ပိုလန်

July 2, 2019

ပိုလန်တွင် ငလျင်ကြောင့် ကျောက်မီးသွေးတွင်းလုပ်သား ၃ ဦး သေဆုံး

ပိုလန်နိုင်ငံက ကျောက်မီးသွေးတွင်းတခုမှာ ဇူလိုင် ၁ ရက်နေ့က ငလျင်လှုပ်ပြီးနောက် လုပ်သား ၃ ယောက် သေဆုံးခဲ့တယ်လို့ အဲဒီကျောက်မီးသွေးတွင်းပိုင်ရှင်  PGG ကုမ္ပဏီကပြောပါတယ်။  ဒါဟာ အခုနှစ်အတွင်း ပိုလန်နိုင်ငံရဲ့ ကျောက်မီးသွေးတွင်း လုပ်ငန်းကဏ္ဍမှာ လူအသေအပျောက်အများဆုံး မတော်တဆမှုအဖြစ် မှတ်တမ်းဝင်ခဲ့ပါတယ်။  ခါတိုဝီဆာမြို့က အဲဒီကျောက်မီးသွေးတွင်းမှာ တနင်္လာနေ့ မွန်းလွဲပိုင်းက မဂ္ဂနီကျုဒ့် ၂ ဒဿမ ၆၆ အင်အားရှိတဲ့ မြေငလျင်တခု လှုပ်ခတ်ခဲ့ပါတယ်။  အခင်းဖြစ်တဲ့နေရာမှာ လုပ်သား ၉ ယောက်ရှိခဲ့ပြီး အဲဒီထဲက ဒဏ်ရာရတဲ့ လုပ်သား ၆ ယောက်ကို ဆေးရုံပို့ပေးခဲ့တယ်လို့ PGG ကုမ္ပဏီ တာဝန်ရှိသူတယောက်က ပြောပါတယ်။ အခြေအနေ အသေးစိတ်ကိုတော့ သူက ဆက်မပြောခဲ့ပါဘူး။  ပိုလန်နိုင်ငံဟာ လျှပ်စစ်ဓာတ်အား ဖြန့်ဖြူးဖို့ ကျောက်မီးသွေးကို အဓိက အားထားနေရဆဲပါ။ ဒါပေမယ့် ပြီးခဲ့တဲ့နှစ်တွေမှာ ရင်းနှီးမြှုပ်နှံမှု ကျဆင်းလာတာနဲ့ ကုန်ကျစရိတ်လျော့ချဖို့ ကြိုးစားတာတွေကြောင့် ကျောက်မီးသွေး ထုတ်လုပ်မှု ပမာဏလည်း လျော့ကျလာခဲ့ပါတယ်။  ပြီးခဲ့တဲ့နှစ်က ပိုလန်နိုင်ငံရဲ့ သတ္တုတွင်း မတော်တဆမှုတွေအတွင်း သတ္တုတွင်းလုပ်သား စုစုပေါင်း ၂၁ ယောက်အထိ သေဆုံးခဲ့တယ်လို့ တရားဝင် အချက်အလက်တွေက ဖော်ပြပါတယ်။
2 years Ago

June 14, 2019

ဂျာမနီရှိ အမေရိကန်စစ်သား ၂၀၀၀ ကို ပိုလန်သို့ပို့ရန် စဉ်းစားနေဟု ထရမ့်ပြော

ဂျာမနီနိုင်ငံမှာရှိတဲ့ အမေရိကန်စစ်သား ၂ ထောင်ကို ပိုလန်နိုင်ငံကိုပို့ဖို့ စဉ်းစားနေတယ်လို့ အမေရိကန်သမ္မတ ဒေါ်နယ်ထရမ့်က ဇွန်လ ၁၂ ရက်နေ့မှာ ပြောပါတယ်။ အမေရိကန်နိုင်ငံကို ရောက်လာတဲ့ ပိုလန်သမ္မတ အန်ဒရီဇ် ဒူဒါကို အိမ်ဖြူတော်မှာ လက်ခံတွေ့ဆုံချိန် ထရမ့်က အခုလို ပြောလိုက်တာပါ။ ဒါဟာ ရုရှားရဲ့ ရန်လိုကျူးကျော်နိုင်တဲ့ အလားအလာတွေကို ဟန့်တားဖို့ ပိုလန်ရဲ့ ခြေလှမ်းတခုဖြစ်တယ်လို့ ရိုက်တာသတင်းဌာနက ဖော်ပြပါတယ်။ ရုရှားဟာ ၂၀၁၄ ခုနှစ်က ပိုလန်နိုင်ငံအရှေ့ဘက် အိမ်နီးချင်း ယူကရိန်းနိုင်ငံဆီကနေ ခရိုင်းမီးယားဒေသကို ကျူးကျော်သိမ်းပိုက်ခဲ့ပါတယ်။ ခရိုင်းမီးယားဒေသကို ကျူးကျော်တဲ့ ရုရှားရဲ့လုပ်ရပ်ကို တုံ့ပြန်ဖို့ နေတိုးအဖွဲ့နဲ့ ၂၀၁၆ သဘောတူညီချက်အရ အမေရိကန်ဟာ ပိုလန်နိုင်ငံကို စစ်သားတွေ စေလွှတ်ထားပြီးသားပါ။ ဂျာမနီနိုင်ငံမှာ အမေရိကန်စစ်သား အရေအတွက် ၅ သောင်းအထိ နေရာချထားပြီး အဲဒီထဲက စစ်သား ၂ ထောင်ကို ပိုလန်ကိုစေလွှတ်ဖို့ စဉ်းစားထားတယ်လို့ ထရမ့်က ပြောပါတယ်။ ထရမ့်က ပိုလန်နိုင်ငံကို သွားရောက်လည်ပတ်ဖို့ စဉ်းစားထားတယ်လို့ ပြောပေမယ့် အချိန်ကာလ အတိအကျကိုတော့ မပြောခဲ့ပါဘူး။ ရုရှားရဲ့ Nord Stream 2 သဘာဝဓာတ်ငွေ့ပိုက်လိုင်း စီမံကိန်းကို အရေးယူပိတ်ဆို့ဖို့ သုံးသပ်နေတယ်လို့ ထရမ့်က ဇွန်လ ၁၂ ရက်နေ့မှာ ပြောခဲ့ပြီး စွမ်းအင်အတွက် ရုရှားကို မမှီခိုဖို့ ဂျာမနီကိုလည်း သတိပေးခဲ့ပါတယ်။
2 years Ago
More News
Up