ပေါ့ပ်စတား

A d v e r t i s e m e n t With Us

May 28, 2020

ဆယ်ကျော်သက်ပေါ့ပ်စတား Billie Eilish လူမှုကွန်ရက်ပေါ် Body Shaming အသိပညာပေး (ရုပ်သံ) (ဖေ့စ်ဘွတ်ခ်ရွာ… ဖေ့စ်ဘွတ်ခ်ကမ္ဘာ)

Body Shaming လို့ပြောလိုက်တာနဲ့ ပရိသတ်တွေက တခြားတယောက်ယောက်ရဲ့ ခန္ဓာကိုယ်သွင်ပြင် ဝတာ၊ ပိန်တာ၊ ရှည်တာ၊ ပုတာ စသဖြင့် ပြင်ပသွင်ပြင်ပိုင်းဆိုင်ရာ အားနည်းချက်တွေကို ရှုံ့ချလှောင်ပြောင်တာလို့ သိကြပြီး ဖြစ်မှာပါ။ လူသားတိုင်းမှာ မတူညီကွဲပြားတဲ့ ရုပ်ပိုင်းဆိုင်ရာ ဒါမှမဟုတ် စိတ်ပိုင်းဆိုင်ရာ အားနည်းချက် တခုမဟုတ် တခုတော့ ရှိကြတာပါပဲ။ အကြီးအသေး အနည်းအများ အားနည်းပုံချင်း မတူညီနိုင်ကြပါဘူး။ ဒါနဲ့ ပတ်သက်ပြီး လူမှုပတ်ဝန်းကျင် အသိုင်းအဝိုင်းထဲမှာ မရှိသင့်၊ မပြုမူသင့်တဲ့ အခြေအနေတခုအဖြစ် Body Shaming တိုက်ဖျက်တဲ့ လှုပ်ရှားမှုတွေကို ထင်ရှားကျော် ကြားသူတွေ၊ နာမည်ကျော် အနုပညာရှင်ဆယ်လီတွေကပါ အားတက်သရော ပါဝင်နေကြပါတယ်။ လတ်တလောမှာတော့ ဆယ်ကျော်သက် အနုပညာရှင်ကောင်မလေး Billie Eilish က Body Shaming နဲ့ ပတ်သက်တဲ့ ရုပ်သံအတိုလေးတခုကို သူ့ရဲ့ အင်တာနက်လူမှုကွန်ရက်ပေါ်မှတဆင့် မျှဝေထားခဲ့တာကို တွေ့ရပါတယ်။ သူဟာ ပြီးခဲ့တဲ့ ဂရမ်မီတေးဂီတဆုချီးမြှင့်ပွဲမှာ ဆုအများဆုံး သိမ်းပိုက်သွားနိုင်ခဲ့တဲ့ အသက်အငယ်ဆုံး အနုပညာရှင် ဖြစ်လာခဲ့တာပါ။ အသက် ၁၈ နှစ်အရွယ်သာရှိသေးတဲ့ Billie Eilish ဟာ  ၆၂ ကြိမ်မြောက်အဖြစ် ကျင်းပတဲ့ ဆုချီးမြှင့်ပွဲမှာ Album of the Year ဆုအပါအဝင် ဆုပေါင်း ၅ ဆုရရှိခဲ့တာပါ။ အရင်က Album of the Year ဆုကို