ပြည်တွင်းဘဏ်

December 1, 2021

မြန်မာပြည်တွင်းဘဏ်များတွင် ပြည်သူများငွေထုတ်ယူရ ပိုမိုခက်ခဲလာ

မြန်မာပြည်တွင်းဘဏ်လုပ်ငန်းတွေ ပုံမှန်အတိုင်း ပြန်ဖြစ်တော့မယ်၊ ဘဏ်ငွေထုတ်ယူရခက်တဲ့ ပြဿနာကိုဖြေရှင်းပေးနိုင်ဖို့ ဆောင်ရွက်နေတယ်လို့ စစ်ကောင်စီက ပြောနေပေမဲ့ လက်တွေ့မှာတော့ အများပြည်သူတွေဟာ ဘဏ်အပ်ငွေတွေက ထုတ်ယူဖို့ ပိုခဲယဥ်းလာတာနဲ့ ကြုံတွေ့နေရပါတယ်။

ATM နဲ့ ဘဏ်တွေကနေ ငွေသားထုတ်ယူမှု ကန့်သတ်ချက်နဲ့ အခက်အခဲတွေကို  စက်တင်ဘာလမှာ စတင်ဖြေလျှော့ပေးဖို့ ဆောင်ရွက်နေတယ်လို့ စစ်ကောင်စီ လက်အောက်ခံ ဗဟိုဘဏ် ဒုတိယ ဥက္ကဋ္ဌ ဦး၀င်းသော်က ပြီးခဲ့တဲ့ သြဂုတ်လ အတွင်းမှာ ပြည်တွင်းမီဒီယာ တချို့ကို ပြောကြားခဲ့ပါတယ်။

စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကလည်း စစ်ကောင်စီ အနေနဲ့ ဒီဇင်ဘာလလောက်မှာ  ဒီအခက်အခဲတွေကို ဖြေရှင်းပေးနိုင်ဖို့ ဆောင်ရွက်နေတယ်လို့ မကြာသေးခင်က သတင်းစာရှင်းလင်းပွဲမှာ ပြောခဲ့ပါသေးတယ်။

စစ်တပ်က အာဏာသိမ်းပြီးနောက်မှာ ပြည်သူတွေဟာ ဘဏ်တွေကို အယုံအကြည်နည်းလာပြီး ဘဏ်အကောင့်ထဲက မိမိတို့ရဲ့ ငွေတွေကို ထုတ်ယူဖို့ ကြိုးစားကြရာကနေ ဘဏ်တွေမှာ ငွေသားရှားပါးမှု ကြုံလာပြီး ဘဏ်အသုံးပြုသူတွေကို ငွေလိုသလောက် ထုတ်မပေးနိုင်တော့တဲ့ အခြေအနေဟာ အခုဆိုရင် လပေါင်းများစွာ ရှိနေပါပြီ။

စစ်ကောင်စီဘက်က ဖြေရှင်းပေးမယ်လို့ အကြိမ်ကြိမ် ကတိပေးနေပေမဲ့ လက်ရှိမှာ အများပြည်သူဟာ ATM စက်တွေကနေ ငွေထုတ်ယူလို့ မရသေးသလို၊  ငွေသားထုတ်ယူဖို့အတွက် အွန်လိုင်းကနေ booking လျှောက်ပြီး Token(တုံကင်)ယူရတဲ့စနစ်၊ Phone booking ယူရတဲ့စနစ်တွေနဲ့သာ မိမိဘဏ်အပ်ငွေကို ခက်ခက်ခဲခဲထုတ်ယူနေရပါတယ်။

ငွေထုတ်ယူလိုသူ များတာကြောင့်  system error ဖြစ်တာ၊ အင်တာနက်လိုင်း မကောင်းတာတွေ အမြဲကြုံတွေ့နေရပြီး ငွေထုတ်ယူခွင့်ရရှိဖို့ ခက်ခဲတယ်လို့ ဘဏ်အသုံးပြုသူတွေက ဆိုပါတယ်။

