ပဲနွယ်ကုန်း

May 14, 2021

ပဲနွယ်ကုန်းနယ်မြေ ရဲတပ်ဖွဲ့ဝင် ၁ ဦး CDM လှုပ်ရှားမှုတွင်ပါဝင်ပြီး ပြည်သူနှင့်ပူးပေါင်း

ပဲခူးတိုင်း၊ ကျောက်တံခါးမြို့နယ်၊  ပဲနွယ်ကုန်းနယ်မြေ ရဲတပ်ဖွဲ့စခန်းမှ ရဲတပ်ဖွဲ့ဝင် ၁ ဦးဟာ အာဏာဖီဆန်အကြမ်းမဖက်လှုပ်ရှားမှု CDM မှာ ပြည်သူနဲ့ အတူ ပူးပေါင်း ပါဝင်လာပါတယ်။

ကျောင်းစိုးကျေးရွာ နယ်ထိန်း ရဲတပ်သားသီဟဇော်ဟာ မေလ ၁၂ ရက်မှာ CDM မှာ ပါဝင်လာတာဖြစ်ပြီး ဖြူး၊ ပဲနွယ်ကုန်းနယ်မြေရဲတပ်ဖွဲ့စခန်းမှ ပထမဆုံး CDM မှာ ပါဝင်တဲ့ ရဲတပ်ဖွဲ့ဝင်လည်း ဖြစ်ပါတယ်။

ပဲနွယ်ကုန်းနယ်မြေ ရဲတပ်ဖွဲ့စခန်းရှိ စခန်းမှူးနဲ့ နယ်ထိန်းခေါင်းဆောင်တို့ဟာ ဥပဒေမဲ့လုပ်ရပ်တွေ ပြုလုပ်နေပြီး ဒေသခံတွေကို လက်နက်အားကိုးနဲ့ နေစဉ် အနိုင်ကျင့်တာတွေ ရှိနေသလို တပ်ဖွဲ့ဝင်တွေ အပေါ်လည်း အာဏာပြချိန်းခြောက်နေတာကြောင့်  CDM မှာ ပါဝင်သွားတာ ဖြစ်တယ်လို့ ရဲစခန်းနဲ့နီးစပ်သူက ပြောပါတယ်။

နယ်​မြေရဲစခန်းကတော့ ရဲတပ်သားသီဟဇော်နဲ့ ပတ်သက်ပြီး ပစ္စတိုသေနတ်နဲ့ ကျည်ဆန်တွေယူဆောင်သွားတယ်လို့ ဝါဒဖြန့်နေသလို  သူ့ကိုအမှုဖွင့် ဖမ်းဝမ်းထုတ်တာတွေလည်း ရှိလာနိုင်တယ်လို့ ဒေသခံတွေကပြောပါတယ်။

“အခု CDM မှာ ပါဝင်သွားသူဟာ ရဲတပ်သားရာထူးသာဖြစ်တယ်။ဘယ်လိုလက်နက်ခဲယမ်းမှ ယူဆောင်မှုမရှိသလို စခန်းမှာလည်း ပစ္စတိုသေနတ်ရှိတာ  မကြားမိ မမြင်မိဘူး။   အခု CDM မှာ ပါဝင်တဲ့ ရဲတပ်သားအပေါ် အမှုကြီးစေဖို့  လုပ်ကြံမှုဖြစ်နိုင်တယ်”လို့ ဒေသခံ တစ်ဦးက သုံးသပ်ပါတယ်။

ပဲနွယ်ကုန်းနယ်မြေရဲတပ်ဖွဲ့စခန်းဟာ အာဏာသိမ်းပြီးနောက်ပိုင်း ဆိုင်ကယ်စီး ပြည်သူတစ်ဦးကို အကြောင်းမဲ့ သေနတ်နဲ့ ပစ်သတ်ခဲ့ပြီး  လက်နက်တွေ့ရှိတယ်ဆိုပြီး လုပ်ကြံသတင်းတွေ ထုတ်လွှင့်ခဲ့တာ၊ မြို့နေပြည်သူတွေကိုအကြောင်းမဲ့ စစ်ဆေးရိုက်နှိက်တာတွေ ပြုလုပ်နေတဲ့ ရဲခန်း ဖြစ်တယ်လို့ ဒေသခံတွေက ပြောပါတယ်။

