ပဲခူးတိုင်း၊ ပဲခူးမြို့မှာ ဒီဇင်ဘာ ၃၁ ရက် မနက် ၅ နာရီလောက်က စစ်ကောင်စီရဲ့ တပ်ကင်းစခန်း နဲ့ ရဲစခန်းနေရာ ၃ ခု မိုင်းဆွဲတိုက်ခိုက်ခဲ့ရတဲ့အတွက် စစ်ကောင်စီတပ်ဖွဲ့ဝင် ၂ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ မြိုခံတွေက ပြောပါတယ်။

စစ်ကောင်စီရဲ့ ပင်မထောက်ပံ့ပို့ဆောင်ရေး တပ်ကင်းဂိတ်၊ ပဲခူးမြို့နယ် အမှတ်  ၂ ရဲစခန်းနဲ့ ကလိ စစ်ဆေးရေးဂိတ်တွေ မိုင်းဆွဲတိုက်ခိုက်ခံခဲ့ရတဲ့အတွက် ထိခိုက်သေဆုံးသူတွေ ရှိခဲ့တာပါ။

ပဲခူးမြို့ခံပြည်သူတဦးက ”စစ်ကောင်စီလုံခြုံရေးဂိတ် ၂ ခုနဲ့ ရဲစခန်းတိုက်ခိုက်ခံရတာ ဟုတ်တယ်။ ၂ ယောက်သေပြီး ၂ ယောက် ဒဏ်ရာရတယ်လို့ ကြားတယ်။ အခုတော့ လုံခြုံရေးတင်းကြပ်ပြီး စစ်ဆေးတာတွေ ပိုလုပ်နေတယ်”လို့ ပြောပါတယ်။

အဆိုပါ ဂိတ်ကင်းစခန်းတွေ တိုက်ခိုက်ခံရပြီးနောက် ပဲခူးမြို့ဝင် မြို့ထွက်ဂိတ်တွေမှာ စစ်ကောင်စီက လူ၊ ဆိုင်ကယ်နဲ့ မော်တော်ယာဉ်တွေကို ပိုမိုစစ်ဆေးလာတဲ့အပြင် လုံခြုံရေးတင်းကြပ်ထားပါတယ်။

နန်းထိုက်အောင်စစ်ဆင်ရေးအမည်နဲ့ ပဲခူးပြည်သူကာကွယ်ရေးအဖွဲ့နဲ့ ဒိုက်ဦးကာကွယ်ရေးတပ်ဖွဲ့က အဲဒီနေ့ မနက် ၄ နာရီ ၄၅ မိနစ်လောက်က စစ်ကောင်စီရဲ့ ပင်မထောက်ပံ့ပို့ဆောင်ရေး တပ်ကင်းဂိတ်ကို မိုင်းခွဲတိုက်ခိုက်ခဲ့ရာ စစ်ကောင်စီရဲ့ တပ်ဖွဲ့ဝင်တပ်သား ၂ ဦးသေဆုံးခဲ့တယ်လို့ ပဲခူး PDFက သတင်းထုတ်ပြန်ထားပါတယ်။

ဒါ့အပြင် မနက် ၄ နာရီ ၅၀ မိနစ်လောက်မှာ ပဲခူးမြို့ အမှတ်  ၂ ရဲစခန်းကို မိုင်းခွဲတိုက်ခိုက်ခဲ့ရာ ထိခိုက်သေဆုံးမှုအခြေအနေကို စုံစမ်းအတည်ပြုနေဆဲဖြစ်သလို မနက် ၄ နာရီ ၅၅ မိနစ်မှာ ကလိစစ်ဆေးရေးဂိတ်ကို မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂ ဦး ထိခိုက်ခဲ့တယ်လို့ ဆိုပါတယ်။