“ATM  စက်တွေက ထုတ်မပေးတာ အတော်ကြာပြီ၊ ငွေထုတ်ချင်ရင် အွန်လိုင်းကနေ ဘိုကင် တင်ရတယ်။ ယူတဲ့သူတွေများလို့ ဘိုကင်ယူဖို့  တစ်စက္ကန့်နောက်ကျရင်ကို မရဘူး။ မရလိုက်တာက များတယ်။ Phone booking လည်း ဒီတိုင်းပဲ ရဖို့မလွယ်ဘူး။ ဖုန်းတွေက ခေါ်မရတာနဲ့၊ မအားတာနဲ့၊ ၀င်ပြီးမကိုင်တာနဲ့၊ အချိန်အရမ်းပေးရတယ်”လို့ ဘဏ်အသုံးပြုသူ တစ်ဦးက ပြောပါတယ်။

ဘဏ်တွေက ငွေထုတ်ယူခွင့်အတွက် အွန်လိုင်း  booking ဝန်ဆောင်မှုရယူနိုင်မယ့် အချိန်ကို အတိအကျ ထုတ်ပြန်ပေးထားခြင်းမရှိတဲ့အတွက်  ငွေထုတ်ယူသူတွေကို အခက်အခဲ ဖြစ်စေပြီး အပလီကေးရှင်းတွေကနေ တစ်ဆင့်ဘိုကင်တင်ရတဲ့အတွက် အသက်ကြီးသူတွေ၊ နည်းပညာ မကျွမ်းကျင်သူတွေလည်း ငွေထုတ် ၀န်ဆောင်မှု ရယူဖို့ ခက်ခဲတယ်လို့ သိရပါတယ်။

“ဘယ်အချိန်တွေပေးမယ်ဆိုတာကို တရား၀င် ထုတ်ပြန်ပေးတာတွေ မရှိဘူး။ သူ ပေးချင်တဲ့ အချိန်တွေ ထပေးတော့ user တွေက အရမ်းအခက်အခဲဖြစ်တယ်။ ဘယ်အချိန်ပေးမလဲ မသိတာကို  စောင့်ယူနေရတာ အချိန်တွေ အတော်အလဟဿ ဖြစ်တယ်။ ပြီးတော့  Kpay agent ကနေ ထုတ်ရင် အရင် ၃ သိန်းပေးတယ် အခု ၂ သိန်းပဲ ထုတ်ပေးတော့တယ်။ ၀န်ဆောင်ခ ၂ ထောင်ပေးရတယ်။ ဒါတောင် ၀န်ထမ်းတွေရဲ့ စစ်ဆေးမေးမြန်းတာ ခံရတယ်။ ကိုယ် မအားလို့ မိသားစု၀င်ထဲက တစ်ယောက်ယောက် ထုတ်ခိုင်းရင်တောင် မရဘူး”လို့လို့ KBZ bank  အသုံးပြုသူ တစ်ဦးက ပြောပါတယ်။

အခုလို  အများပြည်သူအပ်ငွေတွေ ဘဏ်ထဲကနေ ထုတ်ယူရခက်ခဲသလို လိုသလောက် ထုတ်မရသေးတာကြောင့် အများစုက ရာခိုင်နှုန်းတစ်ခုပေးပြီး ပြင်ပမှာ ငွေထုတ်ယူနေကြရဆဲပါ။ လက်တလော အဲဒီစျေးကွက်မှာ ရာခိုင်နှုန်းအနေနဲ့ ၅ ရာခိုင်နှုန်းကနေ ၆ ရာခိုင်နှုန်းကြားမှာ အလဲအလှယ် လုပ်ကြတယ်လို့သိရပါတယ်။

စစ်အာဏာသိမ်းပြီး တစ်လအကြာမှာ စစ်ကောင်စီရဲ့ဗဟိုဘဏ်ဟာ ဘဏ်ငွေထုတ်ယူမှုတွေကို  စတင် ကန်သတ်ခဲ့ပါတယ်။ လူပုဂ္ဂိုလ် တစ်ဦချင်းအပ်ငွေ ထုတ်ယူရာမှာ  ATMကနေ ငွေသားထုတ်ယူမှုကို တစ်ရက်ကို အများဆုံး ၅ သိန်း၊ ဘဏ်စာရင်းကနေ ဘဏ်မှာ ငွေထုတ်ယူမယ်ဆိုရင် လူတစ်ဦးကို တစ်ပတ်အများဆုံး သိန်း၂၀အထိသာ ထုတ်ခွင့်ပေးဖို့ ကန့်သတ်လိုက်ပါတယ်။ ကုမ္ပဏီတွေ ၊အဖွဲ့အစည်းတွေကိုတော့ တစ်ပတ်မှာ အများဆုံး ကျပ် သိန်း၂၀၀အထိ ထုတ်ယူနိုင်တယ်လို့ ကန့်သတ်ခဲ့တာပါ။

