ပြည်သူ့လွှတ်တော်ကိုယ်စားလှယ်

June 29, 2022

ဖားကန့် ပြည်သူ့လွှတ်တော်ကိုယ်စားလှယ်၏နေအိမ်ကို စစ်ကောင်စီက ချိပ်ပိတ်

ကချင်ပြည်နယ်၊ ဖားကန့်မြို့၊ ရှရော်ခကျေးရွာရှိ ဖားကန့် ပြည်သူ့လွှတ်တော်ကိုယ်စားလှယ် ဦးအောင်ဟိန်းမင်းရဲ့ နေအိမ်ကို ဇွန် ၂၉ ရက် ဒီမနက် ၆ နာရီက စစ်ကောင်စီတပ်က ချိပ်ပိတ်လိုက်တယ်လို့ ဒေသခံတွေက ပြောပါတယ်။

စစ်ကောင်စီတပ်ဖွဲ့ဝင် အယောက် ၅၀ လောက် အရပ်ဝတ်တွေနဲ့ လာရောက်ပြီး နေအိမ်ကို သော့ခတ်ချိပ်ပိတ်သွားခဲ့တယ်လို့ ဆိုပါတယ်။

“အိမ်မှာတော့ ဘယ်သူမှမရှိဘူး။ မနက် ၆ နာရီလောက်က အရပ်ဝတ်တွေနဲ့ပဲ အယောက် ၅၀ လောက်လာပြီး အိမ်ကို သော့ခတ်သွားတာ။ တခြား ပစ္စည်းတွေ သယ်သွားတာတွေတော့ မတွေ့ဘူး။”

ဦးအောင်ဟိန်းမင်းဟာ ၂၀၂၀ ရွေးကောက်ပွဲမှာ အန်အယ်လ်ဒီပါတီကနေ ဝင်ရောက်ယှဉ်ပြိုင်ခဲ့ပြီး ပြည်သူ့လွှတ်တော်ကိုယ်စားလှယ်နေရာ ရရှိထားတာပါ။

လတ်တလော ကချင်ပြည်နယ်အတွင်း မေလပိုင်းကစတင်ပြီး အန်အယ်လ်ဒီပါတီဝင်တွေရဲ့ နေအိမ်တွေ ချိပ်ပိတ်ခံရမှု ပိုများလာပါတယ်။

5 months Ago

March 22, 2022

တံတားဦး ပြည်သူ့လွှတ်တော်ကိုယ်စားလှယ်၏ နေအိမ် ချိပ်ပိတ်ခံရ

မန္တလေးတိုင်း၊ တံတားဦးမြို့နယ် ပြည်သူ့လွှတ်တော်ကိုယ်စားလှယ် ဦးဝဏ္ဏအောင်ရဲ့ နေအိမ်ကို မတ် ၂၁ ရက်နေ့မှာ စစ်ကောင်စီက လာရောက်ချိပ်ပိတ်သွားတယ်လို့ သိရပါတယ်။

စစ်တပ်အာဏာသိမ်းပြီးကတည်းက တိမ်းရှောင်နေတဲ့ ဦးဝဏ္ဏအောင်ရဲ့ ချမ်းအေးသာစံမြို့နယ်၊ သီရိဟေမာအရှေ့ရပ်က နေအိမ်ကို ဒီကနေ့ မွန်းတည့် ၁၂ နာရီလောက် လာရောက် ချိပ်ပိတ်ခဲ့တာပါ။

စစ်ကောင်စီတပ်ဖွဲ့ဝင်တွေ၊ နယ်မြေခံရဲတွေနဲ့ ရပ်ကွက်အုပ်ချုပ်ရေးပိုင်းက လူတွေ လာရောက်ချိတ်ပိတ်တာ ဖြစ်ပြီး အဆိုပါနေအိမ်မှာ ဦးဝဏ္ဏအောင်ရဲ့ ညီဖြစ်သူ မိသားစု နေထိုင်နေတယ်လို့ သိရပါတယ်။

ပြည်သူ့လွှတ်တော်ကိုယ်စားလှယ် ဦးဝဏ္ဏအောင်က "သူတို့လုပ်ရိုးလုပ်စဉ်ပေါ့လေ၊ စကစရဲ့ ဥပဒေမဲ့လုပ်ရပ်ပေါ့။ ထွေထွေထူးထူးတော့ ပြောစရာသိပ်မရှိပါဘူး၊ မျှော်လင့်ထားတာပဲလေ။ ဘာလို့ဆို ကျနော်တို့မှ မဟုတ်ပါဘူး၊ တနိုင်ငံလုံး ဘယ်နေ့ချိပ်ပိတ်မယ် မျှော်လင့်နေတဲ့ အနေအထားပဲ။ ချိပ်ပိတ်ထားလို့လည်း ကိုယ်လုပ်စရာတွေ ရပ်တန့်သွားမှာမှ မဟုတ်တာ၊ ကိုယ် လုပ်စရာနဲ့အတူ ကျနော်တို့ကတော့ တိုက်ပွဲဝင်နေရမှာပဲ” လို့ ပြောပါတယ်။

မန္တလေးတိုင်းအတွင်းမှာတော့ ပြည်သူ့လွှတ်တော်ကိုယ်စားလှယ်တွေထဲက နေအိမ်ချိပ်ပိတ်ခံရတာဟာ ပထမဆုံးဖြစ်တယ်လို့ သိရပါတယ်။ ပြီးခဲ့တဲ့ ဖေဖော်ဝါရီလအတွင်းက စဉ့်ကိုင်မြို့နယ်၊တိုင်းဒေသကြီး (၁) လွှတ်တော်ကိုယ်စားလှယ် ဦးအောင်နိုင်လင်းရဲ့ နေအိမ်လည်း ချိပ်ပိတ်ခံခဲ့ရတယ်လို့ သိရပါတယ်။

9 months Ago
More News
Up