ပြည်ပရောက်မြန်မာများ

November 21, 2021

ပြည်ပရောက်မြန်မာများအတွက် Bulk Sale စနစ်ဖြင့် အောင်လံလွှင့်ချီနွေဦးထီ စရောင်းပေးမည်

အောင်လံလွှင့်ချီနွေဦးထီကို ပြည်ပရောက်မြန်မာတွေ ကံစမ်းအားပေးနိုင်ဖို့အတွက် အစုလိုက်ရောင်းချတဲ့စနစ် Bulk Sale System နဲ့ နိုဝင်ဘာ ၂၃ ရက်နေ့ကစပြီး ရောင်းချပေးသွားမယ်လို့ NUG စီမံကိန်း၊ ဘဏ္ဍာရေးနှင့်နိုင်ငံခြားရင်းနှီးမြှုပ်နှံမှုဝန်ကြီးဌာန ဒုတိယဝန်ကြီး ဦးမင်းဇေယျာဦးက ပြောပါတယ်။

“အထူးအစီစဥ် အနေနဲ့ ပြည်ပမှ နွေဦးထီကို ထိုးနိုင်ဖို့ Bulk sale ဖြင့် ရောင်းချပေးရန် စီစဥ်ထားရှိပြီ ဖြစ်ပါတယ်။ blue mark ပါတဲ့ နွေဦးထီ page မှတဆင့် စုံစမ်းမေးမြန်းနိုင်ပါတယ်။ ပြည်ပက ထိုးသူတွေအတွက် bulk sale နဲ့ ရောင်းချပေးမယ် ၂၃ ရက်နေ့ ကစဝယ်လို့ရမယ်။ ငွေကြေးစနစ်က ဘဏ်ငွေလွှဲစနစ်။ တစ်ဦးက စုပြီးစောင်ရေ ဘယ်လောက်ဆိုပြီး bulk sale ဝယ်လို့ရမယ်။”

နွေဦးထီကို နိုဝင်ဘာလဆန်းကစပြီး လစဉ်ပုံမှန်ထီဖွင့်တဲ့စနစ်နဲ့ စတင်ရောင်းချခဲ့တာပါ။ နိုဝင်ဘာလအတွက် နွေဦးထီကို ၂၅ ရက်နေ့မှာ အရောင်းပိတ်သွားမှာဖြစ်ပြီး ၃၀ ရက်နေ့ ထီဖွင့်ပွဲကျင်းပသွားမှာဖြစ်ပါတယ်။

“နွေဦးထီက တော်လှန်ရေးအတွက် လူတိုင်းပါဝင်နိုင်ခြင်းနှင့် CDM ဝန်ထမ်းတွေကို အထောက်အပံ့ ဖြစ်စေနိုင်မယ့်အပြင် အောင်ဘာလေထီကို အစားထိုးနိုင်မှု လုံလုံခြုံခြုံနဲ့ စစ်အာဏာရှင်ကို ဆန့်ကျင်မှုကို ပြသနိုင်မှုတွေနဲ့ ပြည့်နှက်နေပါတယ်” ဒုဝန်ကြီးဦးမင်းဇေယျာဦးကပြောပါတယ်။

ပထမအကြိမ် နွေဦးထီဖွင့်ပွဲကို အောက်တိုဘာ ၃၀ ရက်နေ့စတင်ကျင်းပခဲ့ပြီး စမ်းသပ်ကာလတုန်းကထက် ပိုမိုကောင်းမွန်လုံခြုံတဲ့စနစ်တွေနဲ့ ပြင်ဆင်ထားတယ်လို့ နွေဦးထီမိသားစုက ကြေညာထားပါတယ်။

