ပုလဲ-ဂန့်ဂေါ ကားလမ်း

November 14, 2021

နဘားမီးရထားရဲစခန်း စီးနင်းခံရ၊ ပုလဲ-ဂန့်ဂေါလမ်းတွင် PRA နှင့် စစ်ကောင်စီတပ် တိုက်ပွဲဖြစ်

စစ်ကိုင်းတိုင်း အင်းတော်မြို့နယ် နဘားမီးရထားရဲစခန်း စီးနင်းခံရပြီး ပုလဲ-ဂန့်ဂေါသွား ကားလမ်းမကြီးအပေါ်မှာလည်း စစ်ကောင်စီတပ်နဲ့ ပြည်သူ့တော်လှန်ရေးတပ်မတော် (PRA) တို့ တိုက်ပွဲဖြစ်ပွားခဲ့တယ်လို့ သိရပါတယ်။

အင်းတော်မြို့နယ်၊ နဘားကျေးရွာမှာရှိတဲ့ နဘားမီးရထားရဲစခန်းကို နိုဝင်ဘာ ၁၃ ရက် ညနေ ၅ နာရီဝန်းကျင်က စီးနင်းခံလိုက်ရတယ်လို့ အဆိုပါရဲစခန်းနဲ့နီးစပ်တဲ့ အသိုင်းအဝိုင်းဆီက သိရပါတယ်။

နဘားမီးရထားရဲစခန်းကို ဒေသခံပြည်သူ့ကာကွယ်ရေး အထူးပြောက်ကျားတပ်ဖွဲ့က ဝင်ရောက်စီးနင်းခဲ့တာ ဖြစ်ပြီး ၁၂ ဗို့ သေနတ် ၁ လက်၊ ၁၂ ဗို့ ကျည်ဆန်အတောင့် ၃၀၊ ခြောက်လုံးပြူးကျည် ၁၀ တောင့်၊ G2 ကျည် ၂ ကတ်၊ ကလေးကျည် ၅ တောင့်၊ ကျည်သေတ္တာ ၁ လုံးနဲ့ လက်တော့ကွန်ပျူတာ ၁ လုံးတို့ သိမ်းဆည်းခဲ့တယ်လို့ INDAW REVOLUTION - IR အဖွဲ့ရဲ့  ပြန်ကြားရေးတာဝန်ခံက အတည်ပြုပြောပါတယ်။

“အထူးပြောက်ကျားအဖွဲ့က တိုက်ခိုက်မှုကို လက်တွေ့လေ့ကျင့်တဲ့အနေနဲ့ အင်းတော်၊ နဘားမီးရထား ရဲတပ်ဖွဲ့ရုံးကို လျှပ်တပြက်ဝင်ရောက်စီးနင်းခဲ့ပြီး စစ်ကျွန်တွေကို နှိမ်နင်းခဲ့တာ မရှိဘဲ ဓမ္မနည်းနဲ့ ပစ္စည်းတွေကို ယူခဲ့တာဖြစ်ပါတယ်။” 

ညနေ ၆ နာရီဝန်းကျင်မှာတော့ အင်းတော်မြို့ကနေ အကြမ်းဖက်စစ်တပ် လက်အောက်ခံ တပ်သားတွေ ရောက်ရှိလာပြီး သေနတ်တွေ ပစ်ဖောက်ကာ စစ်ဆေးမှုတွေ ပြုလုပ်နေတယ်လို့ ဒေသခံတွေဆီက သိရပါတယ်။

နဘားမီးရထားရဲစခန်း စီးနင်းခံရမှုနဲ့ပတ်သက်ပြီး အသေးစိတ်သိရှိနိုင်ဖို့ အင်းတော်မြို့နယ်၊ မြို့မရဲစခန်းကို ဆက်သွယ်မေးမြန်းခဲ့ရာ “အဲဒီကိစ္စ ပြောလို့မရပါဘူး” လို့ တာဝန်ကျရဲက ဖြေပါတယ်။

ပုလဲ-ဂန့်ဂေါသွား ကားလမ်းမကြီးအပေါ်မှာလည်း ပြည်သူ့တော်လှန်ရေးတပ်မတော် (PRA) နဲ့ စစ်ကောင်စီတပ်တို့ နိုဝင်ဘာ ၁၃ ရက် နေ့လယ် ၁ နာရီခွဲအချိန်လောက် တိုက်ပွဲဖြစ်ပွားခဲ့တယ်လို့ သိရပါတယ်။

