ပဲဈေးကွက်

June 2, 2022

မန္တလေး ပဲဈေးကွက်တွင် ပဲယင်းဈေးနှုန်း မြင့်တက်

မန္တလေးပဲဈေးကွက်မှာ  ပဲယင်းဈေးနှုန်းဟာ မနှစ်က ကာလတူအချိန်ထက် ၃ တင်းဝင် တအိတ်ကို ငွေကျပ် ၁၅၀,၀၀၀ လောက်အထိ မြင့်တက်နေပြီး ၅ နှစ်အတွင်းမှာ အမြင့်ဆုံးဈေးကို ရောက်ရှိနေတယ်လို့ မန္တလေးမြို့က ပဲကုန်သည်တွေဆီက သိရပါတယ်။ 

၂၀၂၁ ခုနှစ်ပဲရာသီမှာ ပဲယင်း ၃ တင်းဝင် တအိတ်ကို ငွေကျပ် ၁၃၅,၀၀၀ ရှိခဲ့ပြီး အခုအချိန်မှာတော့ ငွေကျပ် ၁၅၀,၀၀၀  အထိ မြင့်တက်နေတာဖြစ်တယ်လို့ သိရပါတယ်။

မန္တလေးက ပဲကုန်သည်တဦးက “ပဲယင်းကို တသိန်းခွဲ ရောက်ဖူးတဲ့နှစ် တခါမှမရှိခဲ့ဖူးပါဘူး။ ပြီးခဲ့တဲ့ ၂၀၂၁ ရာသီမှာ ပဲယင်းဟာ ၁၃၅,၀၀၀ ဈေးပဲရှိခဲ့တယ်။ ဒီနှစ် ၂၀၂၂ ကတော့ စောစောစီးစီးပဲ စံချိန်တင်မြင့်တက်တယ်လို့ ပြောလို့ရတယ်။ ၅ နှစ်အတွင်းမှာ စံချိန်တင်မြင့်တက်လာတာကတော့ မကြုံဖူးသေးဘူး။ ၂၀၂၂ ဇန်နဝါရီက ထွက်ရှိတဲ့ပဲဟာဆိုရင် ဇွန်လဆန်းထဲမှာ  တသိန်းခွဲထိ ရောက်ရှိလာတာကတော့ မကြုံဖူးသေးဘူးလို့ ပြောလို့ရတယ်” လို့ ပြောပါတယ်။

ပဲယင်းကို ပြည်တွင်းမှာလည်း မုန့်လုပ်တဲ့ထဲမှာ ထည့်သွင်းစားသလို ပြုတ်စားကြတာတွေလည်း ရှိပါတယ်။ ပဲယင်းဈေးနှုန်း အခုလို မြင့်တက်လာတာဟာ ပြည်တွင်းစားသုံးသူတွေအတွက် အခက်အခဲဖြစ်သလို တရုတ်က ဈေးနှိမ်ဝယ်ယူမှုတွေလည်း ရှိနေတယ်လို့ မန္တလေးက ပဲကုန်သည်တယောက်က ပြောပါတယ်။

“ပဲယင်းကို တရုတ်၊ အိန္ဒိယတင်မကဘူး၊ ခါတိုင်းနှစ်တွေမှာဆိုရင် ဥရောပနိုင်ငံတွေကိုလည်း ပို့ဆောင်ခဲ့ရတာတွေကိုလည်း ရှိခဲ့ပါတယ်။ အခုဟာက လမ်းခရီးမပေါက်တော့ အစစ်အဆေးများတာနဲ့ တရုတ်ဝယ်လက်က ဟိုလိုမှ ဒီလိုမှနဲ့ဖြစ်နေတော့ အိန္ဒိယ ဝယ်လက်ကိုပဲ အားကိုးရမလို ဖြစ်နေတာပါ။ အရင်လို လမ်းခရီးမှာ အစစ်အဆေးနည်းမယ်၊ တရုတ်ကလည်း နှိမ်မဝယ်ဘူး၊ ကိုယ့်ဘက်က ဈေးကိုင်နိုင်မယ်ဆိုရင်တော့ ဒီထက်ဈေးကောင်းလာနိုင်ဖို့ ရှိနေသေးတယ်။”

