ဧရာဝတီတိုင်း၊ ပုသိမ်မြို့မှာ စစ်ကောင်စီတပ်သားတွေနဲ့ ရဲတွေက ဧည့်စာရင်းမတိုင်တဲ့သူတွေကို ပိုက်ဆံ ၅ သောင်းတောင်တာတွေ ပြုလုပ်နေတယ်လို့ သိရပါတယ်။

ဇန်နဝါရီလဆန်းပိုင်းကစတင်ကာ ညစဉ်ဆိုသလို ရပ်ကွက်တွေကို အလှည့်ကျလိုက်လံ ဧည့်စာရင်းစစ်တာတွေ ပြုလုပ်ပြီး ဧည့်စာရင်းမတိုင်ထားတဲ့ နေအိမ်တွေက တဦးကို ဒဏ်ငွေအဖြစ် ၅ သောင်းတောင်ယူနေတယ်လို့ ဒေသခံတွေက ပြောပါတယ်။

“စစ်သား၊ ရဲ၊ ပြီးတော့ မီးသတ်အရံလား ဘာလာတော့ သေချာမသိဘူး ပြီးတော့ အရပ်ဝတ်တွေနဲ့လည်း ပါတယ် မတိုင်ရင်တော့ တော်တော်ရှင်းယူရတာ ပိုက်ဆံတောင်းတယ်ဆိုတာ ကံကောင်းတာ တချို့ဆို စခန်းကို ခေါ်သွားတာ လူငယ်တွေဆိုပိုဆိုးတယ် ခုက သူတို့လုပ်သမျှ ငြိမ်ခံနေရတယ်” လို့ ပုသိမ်မြို့ခံတဦးက ပြောပါတယ်။

အမှတ် ၄ ရပ်ကွက်က ဒေသခံနေအိမ်တွေကို ဇန်နဝါရီလ ၂၀ ရက်နေ့ ညပိုင်းက ဧည့်စာရင်းစစ်တာတွေ ပြုလုပ်ခဲ့ပြီး လူငယ် ၄ ဦးကို ဖမ်းဆီးခေါ်ဆောင်သွားတယ်လို့ ဆိုပါတယ်။

ဖမ်းဆီးလာတဲ့သူတွေကို စခန်းမှာစစ်ဆေးလို့ နိုင်ငံရေးနဲ့ပတ်သက်တဲ့ အချက်လက်တွေ ဖုန်းထဲမှာမတွေ့ရင် ပိုက်ဆံ ၅ သောင်းကနေ ၃ သိန်းကြားတောင်းပြီး ပြန်လွှတ်ပေးလေ့ရှိတယ်လို့ လုံခြုံရေးအရ အမည်မဖော်လိုတဲ့ ရဲမိသားစုဝင်တဦးက ပြောပါတယ်၊။

စစ်တပ်အာဏာသိမ်းပြီးနောက်ပိုင်း တပ်စွဲခဲ့တဲ့ ဧရာဝတီတိုင်း၊  ပုသိမ်မြို့နယ်  အန်အယ်လ်ဒီ ပါတီရုံးက ကျပ်သိန်းထောင်ချီတန်ဖိုးရှိတဲ့ပစ္စည်းတွေ ပျောက်ဆုံးနေတယ်လို့ ပါတီအသိုင်းအဝန်းကနေ   သိရပါတယ်။

အမှတ် ၅ ရပ်ကွက်၊ မရမ်းချိုလမ်းမှာရှိတဲ့ အန်အယ်လ်ဒီပါတီရဲ့ မြို့နယ်ရုံး ၃ ထပ်အဆောက်အအုံက ပစ္စည်းတွေအားလုံး အခိုးခံလိုက်ရတာဖြစ်ပါတယ်။

အန်အယ်လ်ဒီပါတီနဲ့ နီးစပ်သူတဦးက “ရုံးက ၃ ထပ်လုံးမှာရှိတဲ့ ပစ္စည်းတွေ အခိုးခံရတာ ခုဆို အခွံပဲရှိတော့တယ်။ အဲဒီရုံးက ရဲစခန်းနဲ့ မျက်နှာချင်းဆိုင်မှာရှိတာ အဲကွန်းတွေပါ ဖြုတ်ခိုးတာခံရတာ ခုခေတ်ပေါက်ဈေးနဲ့ဆို အားလုံး သိန်း ၂၅၀၀ လောက်ရှိမယ်၏ ပျောက်နေတဲ့ ပစ္စည်းတွေက”လို့ ပြောပါတယ်။

ပျောက်ဆုံးသွားတဲ့ပစ္စည်းတွေထဲမှာ ကွန်ပျူတာ၊ တီဗွီ၊ ဆောင်းဘောက်၊ အသံချဲ့စက်၊ ရေအေးပေးစက်နဲ့ ရုံးမှာ တပ်ဆင်ထားတဲ့ အဲကွန်း ၁၁ လုံး စတာတွေ ပါဝင်တယ်လို့ ဆိုပါတယ်။ 

အန်အယ်လ်ဒီပါတီရဲ့ မြို့နယ်ရုံးမှာ စစ်တပ် ဝင်ရောက်တပ်စွဲပြီး နောက်ပိုင်း အောက်တိုဘာ ၂၉ ရက် မနက်အစောပိုင်းက ဗုံးပေါက်ကွဲမှု ဖြစ်ပွားခဲ့ပါတယ်။