ပြန်ဆက်ဌာန သတင်းထောက်

November 20, 2021

မအူပင် ပြန်ဆက်ဌာန သတင်းထောက်၏ အမျိုးသမီးအား စစ်ကောင်စီ ပစ်သတ်

ဧရာဝတီတိုင်း၊ မအူပင်မြို့နယ်၊ ပြန်ဆက်ဌာနက သတင်းထောက် ဦးအောင်ခိုင်ရဲ့ ဇနီးဖြစ်သူကို နိုဝင်ဘာလ ၁၈ ရက်နေ့မှာ စစ်ကောင်စီတပ်သားတွေက ပစ်သတ်ခဲ့တယ်လို့ သိရပါတယ်။ 

ပြန်ဆက်သတင်းထောက် ဦးအောင်ခိုင်ရဲ့ ဇနီးဖြစ်သူ ဒေါ်ရီရီချိုကို သံဖြူဇရပ်မြို့နယ်ထဲက စစ်ဆေးရေးဂိတ်မှာ ကားတားစဉ် ရပ်တန့်မပေးတာကြောင့် စစ်ကောင်စီတပ်သားတွေက သေနတ်နဲ့ပစ်သတ်ခဲ့တာလို့ ဒေသခံတွေက ပြောပါတယ်။

“သူ့အမျိုးတွေဆီ သွားလည်တာ။ မွန်ပြည်နယ်ဘက် လမ်းမှာ သူတို့စီးတဲ့ကားကို တားတော့ ရပ်မပေးလို့ လှမ်းပစ်တာ ၃ ချက်ပစ်တာ သူ့ခါးကိုထိတယ်ပြောတယ်။ အဲဒီဒဏ်ရာနဲ့ အပစ်ခံရတဲ့နေရာမှာ သေတာ” လို့ ဒေသခံတဦးက ပြောပါတယ်။

ပစ်သတ်ခံခဲ့ရတဲ့ ပြန်ဆက်သတင်းထောက်ရဲ့ ဇနီးဖြစ်သူကို မအူပင်မြို့၊ အမှတ် ၁ ရပ်ကွက်က ဝန်ထမ်းလိုင်းခန်းကို ပြန်လည်သယ်ဆောင်လာခဲ့တယ်လို့ ဆိုပါတယ်။

ပြန်ဆက်သတင်းထောက်ရဲ့ ဇနီးဖြစ်သူ နာရေးကို နိုဝင်ဘာ ၂၃ ရက်နေ့မှာ နေအိမ်လိုင်းခန်းကနေ မအူပင်သုသာန်ကို ပို့ဆောင်သွားမယ်လို့ သိရပါတယ်။

2 months Ago
Up