ပုလဲ PDF

November 2, 2021

ပုလဲတွင် စစ်ကောင်စီတပ်နှင့် PDF အဖွဲ့ တိုက်ပွဲဖြစ်၊ ဘုတလင်က ဒလန်တစ်ဦး အသတ်ခံရ

စစ်ကိုင်းတိုင်း ပုလဲမြို့နယ်အတွင်း စစ်ကောင်စီတပ်နဲ့ ပုလဲပြည်သူကာကွယ်ရေးတပ် (ပုံတောင်နဂါးတပ်) တို့ နွယ်ရှောက်ကျေးရွာအနီးမှာ နိုဝင်ဘာ ၁ ရက်နေ့ ည ၁၂ နာရီကျော်လောက်က တိုက်ပွဲဖြစ်ပွားခဲ့တယ်လို့ ဒေသခံတွေဆီကနေ သိရပါတယ်။

“မနေ့ညက ကျနော်တို့ ပုံတောင်နဂါး အထူးတပ်နဲ့ဖြစ်တာဗျ။ နွယ်ရှောက်က စစ်ကောင်စီ သတင်းပေးဒလန်ကို ရွာသား‌နှစ်ယောက်က ဆဲဆိုတာကြောင့် အဲဒလန်က ပုလဲရဲစခန်းက ရဲနဲ့ စစ်သားကိုခေါ်တယ်။ အဲဒီရွာအသွားကို ကျနော်တို့ တိုက်ပွဲမဖြစ်သေးဘူး။ အဲရွာကအပြန်မှာ ကျနော်တို့ အထူးတပ်နဲ့ဖြစ်တာ။ သူတို့ဘက်က မြို့နယ်မှူးအဆင့်ရှိသူနဲ့ တပ်သား အများအပြားထိခိုက် ဒဏ်ရာရှိတာတွေရှိတယ်လို့ ကြားရတယ်ဗျ။ ကျနော်တို့ဘက်ကတစ်ယောက် ပျောက်ဆုံးနေသေးတယ်။ သေသလား၊ ရှင်သလား အတည်ပြုလို့ မရသေးဘူး။ လက်ရှိအချိန်အထိ ကျနော်တို့ ရှာဖွေနေဆဲဖြစ်တယ်” လို့ ပုလဲပြည်သူကာကွယ်ရေးတပ်က ဗိုလ်နဂါးက ပြောပါတယ်။

အဲဒီတိုက်ပွဲမှာ Double-Cubကား တစ်စီး ပျက်စီးခဲ့သလို စစ်ကောင်စီဘက်က အများအပြား ကျဆုံးတာတွေလည်း ရှိတယ်လို့ ဒေသခံ ပြည်သူတွေဆီက သိရပါတယ်။

ဘုတလင်မြို့နယ်၊ မောင်းထောင်ကျေးရွာမှာလည်း ဒလန်ဆိုပြီး အမည်ကျော်ကြားသူတစ်ဦး နိုဝင်ဘာ ၁ ရက်နေ့ ညနေ ၆ နာရီလောက် သေနတ်နဲ့ ပစ်ခတ်ခံခဲ့ရတယ်လို့ ဒေသခံတွေက ပြောပါတယ်။

“အိမ်ထဲဝင်ပစ်ခဲ့တာဗျ၊ သေနတ် ၆ ချက်ပစ်ခဲ့တယ်ပေါ့။ ဘာကြောင်ပစ်ခဲရတာလဲဆိုတော့ ဒီကောင်က ကျနော်တို့ PDF ကလေးတွေ စစ်ကောင်စီလာတဲ့လမ်းကို မိုင်းထောင်ရာမှာ ကလေးတွေကို ကြိမ်းမောင်းပြီး စစ်ကောင်စီကိုခေါ်ပြီး မှိုင်းတွေ ဖြုတ်ခိုင်တာတွေလုပ်ခဲ့တယ်။ နောက်ပြီး ‌ကျေးရွာအတွင်းက နိုင်ငံရေးတက်ကြွတဲ့ ကလေးတွေကို စစ်ကောင်စီကို သတင်းပေး ဖမ်းခိုင်းတာတွေ လုပ်ခဲ့တာကြောင့် အခုလိုရှင်းလိုက်ရတာပါ။ သေသလား၊ ရှင်သလားတော့ လက်ရှိချိန်မှာ အတည်ပြုလို့မရသေးဘူး”လို့ ဒေသတွင်း မြေအောက်အဖွဲ့ရဲ့ ခေါင်းဆောင်တစ်ဦးက ပြောပါတယ်။