4 days Ago

March 29, 2021

ပဲနွယ်ကုန်းမြို့ နွေဦးတော်လှန်ရေးတွင် ကျဆုံးသွားသည့် ကိုကျော်ကျော်၏ စျာပနကျင်းပ

ပဲခူးတိုင်း ပဲနွယ်ကုန်းမြို့မှာ အကြမ်းဖက်ရဲတပ်ဖွဲ့က ပစ်ခတ်လို့  သေဆုံးခဲ့တဲ့ ကိုကျော်ကျော် အသက် ၄၅ နှစ်ရဲ့ ဈာပနကို ဒီကနေ့  မတ်လ ၂၉ ရက် နေ့လယ်မှာ ပဲနွယ်ကုန်းမြို့ ငမော့တော့ သုသာန်မှာ ကျင်းပသ​င်္ဂြိုဟ်ကာ  အရိုးပြာအိုး အုတ်ဂူပြုလုပ်ခဲ့ပါတယ်။

ဒီကနေ့ ကိုကျော်ကျော်ရဲ့ ဈာပနကို ကျန်ရစ်သူ မိသားစုတွေနဲ့ အတူလိုက်ပါပို့ဆောင်သူ ဒေသခံပြည်သူ ၃၀၀၀၀ ကျော်ရှိပါတယ်။

ပဲနွယ်ကုန်းမြို့မှာ မတ်လ ၂၇ ရက်မနက်က ကိုကျော်ကျော်နဲ့   ကိုကျော်သန်းထွန်းတို့နှစ်ဦး ဆိုင်ကယ်သပိတ်က လူစုခွဲပြီး အပြန် နယ်မြေရဲစခန်းမှူး ဦးဆောင်တဲ့ ရဲတပ်ဖွဲ့က ပရိုဘောက်ကားနဲ့ နောက်က သေနတ်နဲ့ လိုက်ပစ်လို့ ဆိုင်ကယ်လဲသွားစဉ် သေနတ်ဒင်တွေ တုတ်တွေနဲ့ ကိုကျော်ကျော်ကိုရိုက်နှက်  လည်ပင်းကို စစ်ဖိနပ်နဲ့နင်း  သေနတ်နဲ့ တေ့ကာ ဝမ်းဗိုက်တစ်ချက် ဘယ်ခြေတစ်ချက်ပစ်ခတ်ခဲ့တာကြောင့် ပွဲချင်းပြီး သေဆုံးသွားခဲ့ရပါတယ်။

ကိုကျော်ကျော်နဲ့ အတူပါလာသူ ကိုကျော်သန်းထွန်းဟာလည်း  ခြေထောက် နှစ်ချက်၊ ဆီးခုံအနီးတစ်ချက်၊ လက်မောင်းတစ်ချက်၊ ဗိုက်တစ်ချက် သေနတ်နဲ့ ပစ်သတ်ခံရ ပေမယ့် ကံကောင်းစွာ အသက်မသေဘဲ  နေပြည်တော်ဆေးရုံမှာ  ခွဲစိတ်ကုသမှုအောင်မြင်ပြီး လက်ရှိ စကားပြောလာနိုင်ပြီလို့ သိရပါတယ်။

ဒီနေ့ ကိုကျော်ကျော်ရဲ့ဈာပနကိုလည်း  ရဲတွေကနောက်မှ လိုက်ပါခဲ့​ပြီး ရဲကားပေါ်မှာတော့ အခင်းဖြစ်တဲ့နေ့က  သေနတ်နဲ့  ပစ်သတ်ခဲ့တဲ့  ဒုရဲအုပ် အောင်ကျော်ဖြိုး၊ ရဲတပ်ကြပ် အောင်ကိုလတ်တို့ကိုပါ  တွေ့မြင်ခဲ့ရတယ်လို့  နာရေးလိုက်ပါပို့ဆောင်သူ မြို့ခံတစ်ဦးက ပြောပါတယ်။

2 months Ago
Up