ပဲနွယ်ကုန်းမြို့၌ ဗုံးသီးဟောင်းအလုံး ၉၀ ခန့်တွေ့ရှိ

April 23, 2019

ပဲနွယ်ကုန်းမြို့၌ ဗုံးသီးဟောင်းအလုံး ၉၀ ခန့်တွေ့ရှိ

ပဲခူးတိုင်း၊ ကျောက်တံခါးမြို့နယ်၊ ပဲနွယ်ကုန်းမြို့မှာ ဧပြီ ၂၂ ရက် မွန်းလွဲပိုင်းက ဗုံးသီးဟောင်းအလုံး ၉၀ ကို မြေကျင်းတူးရာက တွေ့ရှိခဲ့ပြီး ခမရ(၃၀၇) တပ်ရင်းသို့ အပ်နှံထားတယ်လို့ ပဲနွယ်ကုန်းနယ်မြေ ရဲစခန်း တာဝန်ရှိသူတဦးက ပြောပါတယ်။ ရန်ကုန်-မန္တလေးကားလမ်းဟောင်းဘေး ဂုဏ်တော်ရပ်ကွက်အတွင်းရှိ ခြံဝင်းတခုအတွင်း အဆောက်အဦဆောက်လုပ်ဖို့ မြေကျင်းတူးရာကနေ ဗုံးသီးဟောင်းတွေ တွေ့ရှိခဲ့တာ လို့ ဆိုပါတယ်။ နယ်မြေရဲ့စခန်း တာဝန်ရှိသူတဦးက "ဗုံးသီးအဟောင်းတွေ တွေ့တာကို ခြံရှင်ကနေ အုပ်ချုပ်ရေးမှူးကို အကြောင်းကြားတယ်။ အုပ်ချုပ်ရေးမှူးကနေတဆင့် ကျနော့်ကို အကြောင်းကြား လို့ သွားစစ်ဆေးပြီး ၃၀၇တပ်ကို အကြောင်းကြားပါတယ်။ တောင်ငူက ဘီအီးတပ်ကို အကြောင်းကြားထားပါတယ်။ စစ်ဆေးမှုတွေကိုသူတို့ပဲ ဆက်လက်ဆောင်ရွက်သွားမှာပါ"လို့ ပြောပါတယ်။ အဆိုပါ ဗုံးသီးတွေဟာ အရှည် ၁၅ လက်မ၊ လုံးပတ် ၁၂ လက်မ၊ အချင်း ၃.၅ လက်မလောက်ရှိပြီး ဘယ်ခတ်ကဗုံးသီး ဖြစ်တယ်ဆိုတာကိုတော့ မသိရှိရသေးပါဘူး။ အဆိုပါဗုံးသီး အလုံး ၉၀ ကို ခမရ ၃၀၇ကတဆင့် မိုင်းရှာဖွေရှင်းလင်းရေးတပ်ဖွဲ့ (ဘီအီး)သို့ လွှဲပြောင်းပေးအပ်ဖို့ စဉ်ဆောင်ရွက်နေပါတယ်။ သတင်း - ကျော်အောင်(ကညွတ်ကွင်း)
2 years Ago
Up