ပဲယင်းဟာ ပေါ်ဦးပေါ်ဖျားအချိန်ထက် ၅၀,၀၀၀ ကျော်လောက်အထိ မြင့်တက်လာပြီး စံချိန်တင် မြင့်တက်နေတယ်လို့ မန္တလေးမြို့ ပဲကုန်သည်တွေဆီက သိရပါတယ်။

ပေါ်ဦးပေါ်ဖျားအချိန်  ဇန်နဝါရီလက  ပိဿာ ၆၀ ဝင် ၃ တင်းတအိတ်ကို ငွေကျပ် ၉၈,၀၀၀ ရှိခဲ့ပြီး အခုအချိန်မှာတော့ တအိတ်ကို ငွေကျပ် ၁ သိန်းခွဲလောက်အထိ ဈေးနှုန်းမြင့်တက်လာတာကြောင့် ပေါ်ဦးစအချိန်နဲ့ယှဉ်ရင် ငွေကျပ် ၅၀,၀၀၀ ကျော်အထိ မြင့်တက်လာတာ ဖြစ်ပါတယ်။ 

ပဲယင်းကို မန္တလေးပဲဈေးကွက်အတွင်းမှာ မတ္တရာ၊ စဉ့်ကူး၊ မုံရွာ၊ ပခုက္ကူဘက်တွေကနေ ဝင်ရောက်နေတာ ဖြစ်တယ်လို့ သိရပါတယ်။

8 months Ago

January 19, 2022

မန္တလေး ပဲဈေးကွက်တွင် မြေတောက်ပဲ ပေါ်ဦးပေါ်ဖျား အမြင့်ဈေးဖြင့် စတင်

မန္တလေးပဲ ဈေးကွက်အတွင်းကို မြေတောက်ပဲတွေ စတင်ဝင်ရောက်နေပြီဖြစ်ပြီး ပေါ်ဦးပေါ်ဖျား အချိန်မှာ မနှစ်ကထက် ၃ တင်းဝင်တစ်အိတ်ကို ငွေကျပ်  ၄ သောင်းလောက်အထိ ဈေးနှုန်းမြင့်တက်နေတယ်လို့ မန္တလေး ပဲ၊ နှမ်းကုန်သည်တွေဆီက သိရပါတယ်။

မနှစ်က မြေတောက်ပဲပေါ်ဦးပေါ်ဖျားအချိန်မှာ ၃ တင်းဝင်တစ်အိတ်ကို ငွေကျပ် ၁၀၅,၀၀၀ ကျပ်ရှိခဲ့ပေမယ့် ဒီနှစ်မှာတော့ ၃ တင်းဝင်တစ်အိတ်ကို ငွေကျပ် ၁၄၅,၀၀၀ ပေါက်ဈေးရှိနေတာကြောင့် မနှစ်ကထက် ၄ သောင်း မြင့်တက်နေတာပါ။

“မြေတောက်ပဲဟာ ဇန်နဝါရီလထဲမှာ ပေါ်ဦးပေါ်ဖျားအချိန် မနှစ်က တစ်သိန်းငါးထောင် ရှိတယ်၊ ဒီနှစ်ပေါ်ဦးပေါ်ဖျားဈေးကတော့ တစ်သိန်း လေးသောင်းငါးထောင်ပေါက်ဈေးရှိတယ်။ ၂၀၂၁ နဲ့စာရင်တော့ ၃ တင်းတစ်အိတ်ကို ၄ သောင်းဈေးနှုန်းပိုရတယ်” လို့ မန္တလေးမြို့ ပဲကုန်သည်တစ်ဦးက ပြောပါတယ်။ 

မြေတောက်ပဲဟာ ပူတဲ့ဒေသတွေနဲ့ မိုးများတဲ့ ဒေသ တောင်ပေါ်ဒေသတွေမှာလည်း စိုက်ပျိုးဖြစ်ထွန်းမှုမရှိဘဲ ရာသီဥတု မပူမနွေး အရပ်ဒေသတွေမှာသာ စိုက်ပျိုးထွက်ရှိနိုင်တယ်လို့ သိရပါတယ်။ 