Fearless တေးအယ်လ်ဘမ်နဲ့ အဆိုတော် တေလာဆွစ်ဖ်က အသက် ၂၀ အရွယ်မှာ ဆွတ်ခူးခဲ့တာမို့ Billie Eilish က ခုလိုဆွတ်ခူး နိုင်ခဲ့တာဟာ စံချိန်တင်အသက်အငယ်ဆုံး အနုပညာရှင်ဖြစ်လာခဲ့တာပါ။ ခုလတ်တလော မျှဝေလိုက်တဲ့ ရုပ်သံကိုတော့ Not My Responsibility လို့ အမည် ပေးထားပါတယ်။ ရုပ်သံထဲမှာတော့ အီလက်ထရိုဂီတနောက်ခံအသံနဲ့ အစပြုထားခဲ့ပြီးနောက်မှာတော့ သူက အနက်ရောင် ဟူဒီတထည်နဲ့ ရပ်နေခဲ့တာကို တွေ့ရမှာပါ။ အဲဒီနောက်တော့ “ရှင်တို့ ကျမကို သိသလား”၊ “ကျမကို ခုထက်ပိုပြီး သေးသွားစေ ချင်သလား”၊ “ပိုအားနည်းစေလိုသလား”၊ “ပိုနူးညံ့စေလိုသလား”၊ အရပ်ပိုရှည်လာစေချင် သလား”၊ “ပိုတိတ်ဆိတ်စေလိုသလား”အစချီ မေးခွန်းတွေနဲ့အတူ အဝတ်တွေကိုလည်း တထပ်ချင်း ချွတ်ပြခဲ့ကာ နောက်ဆုံး ရေထဲငုပ်လျှိုးသွားခဲ့ချိန်အထိ သရုပ်ပြခဲ့တာကို တွေ့ရပါတယ်။ ရုပ်သံအဆုံးပိုင်းမှာတော့ Billie Eilish က “လူတွေရဲ့ အရွယ်အစားပေါ် မူတည်ပြီး ကျမတို့က သူဘယ်သူဖြစ်တယ်၊ ဘယ်လောက်တန်တယ်ဆိုတာကို ကောက်ချက်ချဆုံး ဖြတ်ကြတယ်။ ကျမက ပိုပြီး ဝတ်ထားမယ်၊ လျှော့ပြီး ဝတ်ထားခဲ့မယ်ဆိုရင် အဲလိုဖြစ်စေ ဖို့ ဘယ်သူက ဆုံးဖြတ်တာလဲ။ အဲဒီအဓိပ္ပါယ်က ဘာလဲ။ ကျမရဲ့ တန်ဖိုးက ရှင်တို့ အမြင် သုံးသပ်ချက်တွေပေါ် အခြေခံရမှာလား။ ဒါမှမဟုတ် ကျမနဲ့ ပတ်သက်တဲ့ ရှင်တို့ရဲ့ အမြင်အပေါ် ရှင်တို့ပဲ တာဝန်ယူရမှာ မဟုတ်ဘူးလား” ဆိုပြီး အဆုံးသတ်ထားပါတယ်။ လတ်တလောမှာတော့ ဒီရုပ်သံဗွီဒီယိုဖိုင်ကို ယူကျုဘ်ပေါ်မှာ ရက်ပိုင်းအတွင်း ဝင် ရောက်ကြည့်ရှုကြတဲ့ အကြိမ်ရေ ၃ သန်းကျော် ရှိနေခဲ့တာ ဖြစ်ပါတယ်။
9 months Ago

