ပျံလွန်တော်မူ

December 30, 2020

ကျောင်းကုန်းမြို့နယ်၌ ကျောင်းထိုင်ဆရာတော် ရေတွင်းထဲပြုတ်ကျ ပျံလွန်တော်မူ 

ဧရာဝတီတိုင်းဒေသကြီး၊ ကျောင်းကုန်းမြို့နယ်၊ ကိုင်းတာအုပ်စု၊ ကျီးတောကျေးရွာနေ ကျောင်းထိုင်ဆရာတော် တစ်ပါးဟာ  အသုံးမပြုတော့တဲ့ ရေတွင်းဟောင်း နှုတ်ခမ်းပေါ်ထိုင်ပြီး ဖုန်းပြောနေစဉ် ရေတွင်းထဲပြုတ်ကျ ပျံလွန်တော်မူခဲ့တယ်လို့ ရဲတပ်ဖွဲ့ထံက သိရပါတယ်။ ဘုန်းကြီးတစ်ပါး ရေတွင်းထဲပြုတ်ကျသေဆုံးနေကြောင်း သတင်းအရ ကျောင်းကုန်းမြို့မရဲ စခန်းက ဒုရဲအုပ် ထက်ဝေဦးနဲ့ ရဲတပ်ဖွဲ့ဝင်တွေက ဒီဇင်ဘာလ ၂၈ ရက်နေ့က သွားရောက် စစ်ဆေးချိန်မှာ ရေတွင်းထဲမှာ ပျံလွန်တော်မူနေတာကို စစ်ဆေးတွေ့ရှိခဲ့တာပါ။ ပျံလွန်​​တော်​မူခဲ့တဲ့ ကျောင်းထိုင် ဆရာ​တော်​ကို ဒီဇင်ဘာ ၂၇ ရက် မနက် ၁၀ နာရီလောက်မှာ နေ့ဆွမ်းအလှည့်ကျသူအလှူရှင်က ဆွမ်းချိုင့်သွားပို့စဉ် ဆရာတော်ကို မတွေ့တော့လို့ ဆရာတော့်ဖုန်းကို ဆက်ရာမှာလည်း ဆက်သွယ်လို့ မရခဲ့တဲ့အတွက် ကျေးရွာအုပ်ချုပ်ရေးမှူးကို အသိပေးခဲ့​ပြီး လိုက်လံရှာဖွေခဲ့ရာ ခုလို့တွေ့ရှိခဲ့ တာဖြစ်တယ်လို့ ရဲမှတ်တမ်းတွေအရ သိရပါတယ်။ ရေတွင်းဟောင်းအတွင်း မှောက်လျှက်အနေအထားနဲ့ ရေနစ်ပျံလွန်တော်မူနေတာ စစ်ဆေး​တွေ့ရှိရလို့ ဓမ္မတာအတိုင်း သေဆုံးခြင်း ဟုတ်/မဟုတ် စစ်ဆေးနိုင်ဖို့ ကျောင်းကုန်းမြို့နယ် ပြည်သူ့ဆေးရုံသို့ ပို့​ဆောင်ပြီး စစ်ဆေးနေတယ်လို့ ​ကျောင်းကုန်းမြို့မရဲစခန်းက ပြောပါတယ်။ ပျံလွန်တော်မူသွားတဲ့ ကျောင်းထိုင်ဆရာတော်ဟာ သက်တော် (၃၉) နှစ်သာ ရှိသေးပြီး ကွန်ကရစ်နဲ့ ပြုလုပ်ထားတဲ့ ရေတွင်းနှုတ်ခမ်းပေါ်မှာ ထိုင်ကာ နေ့စဉ်ဖုန်းပြောတတ်ပြီး သွေးတိုးရောဂါနဲ့ နှလုံးရောဂါအခံရှိသူဖြစ်တယ်လို့ ဆရာတော်ရဲ့တူတော်စပ်သူထံက သိရပါတယ်။ ဒီဖြစ်​စဉ်​နဲ့ပတ်သက်ပြီး ကျောင်းကုန်းမြို့မရဲစခန်းမှာ သေမှုသေခင်းအမှတ်စဉ်(၇/၂၀၂၀)နဲ့ ဖွင့်လှစ်စစ်ဆေးနေပါတယ်။ သတင်း - မင်းထက်မုန်း (ပုသိမ်)၊ ဓာတ်​ပုံ-ဝင်းကြိုင်(ကျောင်းကုန်း)  
4 months Ago

