ပြည်ခိုင်ဖြိုး

August 23, 2021

ကျိုက်ထိုက ပြည်ခိုင်ဖြိုးပါတီ ရပ်ကျေးဥက္ကဋ္ဌ ပစ်သတ်ခံရ

မွန်ပြည်နယ် ကျိုက်ထိုမြို့နယ်၊ မဲရုံလေးကျေးရွာက  ပြည်ထောင်စုကြံ့ခိုင်ရေးနဲ့ ဖွံ့ဖြိုးရေး ပါတီ ရပ်ကျေးဥက္ကဋ္ဌ တစ်ဦး ဩဂုတ် ၂၂ ရက် ညနေပိုင်းမှာ သေနတ်နဲ့ ပစ်သတ်ခံခဲ့ရတယ်လို့ ဒေသခံတွေက ပြောပါတယ်။

ပြည်ခိုင်ဖြိုးပါတီ ရပ်ကျေးဥက္ဋ္ဌ ဦးမြင့်နိုင်ဟာ စိမ်ကလဲ့ကျေးရွာကနေ မဲရုံလေးကျေးရွာ အပြန်လမ်းမှာ အမည်မသိ သေနတ်သမား ၂ ဦးက ဆိုင်ကယ်နဲ့ ‌လာရောက်ပြီး ပစ်သတ်သွားခဲ့တာ ဖြစ်ပါတယ်။

သေနတ်နဲ့ပစ်ခတ်ခံရပြီး‌နောက် ဦးမြင့်နိုင်ဟာ သေနတ်ဒဏ်ရာ ၄ ချက် ရရှိခဲ့ပြီး အ‌ခင်း ဖြစ်ရာ နေရာမှာ သေဆုံးသွားခဲ့တာ ဖြစ်ပါတယ်။

ဦးမြင့်နိုင်ဟာ ကျိုက်ထိုမြို့က အောင်ချမ်းသာ လူမှုကယ်ဆယ်ရေးအဖွဲ့ရဲ့ ပရဟိတလုပ်ငန်း တွေမှာ ဝင်ရောက်လုပ်ကိုင်နေသူဖြစ်တယ်လို့ ဆိုပါတယ်။

ဦးမြင့်နိုင် သေနတ်နဲ့ ပစ်သတ်ခံရပြီးနောက် စစ်ကောင်စီတပ်ဖွဲ့တွေဟာ ကျိုက်ထိုမြို့ပေါ် ရပ်ကွက်တွေမှာ လုံခြုံရေး ပိုမိုတိုးမြှင့်လာတယ်လို့ ဒေသခံတွေက ပြောပါတယ်။

ကျိုက်ထိုမြို့နယ်မှာ‌တော့ အခုတစ်ပတ်အတွင်း သေနတ်နဲ့ ပစ်သတ်ခံရသူ ၃ ဦးထိ ရှိလာခဲ့ပါတယ်။

5 months Ago

March 14, 2020

ပြည်ခိုင်ဖြိုး ပျော်ဘွယ်လွှတ်တော်အမတ် ပုဒ်မ ၅၀၅(ခ) ဖြင့် ထောင်ဒဏ် ၆ လချမှတ်ခံရ

မန္တလေးတိုင်း၊ ရမည်းသင်းခရိုင် ပျော်ဘွယ်မြို့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ တိုင်းဒေသကြီးလွှတ်တော်အမတ် ဦးတင်စိုးအား နိုင်ငံတော်အကြည်ညိုပျက်စေမှုနဲ့ ထောင်ဒဏ် ၆ လ ကျခံစေဖို့ ပျော်ဘွယ်မြို့နယ်တရားရုံးက မတ် ၁၃ ရက်နေ့မှာ အမိန့်ချခဲ့ပါတယ်။  ၂၀၁၈ နိုဝင်ဘာက ပျော်ဘွယ်မြို့နယ် ကြက်တည်ရွာ ဓမ္မလင်္ကာရဘုန်းတော်ကြီးကျောင်းမှာ လွှတ်တော်ရန်ပုံငွေ ခွဲဝေပေးမယ့် အစည်းအဝေးအတွင်း ပျော်ဘွယ်မြို့ အမှတ်(၁) တိုင်းဒေသကြီး လွှတ်တော်အမတ် ဦးတင်စိုး (ပြည်ခိုင်ဖြိုးပါတီ) က နိုင်ငံတော်ကို အကြည်ညိုပျက်စေတဲ့ စကားတွေဟောပြောခဲ့တာကြောင့် ရမည်းသင်းခရိုင် အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဦးညီညီလွင်က တရားလိုပြုလုပ်ပြီး ၂၀၁၈ ခုနှစ် ဒီဇင်ဘာလ ၂၇ ရက်နေ့မှာ နိုင်ငံတော်အကြည်ညိုပျက်စေမှူ ရာဇသတ်ကြီးပုဒ်မ ၅၀၅(ခ) နဲ့ တရားစွဲဆိုခဲ့တာပါ။ ဦးညီညီလွင်က "ကျနော့် ဖေ့စ်ဘွတ်ခ်ကောင့်မှာ ရေးတင်ထားပါတယ်။ လူပုဂ္ဂိုလ် မုန်းတီးလို့လည်း တရားစွဲတာမဟုတ်ပါဘူး၊ ပါတီစွဲနဲ့ တရားစွဲတာလည်း မဟုတ်ပါဘူး၊ ဘာအစွဲမှမပါပါဘူး။ မဟုတ်မမှန်တဲ့ စကားလုံးတွေသုံးပြီး လက်ရှိအစိုးရနဲ့ နိုင်ငံတော်အတိုင်ပင်ခံကို စော်ကားတာကြောင့် တရားစွဲဆိုတာပါ ကျနော်ကိုယ်တိုင်ပဲ တရားလို လုပ်ပြီး တရားစွဲခဲ့တာ တနှစ်ကျော်ကြာခဲ့ပါတယ်" လို့ ဒီဗွီဘီကိုပြောပါတယ်။ အမှတ်  ၁ တိုင်းဒေသကြီးလွှတ်တော်အမတ် ဦးတင်စိုး (ပြည်ခိုင်ဖြိုးပါတီ) အား ပျော်ဘွယ်မြို့နယ်တရားသူကြီး ဦးနေမျိုးထွန်းက ထောင်ဒဏ် ၆ လ ကျခံစေဖို့ မတ် ၁၃ ရက်နေ့မှာ အမိန့်ချမှတ်ခဲ့တာပါ။ မောင်မောင်လင်း
2 years Ago
Up