ကရင်ပြည်နယ်၊ မြဝတီမြို့တောင်ဘက်   မြဝတီ-ဝေါလေ ကားလမ်း(သုံးထပ်ကွေ့)အနီး  သြဂုတ် ၅ ရက်နေ့ တိုက်ပွဲမှာ စစ်ကောင်စီတပ်ဖွဲ့ဝင် ၄ ယောာက် ကရင်အမျိုးသားလွတ်မြောက်ရေးတပ်မတော် (KNLA)  ပူးပေါင်းတပ်ဖွဲ့ဆီ လာရောက် ပူးပေါင်းခဲ့တယ်လို့ သိရပါတယ်။

သုံးထပ်ကွေ့ သရက်ပင်စခန်းအနီးမှာ မနေ့မနက် ၈ နာရီလောက်ကစပြီး  နှစ်ဘက်တိုက်ပွဲ အပြင်းအထန်ဖြစ်ပွားခဲ့ပြီး စစ်ကောင်စီဘက်က ၁ ယောက် ကျဆုံး၊ ၄ ယောက် ထိခိုက်ဒဏ်ရာရရှိခဲ့ပြီး KNLA ပူးပေါင်းဘက်ကတော့ ၂ ယောက်  မစိုးရိမ်ဒဏ်ရာတွေ ရရှိသွားပါတယ်။

မြဝတီခရိုင်အတွင်း  KNLA နဲ့ စစ်ကောင်စီတို့ကြား တိုက်ပွဲဖြစ်ပွားနေတာ ၈ လကျော်ကြာလာပြီ ဖြစ်ပြီး စစ်ကောင်စီလက်အောက်မှာ တာဝန် ထမ်းဆောင်လိုခြင်းမရှိတော့တာကြောင့် အခုလို KNLA တပ်ဖွဲ့ဆီ လာရောက်ပူးပေါင်းခဲ့ကြတာဖြစ်ကြောင်း၊ အရာရှိအဆင့်တွေအပါအဝင် တပ်သားတချို့ လာရောက်ပူးပေါင်းချင်နေပေမယ့် တပ်တွင်း ကျန်ခဲ့တဲ့မိသားစုကြောင့် အခက်အခဲ ဖြစ်နေကြတယ်လို့ ပူးပေါင်းလာတဲ့ စစ်ကောင်စီတပ်သားတယောက်က ပြောပါတယ်၊

မြဝတီ-ကော့ကရိတ်လမ်းမှာ စစ်ကောင်စီတပ်ဖွဲ့ဝင်တွေက အရပ်သားကားတွေ အသုံးပြုသွားလာနေကြောင်း၊ KNLA ပူးပေါင်းတပ်ဘက်ကို သတင်းမပို့ဘဲ သွားလာတဲ့ကားတွေကို ပစ်ခတ်သွားမယ်လို့ ကရင်အမျိုးသားအစည်းအရုံး (KNU) တပ်မဟာ၆ တပ်ရင်း ၁၈ တာဝန်ရှိသူက ပြောပါတယ်။

ဩဂုတ် ၂ ရက် မနက်ပိုင်းက မြဝတီ-ဝေါလေ ကားလမ်း(သုံးထပ်ကွေ့)အနီးမှာ  စစ်ကောင်စီရဲ့  တပ်မ ၄၄၊ နဗဟ ၄၄၁ လက်အောက်ခံတပ်တွေ၊ လက်ရုံးတပ်ဖွဲ့တွေက ထိုးစစ်ဆင်ဝင်ရောက် လာတဲ့အတွက် KNLA ပူးပေါင်းတပ်တွေနဲ့ တိုက်ပွဲပြင်းထန်ခဲ့ပြီး စစ်ကောင်စီက Yak 130 လေယာဉ်နဲ့ ညနေ ၄ နာရီလောက် တိုက်ပွဲဖြစ်ပွားရာနေရာကို လေကြောင်းကနေ တိုက်ခိုက်ခဲ့တာကြောင့် ပူးပေါင်းတပ်ဖွဲ့ဝင် ၂ ယောက် မစိုးရိမ်ရဒဏ်ရာ ရရှိခဲ့တယ်လို့ သိရပါတယ်။