ပြီးခဲ့တဲ့ ဒီဇင်ဘာ ၂၇ ရက် မနက် ၁၁ နာရီလောက်ကလည်း ပဲခူးတိုင်း၊ တောင်ငူခရိုင်၊ ရေတာရှည်မြို့နယ်၊ နားဂျပ်ပင်ကျေးရွာ၊ ဂူတောင်တောရကျောင်းအနီးမှာ စစ်ကောင်စီ စစ်ကြောင်းနဲ့ တောင်ငူခရိုင် PDF တပ်ရင်း ၃၅၀၁၊ တပ်ခွဲ ၄ တို့တိုက်ပွဲဖြစ်ပွားခဲ့ရာ စစ်ကောင်စီဘက်က အရာရှိ ၁ ဦးအပါအဝင် ၆ ဦးသေဆုံးပြီး ၁၂ ဦးဒဏ်ရာရရှိခဲ့တယ်လို့ ပဲခူး PDF က ထုတ်ပြန်ခဲ့ပါတယ်။

အာဏာသိမ်း စစ်ကောင်စီခန့်ဝန်ကြီးချုပ် ဦးဆောင်ပြီး ပဲခူးမြို့မှာ တန်ဆောင်တိုင်ပွဲတော် ကျင်းပခဲ့တယ်လို့ ဒေသခံတွေက ပြောပါတယ်။

တန်ဆောင်တိုင်ပွဲတော် စတင်ကျင်းပတဲ့ နိုဝင်ဘာ ၆ ရက်နေ့မှာ လူစည်ကားခဲ့တာမရှိဘဲ နိုဝင်ဘာ ၇ ရက်နေ့ လပြည့်နေ့မှာတော့ နာမည်ကြီး အဆိုတော်တွေနဲ့ ကျင်းပခဲ့တာကြောင့် ပဲခူး ရွှေမော်ဓောဘုရားဝန်း တခုလုံးနီးပါး လူပြည့်ခဲ့တယ်လို့ ဆိုပါတယ်။

ပွဲတော်မကျင်းပခင် ပွဲတော်ကျင်းပမယ့်နေရာဖြစ်တဲ့ ရွှေမော်ဓောဘုရားဝန်းနဲ့ ဘုရားလမ်း အဝင်အထွက်တွေအပြင် လမ်းကြိုလမ်းကြားနေရာတွေမှာပါ စစ်ကောင်စီတပ်ဖွဲ့ဝင်တွေက စစ်ယူနီဖောင်းတွေနဲ့အပြင် အရပ်ဝတ်တွေနဲ့ပါ ကင်းစောင့်နေတာလည်း ရှိပါတယ်။

မြို့ပြပြောက်ကျားတပ်ဖွဲ့ကတော့ စစ်ကောင်စီကကျင်းပတဲ့ ပွဲတော်ကို မသွားဖို့ သူတို့ရဲ့ လူမှုကွန်ရက်စာမျက်နှာတွေကနေ တိုက်တွန်းထားပေမဲ့ ပြည်သူတွေအနေနဲ့ တော်လှန်ရေးကာလ ရှည်ကြာလာတာနဲ့အတူ ပဲခူးမြို့က အခြေခံလူတန်းစားတွေအနေနဲ့ စီးပွားရေး၊ လူမှုရေး မွန်းကျပ်မှုတွေကြောင့် တင်းမခံနိုင်တော့ဘဲ ထွက်ပေါက်တခုအနေနဲ့ အခုလို လာရောက်တာ ဖြစ်နိုင်တယ်လို့လည်း မြို့ခံတယောက်က ပြောပါတယ်။

စစ်တပ်အာဏာသိမ်းပြီးနောက် ၂၀၂၁ ခုနှစ် ဧပြီလမှာ ပဲခူးမြို့က ဆန္ဒပြနေတဲ့ ပြည်သူတွေကို စစ်တပ်က အကြမ်းဖက်ဖြိုခွင်းခဲ့ပြီး တနေ့တည်း လူ ၈၀ ကျော် သေဆုံးခဲ့တဲ့မြို့လည်း ဖြစ်ပါတယ်။