ပြည်အကျဉ်းထောင်

April 17, 2022

ပြည်အကျဉ်းထောင်မှ နိုင်ငံရေးအကျဉ်းသားများမပါဘဲ တပ်ပြေးနှင့်ဆေးမှု ၆ ဦးသာ ပြန်လွတ်

မြန်မာနှစ်ဆန်းတရက်နေ့ ဧပြီ ၁၇ ရက်နေ့မှာ ပဲခူးတိုင်း၊ ပြည်အကျဉ်းထောင်ကနေ နိုင်ငံရေး အကျဉ်းသားတယောက်မှမလွတ်ဘဲ တပ်ပြေး ၄ ယောက်နဲ့ မူးယစ်ဆေးမှု ၂ ယောက် စုစုပေါင်း ၆ ယောက်ပဲ လွတ်မြောက်တယ်လို့ အကျဉ်းဦးစီးဌာန ဝန်ထမ်းတယောက်ဆီက သိရပါတယ်။

မြန်မာနှစ်ဆန်းတရက်နေ့မှာ တနိုင်ငံလုံး အကျဉ်းထောင်တွေကနေ အကျဉ်းသား ၁၅၀၀ ကျော်လွှတ်ပေးတယ်လို့ စစ်ကောင်စီက အမိန့်ထုပ်ပြန်ထားခဲ့ပေမဲ့ နိုင်ငံရေးအကျဥ်းသား ၁၅၀ ကျော်ရှိတဲ့  ပြည်ထောင်က နိုင်ငံရေးအကျဉ်းသား တယောက်မှ မလွတ်မြောက်ခဲ့ဘူးလို့ သိရပါတယ်။

နိုင်ငံရေးအကျဉ်းသားဟောင်းတယောက်က “မနက်က အစောကြီးသွားစောင့်နေတာ ကိုယ့်လူတွေပါမလားဆိုပြီး၊ ၉ နာရီ လောက်မှာ စလွှတ်တာ၊ မူးယစ်ဆေးရောင်းသူတွေနဲ့ စစ်တပ်က ပြေးသူတွေ ၆ ယောက်ပဲလွှတ်ပေးတယ်၊ နိုင်ငံရေးအကျဉ်းသားတယောက်မှမပါဘူး။ ထင်တော့ထင်ပါတယ်၊ ဘယ်လွှတ်ပေးရဲမလဲ သူတို့က ကြောက်နေတာလေ” လို့ ပြောပါတယ်။

စစ်ကောင်စီက  မြန်မာနှစ်ဆန်းတရက်နေ့မှာ အမိန်အမှတ် ၃၀/ ၂၀၂၂ န့ ပြစ်ဒဏ်လွှတ်ငြိမ်းခွင့် အမိန်တခုကို  ဒုတိယ ဗိုလ်ချုပ်ကြီးအောင်လင်းဒွေး လက်မှတ်နဲ့ ထုတ်ပြန်ထားပါတယ်။ 

အဲ့ဒီအမိန့်မှာ အကျဥ်းထောင်၊ အချုပ်ထောင် အသီးသီးမှာ အကျဥ်းကျခံနေရတဲ့ အကျဉ်းသား၊ အကျဉ်းသူ ၁၅၇၇ ဦးတို့ကို ရာဇ၀တ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ နောက်တကြိမ်ပြစ်မှု ထပ်မံကျူးလွန်ပါက အဆိုပါပြစ်ဒဏ်အပြင်၊ ယ ခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် - ဟူသော စည်ကမ်းသတ်မှတ်ချက်နဲ့ ကျခံရန်ကျန်ရှိသော ပြစ်ဒဏ်များအပေါ် လျှော့ပေါ့ပြီး ပြစ်ဒဏ်လွတ်ငြိမ်းသက်သာခွင့်ပြုလိုက်လို့ ဖော်ပြထားပါတယ်။