2 months Ago

October 5, 2020

ရုရှားအပါအဝင် ၁၀ နိုင်ငံတွင် ပြည်ပရောက်မြန်မာများ ကြိုတင်မဲပေး

၂၀၂၀ ရွေးကောက်ပွဲအတွက် မြန်မာသံရုံး ၉ ရုံးနဲ့  မြန်မာကောင်စစ်ဝန်ချုပ်ရုံး ၁ ရုံး စုစုပေါင်း ၁၀ ရုံးမှာ  အောက်တိုဘာ ၄ ရက်နေ့က ပြည်ပနိုင်ငံရောက် မြန်မာနိုင်ငံသား ၅၈၀၀ ကျော် ကြိုတင်ဆန္ဒမဲပေးခဲ့ကြတယ်လို့ နိုင်ငံခြားရေးဌာနက ထုတ်ပြန်ပါတယ်။ ဗီယက်နမ်နိုင်ငံ၊ အက်စဝါတီနီနိုင်ငံ၊ ဘင်္ဂလားဒေ့ရှ်နိုင်ငံနဲ့  ဟောင်ကောင်ရှိ မြန်မာနိုင်ငံသားတွေ မနေ့က ကြိုတင်ဆန္ဒမဲစတင်ပေးကြပြီး ဘရူနိုင်း၊ ရုရှား၊ ထိုင်း၊ ကိုရီးယား၊ စင်ကာပူနဲ့ ဂျပန်နိုင်ငံတွေမှာတော့   ကြိုတင်ဆန္ဒမဲတွေ  ဆက်လက်ပေးနေကြပါတယ်။ ဗီယက်နမ်နိုင်ငံ၊ ဟနွိုင်းမြို့ရှိ မြန်မာသံရုံးမှာ  မြန်မာနိုင်ငံသားအယောက် ၇၀၊ ဟောင်ကောင်မြို့ရှိ မြန်မာကောင်စစ်ဝန်ချုပ်ရုံးမှ ၈၇ ယောက်၊ ဘင်္ဂလားဒေ့ရှ်နိုင်ငံ ဒါကာမြို့ရှိ မြန်မာသံရုံးမှာ ဆန္ဒမဲပေးပိုင်ခွင့်ရှိသူ မြန်မာနိုင်ငံသား ၂၉ ယောက်အနက်  ၂၇ ယောက် လာရောက်မဲပေးခဲ့တယ်လို့ ဆိုပါတယ်။ တောင်အာဖရိကဒေသရှိ အက်စဝါတီနိုင်ငံရောက် မြန်မာနိုင်ငံသားတွေ ကြိုတင်ဆန္ဒမဲပေးခွင့်ရရှိဖို့အတွက် မြန်မာသံရုံး၊ ပရီတိုးရီးယားမြို့က အက်စဝါတီနီနိုင်ငံ မာစာဖာ မြို့မှာ  မဲရုံခွဲဖွင့်လှစ်ပေးခဲ့ရာမှ မဲပေးခွင့်ရရှိသူ မြန်မာနိုင်ငံသား  ၂၆ ယောက်အနက် ၁၇ ယောက် လာရောက် မဲပေးခဲ့တယ်လို့ သိရပါတယ်။ အလားတူ ဂျပန်နိုင်ငံ တိုကျိုမြို့ မြန်မာသံရုံးမှာ မနေ့က မဲဆန္ဒရှင်  ၁၅၇၀ ဦး၊ စင်ကာပူ  မြန်မာသံရုံးမှာ ၁၈၀၀ ဦး၊ တောင်ကိုရီးယား ဆိုးလ်မြို့  မြန်မာသံရုံးမှာ ၁၀၀၉ ဦး၊ ရုရှားနိုင်ငံ မော်စကိုမြို့ မြန်မာသံရုံးမှာ ၅၀ ဦး၊ ဘရူနိုင်းနိုင်ငံ  ဘန်ဒါဆရီဘီဂါဝန်မြို့ မြန်မာသံရုံးမှာ  ၁၃၆ ဦးနဲ့ ထိုင်းနိုင်ငံ ဘန်ကောက်မြို့ မြန်မာသံရုံးမှာ မဲဆန္ဒရှင် ၁၀၄၅ ဦး အသီးသီးလာရောက်မဲပေးခဲ့ကြတယ်လို့ နိုင်ငံခြားရေးဌာနက ထုတ်ပြန်ပါတယ်။ ကမ္ဘာ့နိုင်ငံတွေအသီးသီးမှာ ရောက်နေတဲ့ ဆန္ဒမဲပေးပိုင်ခွင့်ရှိသူ မြန်မာနိုင်ငံသားတွေ ၂၀၂၀ ရွေးကောက်ပွဲအတွက် ကြိုတင်မဲပေးနိုင်ဖို့  သက်ဆိုင်ရာနိုင်ငံတွေအလိုက် မြန်မာသံရုံးအသီးသီးက ပြီးခဲ့တဲ့သီတင်းပတ်ကစပြီး ရက်အလိုက် မဲရုံတွေ ဖွင့်လှစ်ကျင်းပပေးနေတာ ဖြစ်ပါတယ်။ ပြည်ပရောက်မြန်မာတွေ ကြိုတင်မဲပေးရာမှာ မဲစာရင်းမှာ အမည်မပါလို့ မဲပေးခွင့် မရသူတချို့ရှိသလို တောင်ကိုရီးယားနိုင်ငံမှာလည်း မဲဆန္ဒရှင်တွေကို မဲပေးရာမှာ အခက်အခဲတချို့နဲ့ ကြုံတွေ့ခဲ့ရပါတယ်။  ကမ္ဘာတဝန်းမှာ မြန်မာသံရုံးနဲ့ ကောင်စစ်ဝန်ရုံးရှိတဲ့ မြို့ပေါင်း ၄၀ ကျော်ရှိရာမှာ ၂၀၁၅ အထွေထွေရွေးကောက်ပွဲတုန်းက ပြည်ပရောက် မြန်မာမဲဆန္ဒရှင်တွေ ကြိုတင်မဲပေးခဲ့ကြတဲ့ စုစုပေါင်း အရေအတွက်  ၃၀၀၀၀ လောက်ရှိပါတယ်။ အခု ၂၀၂၀ ရွေးကောက်ပွဲမှာတော့  ပြည်ပမှာ ကြိုတင် ဆန္ဒမဲပေးဖို့  စာရင်းပေးထားသူပေါင်း ၁ သိန်းကျော် ရှိတယ်လို့ ပြည်ထောင်စုရွေးကောက်ပွဲကော်မရှင်က ပြောထားပါတယ်။  ဓာတ်ပုံ- MOFA
1 year Ago
More News
Up