ပေါက်ကွဲ (ရုပ်သံ)

December 23, 2019

အီကွေဒေါနိုင်ငံရှိ ရီဗန်တာဒိုမီးတောင် ပေါက်ကွဲ (ရုပ်သံ)

အီကွေဒေါနိုင်ငံမှာ ဒီဇင်ဘာ ၂၂ ရက်ညပိုင်းက ရီဗန်တာဒိုမီးတောင်ပေါက်ကွဲပြီး ကျောက်ခဲတွေနဲ့ အနီရောင်ချော်ရည်တွေ တောင်စောင်းတလျှောက် ပန်းထွက်လာခဲ့တယ်လို့ ရိုက်တာ သတင်းဌာနက ဖော်ပြပါတယ်။ အီကွေဒေါနိုင်ငံရဲ့ အမေဇုန်သစ်တောဧရိယာထဲမှာ တည်ရှိတဲ့ ရီဗန်တာဒို မီးတောင်ဟာ အီကွေဒေါရဲ့ အလှုပ်ရှားဆုံး မီးတောင်ရှင်တွေထဲက တခုပါ။ မီးတောင်ရဲ့ အဆက်မပြတ် လှုပ်ရှားမှုသတင်းကို အမေရိကန် အခြေစိုက် မီးတောင်ပြာမှုန်ဆိုင်ရာ အကြံပေးစင်တာ (VAAC) က ဒီဇင်ဘာ ၂၂ ရက် ညက အစီရင်ခံခဲ့တာပါ။  ရီဗန်တာဒိုမီးတောင် နောက်ဆုံးအကြိမ် အကြီးစားပေါက်ကွဲမှု ဖြစ်ခဲ့တာက ၂၀၀၂ ခုနှစ်ကပါ။ အဲဒီအချိန်တုန်းက မီးတောင်နှုတ်ခမ်းဝကနေ လေထဲအမြင့် ၁၇ ကီလိုမီတာအထိ ပြာတွေ မှုတ်ထုတ်ခဲ့လို့ မြို့တော်ကီတိုအထိ ပြာမှုန်တွေ ပျံ့နှံ့ခဲ့တဲ့အပြင် လူပေါင်း ၂ သန်းလောက် အကျိုးသက်ရောက်မှုကို ခံစားခဲ့ရပါတယ်။
2 years Ago

December 1, 2019

SpaceX ၏ ဒုံးကျည်နမူနာတစင်း စမ်းသပ်စဉ် ပေါက်ကွဲ (ရုပ်သံ)

SpaceX ရဲ့ Strarship ဒုံးကျည်နမူနာတခုဟာ ဖိအားဆိုင်ရာ စမ်းသပ်မှုတခုအတွင်း ပေါက်ကွဲ ပျက်စီးသွားခဲ့ရပါတယ်။ စမ်းသပ်မှုကို နိုဝင်ဘာ ၂၀ ရက် ကုမ္ပဏီရဲ့ တက္ကဆက်စက်ရုံမှာ ဆောင်ရွက်ခဲ့တာပါ။ Reuters က ရရှိခဲ့တဲ့ ဗွီဒီယိုဖိုင်တခုမှာလည်း ကုမ္ပဏီရဲ့ ဘိုကာချီကာမှာရှိတဲ့ စက်ရုံအတွင်း ဒုံးကျည်ပျက်စီးသွားပြီးတဲ့နောက် အပျက်အစီး အပိုင်းအစတွေ ပြုတ်ကျလာတာကို တွေ့ရပါတယ်။  ပျက်စီးခဲ့တဲ့ ဒုံးကျည်နမူနာကို Mk1 လို့ နာမည်ပေးထားတာဖြစ်ပြီး ဒါကို SpaceX ရဲ့ စီအီးအို အယ်လွန်မက်က အခုနှစ် စက်တင်ဘာမှာ ထုတ်ဖော် ပြသခဲ့ပါတယ်။ Starship အစီအစဉ်ဟာ လကမ္ဘာနဲ့ မားစ်ဂြိုဟ်တို့ကို လူသားတွေကို ပို့ဆောင်မယ့်အစီအစဉ် ဖြစ်ပြီး ပေါက်ကွဲသွားတဲ့ Mk1 ကိုတော့ ဒီအစီအစဉ်အတွက် ဆက်သုံးတော့မှာ မဟုတ်ဘူးလို့ မက်က ပြောပါတယ်။ သူ့နေရာမှာ နောက်ထပ် ဖန်တီးမှုအသစ်တခုကို အစားထိုး အသုံးပြုသွားမယ်လို့လည်း သူ့ရဲ့ တွစ်တာစာမျက်နှာမှာ ဖော်ပြထားပါတယ်။
2 years Ago
Up