ဩဂုတ် ၁ ရက် မနက်ပိုင်းမှာ နယ်ကျော်ဝင်ရောက်လာတဲ့ စစ်ကောင်စီတပ်နဲ့ KNLA ပူးပေါင်းတပ်တို့ တိုက်ပွဲအပြင်းအထန် ဖြစ်ပွားခဲ့ပြီး စစ်ကောင်စီဘက်က အထိအခိုက် အကျအဆုံးများပြီး ဆုတ်ခွာသွားတယ်လို့ သိရပါတယ်။

မြဝတီ-ဝေါလေကားလမ်းမှာ တိုက်ပွဲတွေ နေ့စဉ်ဆိုသလို ဖြစ်ပွားနေပြီး မကြာခဏ လမ်းပိတ်ထားတာကြောင့် ဒေသခံတွေနဲ့ စစ်ရှောင်ပြည်သူတွေ စားဝတ်နေရေး အခက်အခဲ ကြုံနေကြရပါတယ်။

ဒါ့အပြင် စစ်ကောင်စီက ပစ်ခတ်တဲ့ လက်နက်ကြီးကြောင့် စိုက်ပျိုးထားတဲ့ ပြောင်းခင်းတွေလည်း ပျက်စီးဆုံးရှုံးနေရတယ်လို့ ဒေသခံတွေက ပြောပါတယ်။

အမေရိကန်ပြည်ထောင်စု၊ ဂျပန်၊ အိန္ဒိယနဲ့ သြစတြေးလျက ခေါင်းဆောင်တွေဟာ စက်တင်ဘာ ၂၄ ရက်နေ့မှာ ထိပ်သီးအစည်းအဝေးခေါ်ယူပြီး ကိုဗစ်ကာကွယ်ဆေး၊ အခြေခံအဆောက်အအုံနဲ့ နည်းပညာကိစ္စတွေမှာ ပူးပေါင်းဆောင်ရွက်ကြဖို့ ကတိပြုလိုက်ကြပါတယ်။

သြစတြေးလျဝန်ကြီးချုပ် စကော့မောရစ်ဆင်က ကုန်သွယ်ရေးတံခါးဖွင့်ထားမယ့် အင်ဒို ပစိတ်ဖိတ်ဒေသ ဖြစ်ပေါ်ရေး အရေးကြီးတဲ့အကြောင်း အလေးပေးပြောခဲ့ပြီး အိန္ဒိယ ဝန်ကြီးချုပ် နရိန်ဒရာမိုဒီက ဒေသတွင်း ငြိမ်းချမ်းရေးအတွက် အလေးပေးပြောကြားခဲ့ပါတယ်။ 

မောရစ်ဆင်က ဒေသတွင်းမှာ တရုတ်ရဲ့ သြဇာကြီးထွားလာတာနဲ့ ပတ်သက်လာလို့ ဆွေးနွေးရာမှာတော့ အကြပ်ကိုင်မှုတွေမရှိဖို့ လိုတယ်လို့ ပြောသွားပါတယ်။

Quad လို့ အတိုကောက်ခေါ်တဲ့ ဒီအဖွဲ့ဟာ အာရှဒေသမှာ ကိုဗစ်ကာကွယ်ဆေး အလုံးပေါင်း ဘီလီယံနဲ့ချီ ထောက်ပံ့ဖို့ အစီအစဉ်ကိုလည်း ကြေညာဖို့ ရှိပါတယ်။ 

တရုတ်အစိုးရတော့ Quad အဖွဲ့ကြောင့် ဒေသတွင်းမှာ လက်နက်အင်အား ပြိုင်ဆိုင်မှုတွေ ပြင်းထန်လာလိမ့်မယ်လို့ သတိပေးနေပါတယ်။