July 11, 2020

ဦးကိတ္တိသာရ (ရုပ်ရှင်သရုပ်ဆောင်ကျော်ဟိန်း) ပျံလွန်တော်မူ

မြန်မာရုပ်ရှင်လောကမှာ ဆယ်စုနှစ်ပေါင်းများစွာ အောင်မြင်ကျော်ကြားခဲ့တဲ့ သရုပ်ဆောင်ကျော်ဟိန်း (ဦးဇင်း  ကိတ္တိသာရ) သက်တော် ၇၃ နှစ်ဟာ သြစတြေးလျနိုင်ငံ ကမ်ဘာရာမြို့မှာ ဒီနေ့ မြန်မာစံတော်ချိန် ၉ နာရီခွဲလောက်မှာ ပျံလွန်တော်မူခဲ့တယ်လို့ သိရပါတယ်။ ၁၉၄၇ ခုနှစ်မှာ မွေးဖွားခဲ့တဲ့ ကျော်ဌေး ခေါ် သရုပ်ဆောင်အကယ်ဒမီ ကျော်ဟိန်းဟာ အနုပညာလောကမှာ အောင်မြင်မှုတွေ အများအပြား ရရှိခဲ့ပြီး ၂၀၀၈ ခုနှစ်ကစလို့ ရဟန်းဘဝကို ခံယူခဲ့သူလည်း ဖြစ်ပါတယ်။ ဦးဇင်း ဦးကိတ္တိသာရဟာ ၂၀၁၇ ဖေဖော်ဝါရီလကတည်းက နှလုံးသွေးကြောပိတ်ပြီး Heart attack ရခဲ့တဲ့အပြင် လေဖြတ်သွားခဲ့တဲ့အတွက် သုံးလကြာ ဆေးရုံတက် ကုသမှု ခံယူခဲ့ရပါတယ်။ ဒီမနက် ဦးဇင် ဦးကိတ္တိသာရ ပျံလွန်တော်မူခဲ့တာနဲ့ပတ်သက်လို့ လူမှုကွန်ရက်မှာ အနုပညာရှင်တွေနဲ့ ပရိသတ်တွေက ဝမ်းနည်းကြောင်း ရေးသားတာတွေလည်း အများအပြား ရှိခဲ့ပါတယ်။ ဦးကျော်ဟိန်းဟာ ၁၉၇၀-ပြည့်နှစ်ကစလို့ ရုပ်ရှင်မင်းသမီး စန္ဒာနဲ့အတူ ‘ဖူးစာလမ်းဆုံ’ ဇာတ်ကားနဲ့ ရုပ်ရှင်လောကထဲကို ရောက်ရှိခဲ့ပြီး ရုပ်ရှင်သရုပ်ဆောင်အဖြစ် `အကာကအချစ်၊ အနှစ်ကမေတ္တာ´၊ `မွန်းတည့်ချိန်တွင် နေဝင်သည်´၊ `ပန်းမြိုင်လယ်က ဥယျာဉ်မှူး´၊ `ဝေလည်းမွှေး ကြွေလည်းမွှေး´ဇာတ်ကားတွေနဲ့ အကယ်ဒမီ ၄ ကြိမ်ရရှိခဲ့သလို  `မွန်းတည့်ချိန်တွင် နေဝင်သည်´ဇာတ်ကားကို ကိုယ်တိုင် ဒါရိုက်တာအဖြစ် ရိုက်ကူးခဲ့သူ ဖြစ်ပါတယ်။ ဝတ္ထုတို၊ ဝတ္ထုရှည်အချို့ ရေးသားခဲ့သလို တေးစီးရီးအချို့ကိုလည်း သီဆိုထုတ်လုပ်ခဲ့သူ ဖြစ်ပြီး ရုပ်သံကြော်ငြာတွေမှာလည်း သရုပ်ဆောင်ကြေး အများဆုံးရသူ ဖြစ်ခဲ့ပါတယ်။  ဦးဇင်းဘဝနဲ့ ဗိုလ်တထောင် ကျိုက်ဒေးအပ်ဆံတော်ရှင်စေတီမှာ အသိ၊သတိ ကြေးသွန်းရုပ်ပွားတော်ကြီးကိုလည်း တည်ထားခဲ့သူ ဖြစ်ပါတယ်။
10 months Ago
Up