ပဲခူးရိုးမ

April 2, 2022

ပဲခူးရိုးမတွင် တိုက်ပွဲ ၂ ကြိမ်ဖြစ်ပြီး စစ်ကောင်စီတပ်သား ၁၀ ဦးကျော်သေဆုံး

ပဲခူးတိုင်း၊ တောင်ငူမြိုနယ်၊ ပဲခူးရိုးမတောင်ပေါ်မှာ   ဒေသခံပြည်သူ့ကာကွယ်ရေးတပ်ဖွဲ့နဲ့ စစ်ကောင်စီတပ်တို့ ဧပြီ ၁ ရက်က တိုက်ပွဲ ၂ ကြိမ် ဖြစ်ပြီး  စစ်ကောင်စီတပ်သား  ၁၀ ယောက်ထက်မနည်း သေဆုံးသွားတယ်လို့   ဒေသခံရွာသားတွေထံက သိရပါတယ်။

နေ့လယ် ၂ နာရီလောက်မှာတိုက်ပွဲတကြိမ်  ညနေ ၅ နာရီလောက်မှာ တကြိမ် ၂ ကြိမ်ဖြစ်ပွားခဲ့တာ ဖြစ်တယ်လို့  ပြည်သူ့ကာကွယ်ရေးတပ် တောင်ငူခရိုင်တပ်ရင်း ၃၅၀၁ တပ်ခွဲ ၁ ရဲ့ တာဝန်ရှိသူတဦးက  ဒီဗွီဘီကိုပြောပါတယ်။

“တောင်ငူမြို့နယ်ထဲကို စစ်ကောင်စီတပ်တွေက မနက်အစော လင်းအားကြီး  စစ်ကြောင်းထိုးဖို့တက်လာတာ။ အင်အားက  ၅၀ လောက်ရှိတယ်။ ကျနော်တို့က သတင်းကြိုရထားတော့ သူတို့တက်နိုင်တဲ့နေရာ ၂ နေရာမှာ မိုင်းထောင်တယ်။ ဒါပေမဲ့ သူတို့က ပထမမိုင်းကိုတော့ ကွေ့၀ှိုက်ပြီးကျော်သွားတယ်။ အဲ့ဒါကိုကျော်သွားတော့ ကျနော်တို့က အသင့်စောင့်နေတဲ့နေရာကနေ ချောင်းမြောင်းပစ်ခတ် ကြတယ်။ အဲ့ဒိမှာသူတို့ဘက်က လူ ၂ ယောက်လောက်ကျသွားတယ်။” 

ညနေဘက်တိုက်ပွဲနဲ့ပတ်သက်ပြီးလည်း ဒေသခံပြည်သူ့ကာကွယ်ရေးတပ်ဖွဲ့ တာဝန်ရှိသူက  “ညနေ ၅ နာရီလောက်မှာ လျှော်ဘီမြောင်ဆိုတဲ့နေရာမှာ ကျနော်တို့ဆင်ထားတဲ့ ရှေ့ထွက်မိုင်းကွင်းထဲကို သူတို့ဝင်လာတဲ့အချိန်မှာ မိုင်းလည်းဆွဲ ဝိုင်းလည်း ပစ်ကြတာ၊ အဲ့ဒိနေရာမှာလည်း သူတို့ဘက်က အနည်းဆုံး ငါးယောက် ခြောက်ယောက်လောက်ကျတာကို ကျနော့်မျက်မြင်တွေ့ခဲ့ရတယ်။ နောက်တော့ ဒေသခံတွေကိုမေးကြည့်တော့ ၁၀ ယောက်လောက်ကျတယ်လို့သိရတယ်”လို့ ပြောပါတယ်။

ပြည်သူ့ကာကွယ်ရေးတပ်တွေဘက်ကတော့ ထိခိုက်ဒဏ်ရာရသူ တယောက်မှ မရှိဘူးလို့လည်း ပြောပါတယ်။ 

အဆိုပါတိုက်ပွဲနဲ့ပတ်သက်ပြီး စစ်ကောင်တပ်ဘက်ကသတင်းထုတ်ပြန်တာမရှိသလို တိုက်ပွဲတွေမှာ စစ်သားတွေ ထိခိုက်သေဆုံးမှုနဲ့ ပတ်သက်ပြီး စစ်ကောင်စီပြန်ကြားရေးက သတင်းထုတ်ပြန်လေ့မရှိတာကြောင့် သေဆုံးဒဏ်ရာရတဲ့ အရေအတွက်ကို  ဒီဗွီဘီအနေနဲ့ သီးခြားတည်ပြုနိုင်ခြင်းတော့ မရှိပါဘူး။

စစ်အာဏာသိမ်းပြီးကတည်းက ပဲခူးရိုးမတောင်ပေါ်မှာ သစ်ခိုးထုတ်နေသူတွေက PDF တွေ ရှိတဲ့နေရာတွေကို စစ်ကောင်စီထံ သတင်းပေး ဒလန် လုပ်ပေးရင်းနဲ့ သစ်ခိုးထုတ်ခွင့် ရနေကြပါတယ်။

