ပုသိမ်ဆေးရုံကြီး

March 22, 2021

ဆေးရုံအုပ်ကြီးကိုဖမ်းဆီးပြီးနောက် ပုသိမ်ဆေးရုံပြန်ဖွင့်

 စစ်အာဏာသိမ်းပြီးနောက်ပိုင်း ပိတ်ထားခဲ့တဲ့ ပုသိမ်ဆေးရုံကြီးကို ဆေးရုံအုပ်ကြီး ဒေါက်တာ သန်းမင်းထွဋ် အဖမ်းခံရပြီးနောက်ပိုင်း မတ်လ ၁၉ ရက်နေ့ကစတင်ကာ ပြန်လည်ဖွင့်လှစ် လိုက်တယ်လို့ CDM ပြုလုပ်နေတဲ့ ဝန်ထမ်းတွေထံက သိရပါတယ်။

အာဏာသိမ်းစစ်တပ်ရဲ့ လက်အောက်မှာ အမိန့်မနာခံလိုတာကြောင့် ဆေးရုံအုပ်ကြီး ဒေါက်တာသန်းမင်းထွဋ်က ပိတ်ထားခဲ့ပေမယ့် ဆရာကြီး အဖမ်းခံရပြီးနောက်ပိုင်း ခုလိုပြန်လည်ဖွင့်လှစ်ခဲ့တဲ့ အပေါ် ပြည်သူတွေအကြားဝေဖန်မှုတွေလည်း ရှိနေပါတယ်။

"ဆရာကြီးကိုယ်တိုင် ဒီစစ်အာဏာရှင်ကို လက်မခံဘဲ ပိတ်ထားခဲ့တာ ဒါပေမဲ့ဆရာကြီး အဖမ်းခံရတော့ ချက်ခြင်းဆိုသလို ပြန်ဖွင့်လိုက်တယ်၊ တော်တော်သစ္စာမဲ့တဲ့ လုပ်ရပ်ပါ။ ဒုဆေးရုံအုပ်က ဦးဆောင်ပြီး ပြန်ဖွင့်တာပါ''လို့ မြို့ခံနိုင်ငံရေးတက်ကြွလှုပ်ရှားသူတစ်ဦးက ဒီဗွီဘီကိုပြောပါတယ်။

လက်ရှိအချိန်မှာ ပုသိမ်ပြည်သူ့ဆေးရုံကြီးကို အထူးကုဆရာဝန်ကြီး တချို့နဲ့ စစ်တပ်က ဆရာဝန် သူနာပြုတွေလာရောက်ပြီး အရေးပေါ် ဌာနကိုသာ ဖွင့်လှစ်ထားတယ်လို့ သိရပါတယ်။

ပုသိမ်ဆေးရုံကြီးက ဆရာဝန်တွေနဲ့ ကျန်းမာရေးဝန်ထမ်းအများစုကတော့ CDM ပြုလုပ်နေဆဲဖြစ်ပြီး အလုပ်ပြန်ဝင်ဖို့အတွက် ဖိအားပေးတာမျိုးတွေလည်း ရှိတယ်လို့ ဝန်ထမ်း တစ်ဦးက ပြောပါတယ်။

ပုသိမ်ပြည်သူ့ဆေးရုံအုပ်ကြီး ဒေါက်တာ သန်းမင်းထွဋ်ကိုတော့ တိုင်းကောင်စီရုံးမှာ အစည်းဝေးရှိတယ်ပြောဆိုကာ မတ်လ ၁၂ ရက်နေ့က ခေါ်ဆောင်ဖမ်းဆီးသွားတာဖြစ်ပြီး ခုချိန်ထိ မိသားစုနဲ့ အဆက်သွယ်မရသေးဘူးလို့ သိရပါတယ်။

10 months Ago

July 12, 2020

အဆိုတော် လင်းလင်းနှင့် ဇနီးချစ်သုဝေ ပုသိမ်ဆေးရုံကြီးကို သိန်း ၂၀၀ လှူ ဒါန်း

ဧရာဝတီတိုင်းဒေသကြီး၊ ပုသိမ်မြို့၊ ခုတင် ၅၀၀ ပြည်သူ့ဆေးရုံကြီးကို ဇူလိူင် ၁၁ ရက်နေ့ နေ့လယ်ပိုင်းက အဆိုတော်လင်းလင်း နဲ့ ဇနီးဖြစ်သူ ချစ်သုဝေ တို့လာရောက်ပြီး ငွေကျပ်သိန်း ၂၀၀ လှူဒါန်းခဲ့တယ်လို့ သိရပါတယ်။ အဆိုတော် လင်းလင်းနှင့် ဇနီး ချစ်သုဝေတို့ဟာ ခေတ်သစ်ဖောင်ဒေးရှင်းအနေနဲ့ ကိုဗစ်-၁၉ ကာလအတွင်း ကျန်ရှိတဲ့ အလှူငွေလက်ကျန်ကို ပုသိမ်ဆေးရုံအုပ်ကြီး ဒေါက်တာသန်းမင်းထွဋ်ဆီ လာရောက်လှူဒါန်းခဲ့တယ်လို့ ချစ်သုဝေက သူ့ရဲ့ဖေ့စ်ဘွတ်ခ်စာမျက်နှာမှာ ရေးသားဖော်ပြထားပါတယ်။ ဧရာဝတီတိုင်း သဲကုန်းအုပ်စု အုန်းချောင်းကျေးရွာမှာ ကျေးလက်ဆေးပေးခန်း ဆောက်လုပ်ဖို့ ငွေကျပ်၂၀၀ လှူဒါန်းပေးခဲ့တာလို့ ဆိုပါတယ်။ ကုန်းလမ်း ရေလမ်းနဲ့သွားလာရတဲ့ ဧရာဝတီတိုင်း သဲကုန်းအုပ်စု ကျေးရွာ ၇ ရွာအတွက် သားဖွားခန်းနဲ့ ကျေးလက်ဆေးခန်းလေးမှာ အလွန်လိုအပ်လှတဲ့ ကျန်းမာရေးလိုအပ်ချက် ဖြစ်တယ်လို့ ချစ်သုဝေက ရေးသားဖော်ပြထားပါတယ်။ ကျန်းမာရေးလိုအပ်ချက်တွေရှိနေတဲ့ ခရီးလမ်းပန်း သွားလာရခက်ခဲတဲ့နေရာတွေမှာ တာဝန်ထမ်းဆောင်နေတဲ့ တာဝန်ကျဆရာမလေးတွေရဲ့ လုပ်ငန်းခွင်လုံခြုံမှု၊ ကာကွယ်ဆေးထိုးတာ၊ သားဖွားတာ၊ ကျန်းမာရေးစောင့်ရှောက်မှုပေးတာ၊ ကျန်းမာရေးအသိပညာပေး ဟောပြောပွဲတွေ စတာတွေကို ဆောင်ရွက်နိုင်မယ်လို့ ဆိုပါတယ်။ အဆိုတော် လင်းလင်းနဲ့ ချစ်သုဝေတို့ ဇနီးမောင်နှံက ကျန်းမာရေးလိုအပ်ချက်တွေရှိနေတဲ့ ခရီးလမ်းပန်း သွားလာရခက်ခဲတဲ့နေရာတွေမှာ တာဝန်ထမ်းဆောင်နေတဲ့ ဆရာမတွေနဲ့လည်း ဓာတ်ပုံတွဲရိုက်ခဲ့ပါတယ်။ သတင်း - မင်းထက်မုန်း(ပုသိမ်)၊ ဓာတ်ပုံ - ချစ်သုဝေ Facebook
2 years Ago
More News
Up