အခုဗန်းမော်ကနေ ထီးချိုင့်မြို့နယ် အောက်ပိုင်းတွေ မတ္တရာစဉ့်ကူးလောက်အထိကို မြေတောက်ပဲ စိုက်ပျိုး မရရှိနိုင်ဘူးလို့ သိရပါတယ်။  

မြေတောက်ပဲကို ချင်းတွင်မြစ် ဝှမ်းတစ်လျောက်က ကလေး၊ ကလေးဝ၊ ဂန့်ဂေါမြို့နယ်တွေဟာ စိုက်ပျိုးအောင်မြင်လေ့ရှိပြီး အိန္ဒိယနိုင်ငံကို အဓိက ထားတင်ပို့ရောင်းချရတယ်လို့ သိရပါတယ်။ 

ပြီးခဲ့တဲ့ ၅ နှစ်လောက်က စတင်ပြီး တရုတ်ပြည်ဈေးကွက်ကိုလည်း စမ်းသပ်တင်ပို့ရောင်းချရာမှာ တရုတ်စားသုံးသူတွေ ကြိုက်နှစ်သက်တာကြောင့် တရုတ်ပြည်ကိုလည်း အနည်းငယ်တင်ပို့နေရတယ်လို့ သိရပါတယ်။

“ချင်းတွင်းမြစ်ဝှမ်းဒေသတွေမှာဆိုရင်တော့ ကလေး၊ ကလေး၀ ဂန့်ဂေါမြို့နယ်တွေမှာ စိုက်ပျိုးထွက်ရှိတယ်။ ပဲစင်းငုံအနေအထားကတော့ ကျနော်တို့ အဓိက အိန္ဒိယ နိုင်ငံကို တင်ပို့တယ်။  လွန်ခဲ့တဲ့ ၅ နှစ်လောက်ကစပြီးတော့ တရုတ်ပြည်ဈေးကွက်ကို တင်ပို့ရင်းနဲ့ တရုတ်စားသုံးသူတွေက နှစ်ခြိုက်လာရင်းနဲ့  တရုတ်ပြည်ဈေးကွက်ကို တင်ပို့နေရတာလည်း ငါးနှစ်လောက်ရှိပါပြီ။ နိုင်ငံကြီးနှစ်နိုင်ငံကနေပြီးတော့ အဓိက ဖောက်သည်အနေနဲ့ တင်ပို့နေရတယ်။  ဒိထက် မကပါဘူး ဥရောပနိုင်ငံတွေနဲ့ အရှေ့အလယ်ပိုင်းနိုင်ငံတွေဆီကိုလည်း အထိုက်အလျောက် တင်ပို့နေရတာတွေလည်းရှိတယ်။ ဒီအရှေ့အလယ်ပိုင်းနိုင်ငံတွေမှာဆိုရင် မြေတောက်ပဲကို တန်ဖိုးထားပြီးတော့ တခြားပဲတွေလို တန်ဖိုးထားပြီးတော့ စားသုံးကြတယ်။ ဈေးလည်း အဲ့ဒီဘက်မှာကြီးတယ်။ အိန္ဒိယနိုင်ငံအနေနဲ့ကတော့ မြေတောက်ပဲ သူတို့လည်း စိုက်တယ်။ မြန်မာပြည်က မြေတောက်ပဲလည်း သူတို့ ဝယ်ယူတယ်” လို့ မန္တလေး ပဲပွဲရုံပိုင်ရှင်တစ်ဦးက ပြောပါတယ်။ 

အိန္ဒိယနိုင်ငံက သန့်စင်အောင်ပြုလုပ်ပြီး တခြားဥရောပနိုင်ငံတွေကိုလည်း တင်ပို့နေရတာ ဖြစ်တာကြောင့် အိန္ဒိယနိုင်ငံလို ကုန်ချောပြုလုပ်ရောင်းချနိုင်ဖို့ကိုလည်း တီထွင်ဆန်းသစ်သင့်တယ်လို့ ကုန်သည်တွေက ဆိုပါတယ်။ မြေတောက်ပဲဟာ တစ်နှစ်မှာ တစ်ရာသီသာ စိုက်ပျိုး ထွက်ရှိတဲ့သီးနှံ ဖြစ်ပါတယ်။

1 year Ago
Up