ပေါက်မြို့နယ်

June 23, 2022

ပေါက်မြို့နယ် ကင်းမကျေးရွာသား ၃၀ ခန့်ကို စစ်ကောင်စီတပ် ဖမ်းဆီး

မကွေးတိုင်း၊ ပေါက်မြို့နယ်တောင်ပိုင်းမှာ ဇွန် ၁၆ ရက်ကနေ ဇွန် ၂၃ ရက်အထိ စစ်ကောင်စီတပ်တွေ စစ်ကြောင်းထိုးနေပြီး ကင်းမရွာက ဒေသခံပြည်သူ အယောက် ၃၀ လောက်ကို ဖမ်းဆီးထားတယ်လို့ ဒေသခံတွေထံက သိရပါတယ်။

စစ်ကောင်စီတပ်က အင်အား ၁၀၀ ကျော်လောက်နဲ့ စစ်ကြောင်းထိုးနေပြီး ကင်းမရွာက ဒေသခံပြည်သူ ၃၀ လောက်ကို ဖမ်းဆီးထားတယ်လို့ ကင်းမကျေးရွာ ဒေသခံတယောက်က ဒီဗွီဘီကို ပြောပါတယ်။

“တောင်မြင့်ရွာဘက်ကနေ စစ်ကြောင်းစထိုးပြီး အခု ကင်းမရွာမှာ တပ်စွဲထားတယ်။ စစ်(...)၊ ပျူ(...)တွေက ကျေးရွာတွေကို တရွာဝင်တရွာထွက် စစ်ကြောင်းထိုးပြီး နေအိမ်တွေကို ဖောက်ထွင်းဝင်ရောက်ပြီး အဖိုးတန်ပစ္စည်းတွေနဲ့ ငွေကြေးတွေကို ခိုးယူသလို ပြည်သူတွေရဲ့ အိမ်မွေးတိရစ္ဆာန်တွေကိုလည်း သတ်ဖြတ်စားသောက်ကြတယ်။ စစ်ရှောင်တဲတချို့နဲ့ နေအိမ်တွေလည်း မီးရှို့ဖျက်ဆီးခံထားရတယ်။”

ပေါက်မြို့နယ် ရေပြာရွာမှာလည်း ဇွန် ၂၀ ရက် မနက်ပိုင်းက ဒေသခံလူငယ်တယောက်ကို PDF လို့ စွပ်စွဲပြီး စစ်အုပ်စုတွေက ဖမ်းဆီးသွားသလို ဇွန် ၂၁ ရက်မှာလည်း ပလက်ဝမြို့နယ်က ခရီးသွားပြည်သူတယောက်ကို PDF လို့စွပ်စွဲပြီး ဖမ်းဆီးသွားတယ်လို့ သိရပါတယ်။

စစ်ကောင်စီတပ်တွေ စစ်ကြောင်းထိုးနေလို့ ပေါက်မြို့နယ်တောင်ပိုင်းက ကင်းဆုတ်၊ ကင်းမ၊ ဘို့မယ်၊ တောင်ဘက်၊ ဇီးတော၊ ထန်းတောလယ်၊ အင်းငယ်​ဒေါင့်နဲ့ သစ်ညီနောင်ကျေးရွာတွေက ဒေသခံပြည်သူ ၁၀,၀၀၀ နီးပါးလောက် ဘေးလွတ်ရာကို ထွက်ပြေးတိမ်းရှောင်နေရပါတယ်။

စစ်ကောင်စီတပ်တွေ ရွာတွေကိုမီးရှို့ဖျက်ဆီးပြီး စစ်ကြောင်းတွေ ထိုးနေတာကြောင့် မြိုင်မြို့နယ်က ပြည်သူ ၂၀,၀၀၀ လောက်၊ ပေါက်မြို့နယ်က ပြည်သူ ၂၀,၀၀၀ လောက်လောက်၊ ပခုက္ကူမြို့နယ်က ပြည်သူ ၉,၀၀၀ လောက်၊ ရေစကြိုမြို့နယ်က ပြည်သူ ၇,၀၀၀ ကျော်လောက်နဲ့ ဆိပ်ဖြူမြို့နယ်က ပြည်သူ ၆,၀၀၀ ကျော်လောက် နေရပ်စွန့်ခွာ ထွက်ပြေးနေကြရပြီး မိုးကာ၊ အဝတ်အထည်၊ စားနပ်ရိက္ခာနဲ့ ဆေးဝါး အကူအညီတွေ အပ်နေတယ်လို့ သိရပါတယ်။

မကွေးတိုင်းအတွင်းမှာ ပြီးခဲ့တဲ့ မေလတလအတွင်း စစ်ကောင်စီတပ်တွေ ဝင်ရောက်မီးရှို့ ဖျက်ဆီးခဲ့လို့ နေအိမ် ၉၂၄ လုံး မီးလောင်ကျွမ်းခဲ့တယ်လို့ Data For Myanmar က ထုတ်ပြန်ထားပါတယ်။

