အန်အယ်လ်ဒီ အစိုးရလက်ထက် ပဲခူးတိုင်းအစိုးရရဲ့  လဝကဝန်ကြီးတာဝန်ယူခဲ့တဲ့ ဦးထွန်းထွန်းဦးရဲ့ သမီးကို  ရန်ကုန်မြို့ ပတ်စ်ပို့ရုံးမှာ စစ်ကောင်စီက ဓားစားခံအဖြစ် ဖမ်းဆီးထားလိုက်ပါတယ်။
ဒီနောက် ဖခင်ဖြစ်သူ လာရောက်အဖမ်းခံရင် ပြန်လွှတ်ပေးမယ်ဆိုပြီး အကျပ်ကိုင်တာကြောင့်  ဖခင်ဖြစ်သူ ဦးထွန်းထွန်းဦးက ဒီဇင်ဘာ ၈ ရက်နေ့က ပြည်-(ဒကစ)ရုံးမှာ သွားရောက်အဖမ်းခံလိုက်တယ်လို့ ပေါင်းတည်ဒေသခံတယောက်က ပြောပါတယ်။

“သူ့သမီးက နိုင်ငံခြားကိုထွက်ဖို့ ပတ်စ်ပို့ရုံးမှာ ပတ်စ်ပို့သွားလုပ်တာ။ အဲ့ဒါကို အဲ့ဒီမှာပဲ ဖမ်းထားလိုက်ပြီး နောက် သူ့အဖေကို ဖုန်းဆက်ခိုင်းပြီး လာအဖမ်းခံခိုင်းတာ။ အဲ့ဒါနဲ့ သူ့အဖေ ဦးထွန်းထွန်းဦးက ပြည်(ဒကစ) ဒေသကွပ်ကဲရေးစစ်ဌာနချုပ်မှာ သွားအဖမ်းခံလိုက်တာ။ သူ့ကို ဖုန်းထဲမှာတော့ ၅၀၅ နဲ့ အမှုဖွင့်မယ်လို့ ပြောခေါ်တာပဲ။ ဒီနေ့ပဲ သွားအဖမ်းခံလိုက်တာ။ သူ့သမီးကိုလည်း အခုထိတော့ ပြန်လွှတ်မပေးသေးဘူး။”

ဦးထွန်းထွန်းဦးဟာ အန်အယ်လ်ဒီအစိုးရ ၂၀၁၅ နဲ့ ၂၀၂၀ ရွေးကောက်ပွဲ ၂ ခုလုံးမှာ ပေါင်းတည်မြို့နယ်ကနေ အရွေးခံခဲ့ရပြီး ပထမ ၂၀၁၅-၂၀၂၀ မှာတော့ ပဲခူးတိုင်း လဝကဝန်ကြီးအဖြစ် ရွေးချယ်ခံခဲ့ရပါတယ်။

စစ်ကောင်စီက အာဏာသိမ်းပြီးကတည်းက သူ့အိမ်ကို အကြိမ်ကြိမ် ဝင်ရောက်ဖမ်းဆီးနေတာကြောင့် ပေါင်းတည်မြို့နယ်ထဲက မထင်ရှားတဲ့ ကျေးရွာ‌လေးတရွာမှာ မိသားစုနဲ့အတူ ပုန်းအောင်နေခဲ့တာရတာ ဖြစ်ပါတယ်။

ဦးထွန်းထွန်းဦးကို ဖမ်းမမိတဲ့အတွက် စစ်ကောင်စီက သူ့ကားကိုသိမ်းယူထားကာ သူ့ကိုလည်း ဝရမ်းထုတ်ထားတယ်လို့  ဒေသခံတွေက ပြောပါတယ်။

ပဲခူးတိုင်း၊ နတ်တလင်းမြို့နယ်၊ ဆင်သေကုန်းကျေးရွာမှာ အောက်တိုဘာ ၂၇ ရက် ဒီနေ့ကျင်းပတဲ့ ကထိန်ပွဲမှာ  မဘသ ဆရာတော်  ဦးဝီရသူက  စစ်အာဏာသိမ်းပြီးနောက် ပထမဆုံးအကြိမ်အဖြစ် တရားဟောပွဲကျင်းပပြီး ဒေသခံရဲတပ်ဖွဲ့က သေနတ် ၅ ချက်ဖောက် အောင်ပွဲခံခဲ့တယ်လို့ ဒေသခံတွေထံက သိရပါတယ်။

ဆင်သေကုန်းကျေးရွာမှာ ကိုကျော်မင်းဦးနဲ့ မခင်ညိုတို့ရဲ့ ရှင်ပြုသိက္ခာထပ် ကထိန်အလှူပွဲ ကို ဒီမနက်ပိုင်းမှာ ပြုလုပ်ခဲ့ပြီးနောက် ဦးဝီရသူက တရားဟောခဲ့ကာ  တရားဟောတဲ့အထဲမှာ ၉၆၉ အယူဝါဒတွေနဲ့  ၉၆၉ အဓိပ္ပါယ်ကိုတွေ ရှင်းလင်းပြောကြားခဲ့တယ်လို့ဆိုပါတယ်။