May 15, 2020

နာရီပိုင်းအတွင်း ကြည့်ရှုသူသိန်းချီရှိနေသည့် ပေါ့ပ်စတား ကေတီပယ်ရီသီချင်းသစ်-Daisies(ရုပ်သံ) (ဖေ့စ်ဘွတ်ခ်ရွာ… ဖေ့စ်ဘွတ်ခ်ကမ္ဘာ)

ပေါ့ပ်စတား အဆိုတော် ကေတီပယ်ရီရဲ့ နောက်ထွက်မယ့် တေးအယ်လ်ဘမ်ထဲမှာ ပါဝင်မယ့် သီချင်းသစ်တပုဒ်ဖြစ်တဲ့ Daisies ကို ဒီကနေ့ စတင်ဖြန့်ချိလိုက်ပါတယ်။ ဒါဟာ  အယ်လ်ဘမ်သစ်ထဲမှာ ပါဝင်မယ့် သီချင်းတွေအနေနဲ့ အရင်ထွက်ရှိခဲ့ပြီး ဖြစ်တဲ့ "Never Worn White"၊ "Harleys in Hawaii"နဲ့ "Small Talk" သီချင်းတွေ ရဲ့နောက် အသစ်ထွက်ရှိလာခဲ့တာပါ။ ၅ ချပ်မြောက်ထွက်ရှိလာမယ့် အဲဒီအယ်လ်ဘမ်ရဲ့ နာမည်ကိုတော့ ‌ဖော်ပြထားခြင်း မရှိသေးဘဲ လာမယ့် ဩဂုတ် ၁၄ ရက်နေ့မှာ Capitol Records ကနေ ထွက်ရှိလာတော့မှာ ဖြစ်ပါတယ်။ ခက်ခဲတဲ့ မိသားစုဘဝအခြေအနေကြား ဖြတ်သန်းခဲ့ရတဲ့ ကေတီပယ်ရီရဲ့ ပထမဆုံး တေးအယ်လ်ဘမ်ကိုတော့ သူ့နာမည် “Katy Hudson” အမည်နဲ့ထွက်ရှိခဲ့တာပါ။ အဲ ဒီနောက်မှာတော့ သူ့ရဲ့ နာမည်ကြီး တကိုယ်တော်တေးအယ်လ်ဘမ်တွေဖြစ်တဲ့ One of the Boys (2008) ၊ Teenage Dream (2010, reissued in 2012 as Teenage Dream: The Complete Confection) ၊ Prism (2013) ၊ Witness (2017) စတဲ့ တေးအယ်လ်ဘမ်တွေ ထွက်ရှိခဲ့တာပါ။ ဆယ်ကျော်သက်ဘဝကတည်းက ဂီတအနုပညာလှုပ်ရှားမှုတွေနဲ့ လျှောက်လှမ်းလာခဲ့တဲ့ ကေတီပယ်ရီရဲ့ သီချင်းပေါင်းများစွာဟာ ထူးခြားဆန်းသစ်တဲ့ သီဆိုဟန်၊ ရိုက်ချက်တွေနဲ့အတူ ပရိသတ်တွေကို ဖမ်းစားနိုင်ခဲ့ပြီး “Teenage Dream” ၊ “Firework” ၊ “E.T.”(featuring Kanye West) ၊ “Last Friday Night (T.G.I.F.)” ၊ “The One That Got Away” ၊ “Part of Me” ၊ “Roar” ၊ “Dark Horse”(featuring Juicy J) သီချင်းတွေဟာ ထင်ရှားပါတယ်။ သူဟာ ၂၀၁၀ ပြည့်နှစ်မှာတော့ ဗြိတိန်ဟာသသရုပ်ဆောင်မင်းသား Russell Brand နဲ့ လက်ထပ်ခဲ့ပြီး ၂၀၁၂ ခုနှစ်မှာတော့ ကွာရှင်းပြတ်စဲခဲ့ပါတယ်။ လတ်တလောမှာတော့ ၂၀၁၆ ခုနှစ်ကတည်းက တွဲနေခဲ့တဲ့ ဗြိတိန်သရုပ်ဆောင် မင်းသား အော်လန်ဒိုဘလွန်းနဲ့ စေ့စပ်ထားခဲ့တာ ဖြစ်ပါတယ်။ ပြီးခဲ့တဲ့လတုန်းကတော့ ကေတီပယ်ရီဟာ အော်လန်ဒိုဘလွန်းနဲ့ရတဲ့ ကိုယ်ဝန်ရှိ နေပြီဖြစ်ကြောင်း သီချင်းသစ်တပုဒ်ထဲမှာ ဖော်ပြခဲ့တာပါ။ “Never Worn White” လို့ အမည်ရတဲ့ အဲဒီသီချင်းထဲမှာတော့ ကေတီပယ်ရီကို အဖြူရောင်ဝတ်စုံနဲ့ ကိုယ်ဝန်လွယ်ထားခဲ့ပြီး သရုပ်ဆောင်ထားတာကို မြင်တွေ့ကြရမှာပါ။ အသက် ၃၅ နှစ်အရွယ် ရှိနေပြီဖြစ်တဲ့ ကေတီပယ်ရီဟာ ဂရမ်မီဆု ၁၃ ဆုအပါအဝင် တေးဂီတထူးချွန်ဆုပေါင်း ရာနဲ့ချီ ရရှိထားခဲ့ပြီ ဖြစ်ပါတယ်။ လတ်တလောမှာတော့  အသစ်ထွက်ရှိလာတဲ့ သူ့ရဲ့ “Daisies” သီချင်းဟာ ထွက်ရှိပြီး ၂ နာရီအတွင်းမှာပဲ ယူကျုဘ်ပေါ် ကြည့်ရှုသူ ၅ သိန်းနီးပါးရှိနေခဲ့တာ ဖြစ်ပါတယ်။
10 months Ago
Up