2 days Ago

ပေါက်မြို့နယ်တွင် ခရီးသွားပြည်သူတဦးကို စစ်ကောင်စီ ဖမ်းဆီး

မကွေးတိုင်း၊ ပေါက်မြို့နယ်မှာ ဇွန် ၂၁ ရက် နေ့လယ်ပိုင်းက ခရီးသွားပြည်သူတယောက်ကို စစ်ကောင်စီတပ်တွေ ဖမ်းဆီးသွားတယ်လို့ ဒေသခံတွေက ပြောပါတယ်။

ချင်းပြည်နယ်၊ ပလက်ဝမြို့နယ်၊ ဆီမီးမြို့၊ ဆင်လံရွာက ခရီးသွားပြည်သူ ကိုကျော်ဆန်းဝင်းကို နေ့လယ် ၁ နာရီခွဲလောက် သရက်တော ပူးပေါင်းစစ်ဆေးရေးဂိတ်မှာ စစ်ကောင်စီတပ်က PDF ဆိုပြီး စွပ်စွဲဖမ်းဆီးသွားတာလို့ ပေါက်မြို့ဒေသခံတယောက်က ပြောပါတယ်။

“စစ်(...)တွေလုပ်တဲ့ပုံက ကျနော်တို့ပြည်သူတွေ ဘယ်မှ မသွားရဲ မလာရဲအောင် အကြောက်တရား ရိုက်ထည့်နေတာဗျ။ ဘာအထောက်ထားမှမရှိဘဲ မတရားဖမ်းဆီးကြတာ။ တရွာနဲ့တရွာ ခရီးသွားလာဖို့တောင် မလွယ်ကူတော့ဘူး။ လူငယ်တွေတွေ့ပြီ ဆိုတာနဲ့ စကားပြော အဆင်မပြေတာတို့၊ လက်ကိုင်ဖုန်းထဲမှာ သူတို့ကိုဆန့်ကျင်တဲ့ စာသားတခုခု မျှဝေထားတာတို့ တွေ့ပြီဆိုတာနဲ့ ဖမ်းတော့တာပဲ။”

ဇွန် ၂၀ ရက် မနက်ကလည်း ပေါက်မြို့နယ် ရေပြာရွာက လူငယ်တယောက်ကို PDF လို့ စွပ်စွဲပြီး စစ်အုပ်စုက ဖမ်းဆီးသွားတယ်လို့  သိရပါတယ်။

မကွေးတိုင်းအတွင်းမှာ စစ်ကောင်စီက အခုနှစ် ဇန်နဝါရီလကနေ ဒီနေ့အထိ အပြစ်မဲ့ပြည်သူ ၄၀၀ ကျော်လောက်ကို မတရားဖမ်းဆီးခဲ့တယ်လို့ သိရပါတယ်။

2 days Ago

June 21, 2022

ပေါက်မြို့နယ် ဒေသခံ ၁ ဦးကို PDF ဟုစွပ်စွဲပြီး စစ်ကောင်စီ ဖမ်းဆီး

မကွေးတိုင်း ပေါက်မြို့နယ်မှာ ဇွန် ၂၀ ရက်မနက်ပိုင်းက ဒေသခံလူငယ် တယောက်ကို PDF အဖြစ် စွပ်စွဲပြီး စစ်ကောင်စီတပ်က ဖမ်းဆီးသွားတယ်လို့ ဒေသခံတွေက ပြောပါတယ်။

ပေါက်မြို့နယ် ရေပြာရွာက ကိုသိန်းမြင့်အောင်ကို ဇွန် ၂၀ ရက် မနက် ၉ နာရီလောက်က ရေပြာရွာ အဝင် ပုသိမ်-မုံရွာလမ်းဆုံမှာ ဖမ်းဆီးသွားပြီး ပေါက်မြို့မရဲစခန်းကို ခေါ်သွားကြတယ်လို့ ရေပြာကျေးရွာဒေသခံတယောက်က ပြောပါတယ်။

“စစ်(...)၊ရဲ(...)နဲ့ ပျူ(...)တွေဟာ ရေပြာရွာအဝင်မှာ ပိတ်ဆို့စစ်ဆေးပြီး ပြည်သူတွေကို နေစဥ် ရက်ဆက်ဖမ်းတယ်။ အထူးသဖြင့် မိဘပြည်သူတွေအနေနဲ့ အပြင်သွားမယ်ဆိုရင် လက်ကိုင်ဖုန်းတွေကို အသေချာရှင်းလင်းရေး လုပ်ပြီးမှ သွားလာကြဖို့နဲ့ ဖြစ်နိုင်ရင် ဖုန်းယူ မ သွားတာတော့ အကောင်းဆုံးပဲ”

ပေါက်မြို့နယ် ကျားပစ်ကန်ရွာက ဒေသခံပြည်သူတယောက်ကိုလည်း ဇွန် ၉ ရက် မနက်ပိုင်းမှာ စစ်ကောင်စီတပ်က ပြည်သူ့ကာကွယ်ရေးတပ်ဖွဲ့ PDF ကို ထောက်ပံ့ပေးသူဆိုပြီး စွပ်စွဲဖမ်းဆီးသွားတယ်လို့ သိရပါတယ်။

မကွေးတိုင်းမှာ အခုနှစ် ဇန်နဝါရီလကနေ ဒီနေ့အထိ ပြည်သူ ၄၀၀ ကျော်ကို စစ်ကောင်စီက ဖမ်းဆီးခဲ့ပါတယ်။

3 days Ago
More News
Up