8 months Ago

April 5, 2021

ပြည်မြို့အခြေစိုက် ဖမ်းဆီးခံ ဒီဗွီဘီသတင်းထောက်ကိုမင်းညို ကို ရုံးထုတ်

ပဲခူးတိုင်း ပြည်မြို့က ဖမ်းဆီးခံ ဒီဗွီဘီသတင်းထောက် ကိုမင်းညို ကို  ပြည်အကျဉ်းထောင်တွင်းရှိ  တရားရုံးမှာ ဧပြီ ၅ ရက် ဒီကနေ့  ရုံးထုတ်ပါတယ်။

ကိုမင်းညိုဟာ မတ်လ ၃ ရက်နေ့က ဆန္ဒပြပွဲမှာ သတင်းယူရင်း ရိုက်နှက်ဖမ်းဆီးခံရပြီး ရာဇသတ်ကြီး  ပုဒ်မ ၅၀၅ (က) နဲ့ တရားစွဲဆိုခံရတာဖြစ်ပါတယ်။ ဒီကနေ့ ထောင်တွင်းတရားရုံးမှာ ရုံးထုတ်ကို ကိုမင်းညိုရဲ့ ရှေ့နေလည်း တက်ရောက်ခဲ့ပါတယ်။

ကိုမင်းညိုရဲ့ ဇနီးသည် ဒေါ်မိုးမိုးက “ ဒီနေ့ရုံးထုတ်တယ်။ လာမယ့် ၂၀ ရက်နေ့ကို ပြန်ချိန်းလိုက်တယ်၊ သင်္ကြန်ကျော်ပေါ့။ အခုက သတင်းထောက်ဆိုတဲ့ ပုဒ်မနဲ့ မစွဲဘူး။ သူ့ကို ဖမ်းတုန်းက ၃ ရက်နေ့၊ အဲဒီတုန်းက သတင်းဌာနတွေကလည်း မပိတ်သေးဘူးလေ။ ၈ ရက်နေ့မှ ပိတ်တာ။ အဲတော့ သူက သတင်းသွားယူတဲ့အချိန်မှာ ဖမ်းခံရတာ၊ သတင်းထောက်ကတ်လည်း ပါသွားတယ်။ ဒကစကို ခေါ်သွားတုန်းကလည်း သတင်းထောက်ပါလို့ပြောတယ်၊ ကတ်ကိုလည်းပြတယ်၊ ဒါပေမဲ့ တကယ့်ရုံးထုတ်ပြီး စစ်တဲ့အခါကျတော့ စီဒီအမ် အားပေးလှုံ့ဆော်မှုဆိုတဲ့ အမှုနဲ့ စွဲလိုက်တယ်၊ အဲဒါနဲ့ ရုံးထုတ်တာပေါ့” လို့ ပြောပါတယ်။ 

လက်ရှိ ကိုမင်းညိုရဲ့ ကျန်းမာရေး အခြေအနေ ကောင်းမွန်စွာရှိနေတယ်လို့လည်း  ဆိုပါတယ်။

ဒီဗွီဘီသတင်းထောက် ကိုမင်းညိုကို  မတ်လ ၃ ရက်နေ့ မနက်ပိုင်းက ပြည်မြို့ ဆန္ဒပြပွဲမှာ သတင်းယူနေတုန်း စစ်တပ်နဲ့ရဲတပ်ဖွဲ့တွေက ရိုက်နှက်ဖမ်းဆီးသွားတာဖြစ်ပါတယ်။

အလားတူ တနင်္သာရီတိုင်းဒေသကြီး မြိတ်မြို့က ဒီဗွီဘီသတင်းထောက် ကိုအောင်ကျော် (ခ) ကိုကောင်းမြတ်လှိုင်လည်  ဖမ်းဆီးခံထားရပြီး ဖေဖော်ဝါရီ ၁ ရက်နေ့ အာဏာသိမ်းကတည်းက လက်ရှိအချိန်ထိသတင်းသမားစုစုပေါင်း အယောက် ၄၀ ဦးကျော်လောက်  ဖမ်းဆီးခံထားရတယ်လို့ သိရပါတယ်။

2 years Ago
Up