တိုင်းပြည်ရဲ့ သယံဇာတတွေနဲ့ သစ်တောပြုန်းတီးမှုတွေများလာလို့ PDF တပ်ရင်း ၃၅၀၁ ၊ ဘုရင့်နောင်တပ်ရင်းက မတ်လ ၈ ရက်ကစလို့  ဒေသခံတွေကို ပဲခူးရိုးမတောင်ပေါ်သွားလာခွင့် တားမြစ်ခဲ့သလို တောင်‌ပေါ်တက်လာတဲ့ သစ်ခိုးသမားနဲ့ အယောင်ဆောင် စစ်ကောင်စီတပ်သားတွေကို ရှင်းလင်းမယ်လို့  အမိန့်ထုတ်ထားပါတယ်။ 

10 months Ago

March 16, 2022

ပဲခူးရိုးမပေါ် သစ်ခိုးထုတ်သူများကို ပြည်သူ့ကာကွယ်ရေးတပ်ဖွဲ့ နောက်ဆုံးအကြိမ် သတိပေး

ပဲခူးတိုင်း‌ဒေသကြီး၊ ရေတာရှည်မြို့နယ်၊ ပဲခူးရိုးမပေါ် တရားမဝင် သစ်ခိုးထုတ်နေသူတွေကို မတ် ၁၆ ရက် ဒီကနေ့မှာ ပြည်သူ့ကာကွယ်ရေးတပ်ဖွဲ့ ၃၅၀၀ တပ်ရင်း ၁၊ တပ်ခွဲ ၃ (Y.P.D.F)၊ Sniper အဖွဲ့က နောက်ဆုံးအကြိမ် ထပ်မံသတိပေးလိုက်ပါတယ်။

ဖေဖော်ဝါရီ ၂၅ ရက်က ပဲခူးရိုးမပေါ် တရားမဝင် သစ်ခိုးထုတ်နေသူတွေကို မတ် ၁ ရက် နောက်ဆုံးထားပြီး ပစွည်းတွေ သယ်ယူထွက်ခွာသွားကြဖို့ အသိပေးထားပြီးဖြစ်ပေမယ့် စစ်ကောင်စီတပ်နဲ့ ရဲတွေက တာဝန်ယူပေးထားတဲ့အတွက် သစ်ခိုးထုတ်နေဆဲပါ။

တရားမဝင် သစ်ခိုးထုတ်နေသူတွေဟာ ပဲခူးရိုးမပေါ်ကနေ ကိုးပင်-သာဂရလမ်းမရှိ မြောင်သာလမ်း၊ ချောင်းမငယ်လမ်း၊ အုတ်တွင်းလမ်းတွေကနေ ထပ်မံသစ်ခိုးထုတ်နေတဲ့အတွက် မတ် ၃၁ ရက် နောက်ဆုံးထားပြီး အပြီးထွက်ခွာသွားကြဖို့ ထပ်မံအသိပေးလိုက်တာပါ။

ဆက်လက်ပြီး လိုက်နာမှုမရှိဘဲ ပဲခူးရိုးမထဲကို ကျူးကျော်ဝင်ရောက်လာတဲ့ စစ်ကောင်စီတပ်နဲ့ ရဲတွေ အပါအဝင် ဘယ်သူ့ကိုမဆို ထိရောက်ပြတ်သားစွာ အရေးယူသွားမယ်လို့ ဆိုပါတယ်။

ကိုးပင်ကျေးရွာဒေသခံတဦးက "သစ်ခိုးထုတ်တာကတော့ အခုနောက်ပိုင်း ပိုလုပ်လာကြတယ်။ လိုင်းကြေးပိုက်ဆံ ပေးထားတော့ တရားဝင်ပုံစံမျိုး ကားတွေ၊ ဆိုင်ကယ်တွေနဲ့ကို ပေါ်ပေါ်ထင်ထင် သယ်နေကြတာ။ လမ်းမှာ တပ်နဲ့ ရဲတွေလည်း ပိုက်ဆံပေးထားတော့ မမြင်ချင်ဟန်ဆောင်ပေးထားတယ်။ ကြာရင် သစ်တောပြုန်းတီးသွားနိုင်တယ်” လို့ ပြောပါတယ်။

ပဲခူးတိုင်းဒေသကြီး၊ တောင်ငူခရိုင်၊ ပဲခူးရိုးမတလျှောက်ကို မိဘပြည်သူတွေ အနေနဲ့ ရိုးမပေါ် ဖြတ်သန်းသွားလာတာတွေ မပြုလုပ်ဖို့ တောင်ငူခရိုင် ပြည်သူ့ကာကွယ်ရေးတပ် (PDF)၊ အမှတ် ၃၅၀၁ ဘုရင့်နောင်တပ်ရင်းက မတ် ၈ ရက်မှာ ထုတ်ပြန်ခဲ့ပါတယ်။

စစ်ကောင်စီတပ်တွေဟာ ရိုးမတောင်ခြေက ကျေးရွာတွေမှာ အင်အားအလုံးအရင်းနဲ့ တပ်စွဲပြီး ပဲခူးရိုးမပေါ် အရပ်သားအသွင်ယူကာ ဆိုင်ကယ်၊ ဖောကားတွေ အသုံးပြုပြီး PDF သတင်းတွေကို လိုက်လံရယူနေတာကြောင့် မိုင်းဆွဲတာ၊ ပစ်ခတ်တိုက်ခိုက်တာတွေ လုပ်ဆောင်သွားမယ်လို့ ထုတ်ပြန်ထားပါတယ်။

11 months Ago
More News
Up