3 months Ago

September 4, 2021

ပုလဲမြို့ ပြည်သူ့ကာကွယ်ရေးပြောက်ကျားအဖွဲ့နှင့် စစ်ကောင်စီတပ် တိုက်ပွဲဖြစ်

စစ်ကိုင်းတိုင်း ပုလဲမြို့နယ်၊ လဲကန်ကျေးရွာနဲ့ ဝက်ကျကျေးရွာကြားမှာ စက်တင်ဘာ ၃ ရက် ညနေ ၆ နာရီကျော်လောက်မှာ စစ်ကောင်စီတပ်နဲ့ ပုလဲပြည်သူ့ကာကွယ်ရေး ပြောက်ကျားအဖွဲ့တို့ တိုက်ပွဲ ပြင်းထန်ဖြစ်ပွားခဲ့ပြီး စစ်ကောင်စီဘက်က ၇ ယောက်ထက်မနည်း ကျဆုံးတယ်လို့ သိရပါတယ်။

ပုလဲပြည်သူ့ကာကွယ်ရေးပြောက်ကျားအဖွဲ့ ခေါင်းဆောင်တဦးက “တိုက်ပွဲဖြစ်တာက ဟုတ်တယ်ဗျ။ ဒီကောင်တွေ ကျေးရွာတွေကို စစ်ကြောင်း နှစ်ကြောင်း ထိုးတာ။ ပထမရှေ့ပြေးအဖွဲ့ကို ကျနော်တို့က မိုင်းခွဲတိုက်ခိုက်တာ ၇ ယောက်ထက်မနည်း ကျဆုံးလောက်တယ်။ အင်အား ၃၀ လောက် ရှိမယ်။ ကျေးရွာတွေက အပြစ်မဲ့ပြည်သူတွေရဲ့ တန်ကြေးရှိတဲ့ ဆိုင်ကယ်တွေယူပြီး ပုလဲ၊ ဂန့်ဂေါသွား ကားလမ်း ၅၅ မိုင်ဂိတ်ကို ပြန်တာ။ တဖွဲ့က ဝက်ကျ ဆေးရုံမှာ တပ်စွဲ နောက်ချန်နေခဲ့တာလည်း ရှိသေးတယ်။ ဒီတိုက်ပွဲမှာက ကျနော်တို့ PDF ဘက်က အကျအဆုံး မရှိခဲ့ဘူး။ ကျနော်တို့ဘက်က ပြောက်ကျားတိုက်ခိုက်တာ” လို့ ပြောပါတယ်။

ပုလဲမြို့နယ်မှာ စစ်ကောင်စီတပ်တွေက  နေ့စဉ်နေ့တိုင်း ဝင်ရောက်ရှာဖွေမှုတွေ ပြုလုပ်ကာ အပြစ်မဲ့ ပြည်သူတွေကို ဖမ်းဆီးသတ်ဖြတ်ပြီး တန်ကြေးရှိတဲ့ လက်ဝတ်ရတနာနဲ့ ငွေကြေးတွေအပြင် တန်ကြေးရှိ ဆိုင်ကယ်တွေကိုပါ ယူဆောင်သွားကြပါတယ်။ 

စက်တင်ဘာ ၃ ရက်‌က စစ်ဘက်သုံး ဂျက်လေယာဉ်တွေ အသုံးပြုပြီး ကင်းလှည့်တာတွေ ရှိတယ်လို့ ဒေသခံတွေဆီကနေ သိရပါတယ်။

ပုလဲမြို့နယ် တိုက်ပွဲအခြေအနေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

5 months Ago
More News
Up