ကိုဗစ်ရောဂါနဲ့ဆိုင်တဲ့ အသုံးစရိတ်တွေအတွက် ဖြစ်ရင်တော့ အဲဒီကန့်သတ်ပမာဏထက် ကျော်လွန်ပြီး ငွေထုတ်ယူခွင့်ပေးဖို့ ဘဏ်တွေကို စစ်ကောင်စီ ဗဟိုဘဏ်က ညွှန်းကြားထားပါတယ်။

လက်ရှိ ပြည်တွင်းဘဏ်အများစု တွေကတော့  ATM ၀န်ဆောင်မူကို ရပ်နားထားပြီး တစ်ဦးချင်း ဘဏ်စာရင်းတစ်ခုမှာ တစ်ပတ်ကို အများဆုံးကျပ် ၃ သိန်းကနေ ၅သိန်းထိသာ ငွေထုတ်ယူခွင့် ပေးနေပါတယ်။

စစ်ကောင်စီ ဗဟိုဘဏ် တာ၀န်ရှိသူကတော့ ကန့်သတ်ပမာဏထက်  ကျော်လွန် ထုတ်ပေးနိုင်ဖို့ စီစဥ်နေတယ်လို့ ပြောကြားထားပေမဲ့ လက်ရှိအချိန်ထိတော့ အများပြည်သူဟာ ဘဏ်ငွေ ထုတ်ယူမှု ခက်ခဲနေဆဲပါ။

1 week Ago

August 14, 2021

ပြည်တွင်းဘဏ်များ ဒေဝါလီခံရမှု မဖြစ်နိုင်သေးဟု ငွေကြေးပညာရှင် သုံးသပ်

စစ်ကောင်စီက ရုရှားအကူအညီနဲ့ ဝါဇီ ငွေစက္ကူထုတ်လုပ်တဲ့စက်ရုံကနေ ပိုက်ဆံတွေ ရိုက်ထုတ်တော့မှာဖြစ်တဲ့အတွက် ဘဏ်တွေ ဒေဝါလီခံရတာမျိုး မဖြစ်နိုင်သေးဘူးလို့ ငွေကြေးပညာရှင်တစ်ဦးက သုံးသပ်ပါတယ်။

ကျပ် ၅၀၀၀ တန်နဲ့ ကျပ်  ၁ သောင်းတန်ငွေစက္ကူတွေ ဖျက်သိမ်းမယ်၊ ဘဏ် ၃ ခု ဒေဝါလီခံမယ်ဆိုတဲ့ သတင်းတွေဟာ ကောလာဟလဖြစ်ပြီး  မဟုတ်မှန်ဘူးလို့ စစ်ကောင်စီ လက်အောက်ခံ ဗဟိုဘဏ်က ဩဂုတ်လ ၁၃ ရက်နေ့က ကြေညာထားပါတယ်။ 

ဒီကြေညာချက်နဲ့ပတ်သက်ပြီး ငွေကြေးပညာရှင် ဦးဇော်ဖေဝင်းက “ပြီးခဲ့တဲ့ တစ်ပတ်လောက်အထိကတော့ အကျပ်အတည်းက ရှိနေတယ်။ ရုရှားအကူအညီနဲ့ ဝါဇီစက်ရုံက  ပြန်လည်ပတ်ပြီလေ။ သူတို့ ပိုက်ဆံတွေတော့ ထုတ်တော့မှာပါ။ ဘဏ်တွေကိုလည်း လိုအပ်တာလေးတွေ ဖြည့်ဆည်းပေးမယ်ဆိုရင်  ဘဏ်တွေက ဆက်ပြီးလည်ပတ်သွားမှာပေါ့။ သူတို့ထုတ်တာကလည်း သိပ်အများကြီးတော့ မဖြစ်နိုင်ဘူး။ မျှပေးမယ်ဆိုတော့ ဘဏ်တွေဆီက ပိုက်ဆံထုတ်ရတာ အခက်အခဲရှိဦးမယ်။ သို့သော်လည်း အသင့်အတင့်တော့ လျော့သွားနိုင်တယ်လို့ ယူဆရပါတယ်။ အဲ့ဒါကြောင့် ဘဏ်တွေ ဖျက်သိမ်းရအောင် အခြေအနေမကောင်းတဲ့ အဆင့်အထိ မရောက်သေးဘူးလို့ ယူဆရပါတယ်။”

