုနေကြတဲ့ ဒေသခံတွေရဲ့ စီးပွားရေးအခြေအနေကိုလည်း ထောက်ရှုပေးပြီးတော့ပါ” လို့ DVB ကို ပြောပါတယ်။ ကိုဗစ်ကာလအတွင်း ကဗျာဝကမ်းခြေမှာ ဈေးရောင်းချတဲ့သူတွေအနေနဲ့ အခက်အခဲများစွာ ကြုံတွေ့ခဲ့ရပြီး သာမန်ဆိုင်တွေအနေနဲ့ သင့်တော်ရာ လုပ်ကိုင်စားသောက်ကြရတယ်လို့ ဈေးဆိုင်ပိုင်ရှင်တွေတဦးက ပြောပါတယ်။ “တတ်နိုင်ပြီးတော့ စုမိဆောင်းမိရှိသူတွေကတော့ အဆင်ပြေပေမယ့် သာမန်ဆိုင်ရှင်တွေ၊ ဆိုင်လေးတွေက စားသောက်ဖို့တောင် ခက်ခဲလို့ ကြုံရာအလုပ်လုပ်နေကြရတယ်။ ခုဆို ဝါတွင်းကာလ မိုးရာသီဆိုပေမယ့်လည်း မြို့နယ်အတွင်းနဲ့ နီးစပ်ရာမြို့တွေက လည်ပတ်သူတွေက ပြန်ပြီးတော့ အပန်းဖြေမှုတွေ ရှိလာနေကြလို့ စည်းကမ်းချက်တွေ ထုတ်ပြီးတော့ ပြန်လည်ဖွင့်လှစ်ပေးစေချင်ပါတယ်။ ဒီလိုဖွင့်လှစ်မှလည်း ခရီးသွားတွေက ပိုပြီးတော့ လာရောက်လည်ပတ်ကြမှာ။”  ကိုဗစ်-၁၉ ကာကွယ်၊ ထိန်းချုပ်၊ ကုသရေးအမျိုးသားအဆင့် ဗဟိုကော်မတီအနေနဲ့ ထုတ်ပြန်ထားတဲ့အမိန့်၊ ပန်ကြားလွှာနဲ့ ညွှန်ကြားချက်တွေကို ဩဂုတ် ၁၅ ရက်နေ့အထိ ထပ်မံသက်တမ်းတိုးထားပေမယ့် အခါကြီးရက်ကြီးတွေမှာ ဘုရားစေတီတွေနဲ့ အပန်းဖြေနေရာတွေမှာ ပုံမှန်နီးပါး ပြန်လည်သွားလာလည်ပတ်နေကြပါတယ်။ သတင်း - ဝင်းနိုင်သက်
9 months Ago
More News
Up