နတ္တလင်းမြို့နေသူတယောက်က “မနေ့ နေ့လယ်က ရဲကားတစီးက ရဲ နဲ့ စစ်ကောင်စီစစ်သားတွေ အပြည့်နဲ့။ သူ  (ဦးဝီရသူ) က အိမ်စီးကားနဲ့ သူ့ကားပေါ်မှာ မိုက်ကယ်ကျော်မြင့်ပါ ပါလာတယ်၊ ရွာကိုလိုက်ပို့တာ။  ၂၇ ရက်နေ့ ကထိန်က မနက်ပိုင်းပြီးတော့ ၉၆၉ တရားပွဲ ဆက်လုပ်တယ်။ လုပ်တဲ့နေရာကလည်း ဆင်သေကုန်းရွာက (၉၆၉)ကျောင်းမှာ၊ အဲ့ဒိရွာကတရွာလုံးအစိမ်းတွေ၊ NLD အောင်နိုင်ရေး လုပ်တုန်းကလည်း  ခဲတွေနဲ့ထွက်ပေါက်လို့ ပြဿနာတက်ကြသေးတာ။ အဲ့ဒိ(၉၆၉)ကျောင်းက ဘုန်ကြီးတွေက အနီဆို အသေမုန်းတာ၊ အခုလည်း အမုန်းတရားတွေ အဆိပ်အတောက်တွေပဲ ပြောခဲ့မှာပဲ။ အရင်ကတည်းက  သူတရားဟောခဲ့တဲ့ နေရာတွေမှာ ဘာသာရေးပဋိပက္ခတွေ တောက်လျှောက်ဖြစ်နေတာဆိုတော့ အခုလည်း စိုးရိမ်နေရတယ်။ ရွာထဲမှာကလည်း အနီတွေလည်း ရှိတယ်ဆိုတော့၊ သူတို့အတွက်လည်း စိုးရိမ်နေရတာ”လို့ ပြောပါတယ်။

ကထိန်ပွဲကို ပတ်ဝန်းကျင်ကျေးရွာတွေက သံဃာတချို့နဲ့ဒေသခံ ၂၅ လောက် တက်ရောက်ခဲ့ကြပါတယ်။

ဦးဝီရသူဟာ အန်အယ်လ်ဒီ အစိုးရလက်ထက်က အမုန်းတရားတွေကို ဟောကြားတာကြောင့် တရားဟောခွင့်ပိတ်ပင်ခံခဲ့ရပါတယ်။

အမျိုးသားရေးဆရာတော်အဖြစ် လူသိများတဲ့ မန္တလေး မစိုးရိမ်တိုက်သစ် ဆရာတော် ဦးဝီရသူကို ၂၀၁၉ ခုနှစ် ဧပြီလ ၂၉ ရက်နေ့က မြိတ်မြို့မှာ ပြုလုပ်ခဲ့တဲ့ ဟောပြောပွဲနဲ့ မေလ ၅ ရက်နေ့က ရန်ကုန်မြို့တော်ခန်းမရှေ့မှာ ကျင်းပခဲ့တဲ့ ဟောပြောပွဲတွေမှာ အစိုးရအဖွဲ့နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ပုဂ္ဂိုလ်ရေး ထိုးနှက်တဲ့ စကားလုံးတွေသုံးပြီး ဟောပြောခဲ့တာကြောင့် ရာဇသတ်ကြီးပုဒ်မ ၁၂၄(က)နဲ့ ဖမ်းဝရမ်းထုတ်ခဲ့ပါတယ်။ 

ဦးဝီရသူဟာ ဝရမ်းပြေးအဖြစ် ထွက်ပြေးတိမ်းရှောင်နေရာက တနှစ်ကျော်အကြာ  ၂၀၂၀ ရွေးကောက်ပွဲ ကျင်းပခါနီး  နိုဝင်ဘာ ၂ ရက်နေ့က ရန်ကုန် အနောက်ပိုင်းခရိုင်၊ ရဲတပ်ဖွဲ့မှူးရုံးမှာ  လာရောက်အဖမ်းခံခဲ့ပါတယ်။

ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်မှာတော့ ဦးဝီရသူကို  စစ်တပ်က အင်းစိန်ထောင် သီးသန့်ရိပ်သာဆောင်မှာ VVIP အဖြစ်ထားရှိကာ  မေလကစပြီး တပ်မတော်ဆေးရုံသို့ ပို့ဆောင်ခဲ့ပြီးနောက်  စက်တင်ဘာ ၆ ရက်မှာ ပြန်လွှတ်ပေးခဲ့ပါတယ်။