စစ်ကောင်စီက ဝါဇီစက်ရုံကနေ ပိုက်ဆံရိုက်ထုတ်ပြီးတဲ့အခါ ပြည်တွင်းကဘဏ်တွေ လည်ပတ်ဖို့နဲ့ သူ့လက်အောက်ခံဌာနတွေ လည်ပတ်ဖို့ ငွေသားမျှဝေထုတ်ပေးဖို့ရှိနေပါတယ်။ 

စစ်ကောင်စီက အခွန်ဝင်ငွေမရတာ၊ နိုင်ငံခြားရင်းနှီးမြှုပ်နှံမှုတွေ မရှိတော့တာတွေကြောင့်  စစ်ကောင်စီလက်အောက်ခံဌာနတွေဟာ ဝင်ငွေ မရှိတဲ့အတွက် လုပ်ငန်းလည်ပတ်ဖို့ ဘတ်ဂျက်လို ငွေမြင့်မားနေပြီး ပြည်တွင်းမှာလည်ပတ်ဖို့ ငွေသားရိုက်ထုတ်တဲ့နည်းကို သုံးလာတာဖြစ်ပါတယ်။ 

ငွေသားရိုက်ထုတ်တဲ့နည်းကြောင့် ပြည်တွင်းမှာ ငွေကြေးဖောင်းပွမှုအခြေအနေပိုဆိုးလာပြီး ကုန်ဈေးနှုန်း ပိုတက်လာလိမ့်မယ်လို့ ဦးဇော်ဖေဝင်းက သုံးသပ်ပါတယ်။

“ပိုက်ဆံက ဝါဇီစက်ရုံလည်ပြီဆိုရင် ထုတ်တော့မှာလေ။ ပြည်တွင်းမှာ လည်ပတ်ဖို့ရာ ဘဏ်တွေကို လည်းပေးမယ်၊ အစိုးရဌာနတွေကိုလည်း ပေးမယ်ပေါ့။ တစ်ခုရှိတာက အစိုးရဌာနတွေမှာ ဘတ်ဂျက်လိုငွေက များလာတယ်။ ဘာဖြစ်လို့လဲဆိုတော့  အရင်တုန်းက အခွန်ရတာတွေ နိုင်ငံခြားရင်းနှီးမြှုပ်နှံတာတွေရှိတယ်။ အဲ့ဒါတွေ သိပ်မရတော့ဘူး ဆိုတော့ကာ ပိုက်ဆံထုတ်တဲ့ နည်းနဲ့ပဲ လိုငွေကို ကျားကန်မှာဆိုတော့ ပြည်တွင်းမှာ ကုန်ဈေးနှုန်းတက်တာကတော့ ပိုဆိုး လာနိုင်စရာရှိတယ်။ ဘဏ်တွေကတော့ ပျက်စရာအကြောင်းတော့ မမြင်ပါဘူး။ အဲ့ဒီလို သုံးသပ်ပါတယ်။”

စစ်ကောင်စီက ဝါဇီစက်ရုံကနေ ငွေသားရိုက်ထုတ်မှု ရှိမရှိဆိုတာနဲ့ပတ်သက်ပြီး ဗဟိုဘဏ်ဒုဥက္ကဋ္ဌ ဦးဝင်သော်ကို အကြိမ်ကြိမ်ဆက်သွယ်ပေမယ့် ဖုန်းပြန်လည်ဖြေဆိုတာမရှိခဲ့ပါဘူး။ 

ဗဟိုဘဏ်က ထုတ်ပြန်ချက်မှာ ပုဂ္ဂလိကဘဏ်တွေကို ဝန်ဆောင်မှုပုံမှန်ဆောင်ရွက်ပေးဖို့ ညွှန်ကြားထားတယ်လို့ ဆိုပေမယ့် လက်တွေ့အခြေအနေမှာတော့ ဘဏ်တွေဟာ ATM စက်ထဲကို ငွေသားပုံမှန်ထည့်ပေးတာ၊ တုံကင်စနစ်နဲ့ ဘဏ်စာအုပ်ထဲက ငွေသားထုတ်ပေးတာတွေကိုတောင် မဆောင်ရွက်ပေးနိုင်တော့ပါဘူး။

အရေးပေါ် ငွေသားလိုအပ်သူတွေဟာ ပြင်ပမှာ ဘဏ်စာရင်းထဲကငွေကို ရာခိုင်နှုန်းတစ်ခု အလိုက်ပေးပြီး ငွေသားနဲ့ လဲယူနေရကာ စီးပွားရေးလုပ်ငန်းရှင်တချို့ကတော့ ဘဏ်တွေကနေ ငွေသားထုတ်ဖို့ ခက်နေတဲ့အတွက် လုပ်ငန်းတွေ မလည်ပတ်နိုင်တော့ဘူးလို့ စီးပွားရေးလုပ်ငန်း ရှင်တစ်ဦးက ပြောပါတယ်။

“သူတို့ထုတ်ပြန်ချက်ထဲမှာ ကောလာဟလကြောင့် လူတွေ ရုတ်ရုတ်သဲသဲနဲ့ ပိုက်ဆံ သွားထုတ်နေကြတယ် ဆိုတော့ ဘဏ်တွေကပဲ နေ့တိုင်း ပိုက်ဆံတွေ အများကြီး ထုတ်ပေးနေသလိုလို၊ ငါတို့လည်း ဘဏ်မှာ ပိုက်ဆံထုတ်လို့မရတာလည်း တော်တော်ကြာပြီကွာ။ ဒီကြေညာချက်ကို ငါလည်း နားမလည်နိုင်ဘူး ဖြစ်နေတယ်။ အခုပြဿနာက တပြည်လုံး ရင်ဆိုင်နေရတာ။ ဘဏ်ထဲမှာ အကြီးအငယ်အလတ် ပိုက်ဆံထည့်ထားတဲ့သူတွေ ပြန်ထုတ်လို့ မရလို ရင်ဆိုင်နေရတဲ့ ပြဿနာက တပိုင်း။ အခုအသံထွက်နေတာက ဘဏ်သုံး ခုဖျက်မယ်ဆိုတဲ့ ကောလာဟလ ထွက်နေတယ်။ ကောလာဟလဆိုတာက မယုံကြည်ရသောသတင်း။ ဒါတွေက မဟုတ်မမှန်ပါဘူးဆိုတာ အရင်တုန်းက တခါမှလည်း ကြေညာတာမျိုး မတွေ့ဘူး။  ခေတ်အဆက်ဆက်ကတော့ မဟုတ်ဘူးဆိုရင် ဟုတ်တယ်လို့ လူတွေ ယုံကြည်တဲ့ သဘောကတော့ ဖြစ်နေတယ်။ စိုးရိမ်စရာကတော့ ဖြစ်လာတယ်။ ပြဿနာကတော့ ကျနော်တို့တိုင်းပြည်မှာက ငွေကြေးပြဿနာကတော့ နောက်ပိုင်း ဘာတွေဆက်ဖြစ်မယ်ဆိုတာကတော့ ငွေကြေးပညာရှင်တွေပဲ သိမယ်။ အင်မတန်စိုးရိမ်စရာ အခြေအနေတော့ ရောက်နေပြီဗျ။”

စစ်အာဏာသိမ်းခဲ့တဲ့ ဖေဖော်ဝါရီ ၁ ရက်နေ့ နောက်ပိုင်းကစပြီး  ဘဏ်တွေမှာ ငွေထုတ်ယူမှု နှုန်းထားကို ကန့်သတ်ခဲ့တာပါ။ 

သြဂုတ်လအတွင်း ပြည်တွင်းဘဏ်တချို့ရဲ့ ATM စက်တွေမှာ ငွေသားထည့်သွင်းတာ မရှိသလောက် နည်းပါးလာသလို ဖွင့်မယ်လို့ ကြေညာထားတဲ့ ဘဏ်ခွဲတွေကလည်း ပိတ်ထားပြီး ဝန်ဆောင်မှု မပေးနိုင်တာတွေ ရှိနေပါတယ်။ 

ဘဏ်စာအုပ်ထဲက ငွေသားထုတ်ယူဖို့ တုံကင်စနစ်လို့ ပြောခဲ့ပေမဲ့ လက်တွေ့မှာ တုံကင် အလှည့်ရဖို့တောင် ခက်ခဲနေတယ်လို့ ဘဏ်အသုံးပြုသူတွေက ပြောပါတယ်။

4 months Ago
Up