PRA တပ်ရင်း-၂ နဲ့ ပုလဲမြို့က မဟာမိတ် Pale PDF-Headquarters ပူးပေါင်းတပ်နဲ့ စစ်ကောင်စီတပ်တို့ တိုက်ပွဲဖြစ်ခဲ့တာလို့ ပြည်သူ့တော်လှန်ရေး PRA ခေါင်းဆောင် ဗိုလ်ဂျပန်ကြီးက ပြောပါတယ်။

“မျက်နှာချင်းဆိုင် သူပစ်၊ ကိုယ်ပစ် တိုက်ခဲ့တာ။ တိုက်ပွဲအချိန်က မိနစ် ၄၀ လောက် ကြာမယ်ဗျ။ ကျနော်တို့က နယ်မြေကျွမ်းကျင်မှု အသာစီးနဲ့တိုက်တာဆိုတော့ အထိအခိုက် အကျအဆုံး မရှိခဲ့ဘူး။ စစ်ကောင်စီဘက်ကတော့ ၂၁ ယောက်ထက်မနည်း သေသလို အထိအခိုက်လည်း များတယ်” လို့ ပြောပါတယ်။

PRA အဖွဲ့ဟာ ပြီးခဲ့တဲ့ နိုဝင်ဘာ ၆ ရက်‌ကလည်း မကွေးတိုင်း၊ ကျောမြို့နယ်အတွင်းရှိ (ကပစ) လက်နက်ထုတ်စက်ရုံမှာ တာဝန်ထမ်းဆောင်နေတဲ့ ဗိုလ်မှူးအဆင့်ရှိသူ ၁ ဦးနဲ့ တပ်သား ၁ ကို နေ့လယ် ၁ နာရီအချိန်လောက် ပုလဲ-ဂန့်ဂေါသွား ကားလမ်းမ တနေရာက ဖမ်းဆီးခေါ်ဆောင်ခဲ့တယ်လို့ ထုတ်ပြန်ထားပါတယ်။

2 weeks Ago

September 4, 2021

ပုလဲ-ဂန့်ဂေါ ကားလမ်းဘေး ၅၅ မိုင်အနီးက ကျေးရွာအတွင်း စစ်တပ်က ဝင်ရောက်မီးရှို့

အကြမ်းဖက်စစ်ကောင်စီတပ်တွေက ပုလဲ-ဂန့်ဂေါ-ကလေး လမ်းမကြီးဘေးက မိုင်တိုင် ၅၅ မိုင်အနီး ကျေးရွာအတွင်း စက်တင်ဘာ ၄ ရက်နေ့မနက် ၁၀ နာရီခွဲကျော်လောက်က မီးရှို့တာတွေ ပြုလုပ်နေတယ်လို့ ဒေသခံတွေက ပြောပါတယ်။

၅၅ မိုင်အနီးကျေးရွာနေ အမျိုးသမီးတစ်ဦးက “ကျမတို့ ကျေးရွာအတွင်းကို စစ်ကောင်စီတပ်တွေက သေနတ်ပစ်ဝင်လာကြတယ်။ ကျမတို့လည်းကြောက်လို့ ရွာလုံကျွတ်နီးပါး ထွက်ပြေးကြရတယ်။ သူတို့လည်း ဝင်လာပြီး မကြာဘူး၊ ရွာအတွင်းက မီးခိုးလုံးတွေ တက်လာတာ တွေ့ရတယ်။ ဘာတွေကို မီးနဲ့ရှို့တာလဲဆိုတာကိုတော့ အတည်ပြုလို့ မရသေးဘူးဗျ။ ဘာလိုလဲဆိုတော့ ရွာကလူတွေ အကုန်လုံးက ဘေးလွတ်ရာကို ထွက်ပြေးနေရလို့ပေါ့။ အခုလိုမြင်ရတာလည်း ကျမတို့‌ ဘေးလွတ်ရာ ကုန်းအမြင့်ပေါ်ကနေ လှမ်းမြင်နေရလို့ အခုလို သိရတာ” လို့ ပြောပါတယ်။

စစ်ကောင်စီတပ်နဲ့ ပုလဲမြို့နယ်ပြည်သူကာကွယ်ရေ ပြောက်ကျားအဖွဲ့တို့ အခုလက်ရှိအချိန်အထိ နှစ်ဖက်တင်းမာနေကြကာ ကလေးမြို့၊ ဂန်ဂေါမြို့က စစ်ကောင်စီတပ်တွေ စစ်ကူလာရောက်နေကာ မုံရွာ နမခဘက်ကလည်း စစ်ကူတွေ အလုံးအရင်းနဲ့ သွား‌နေတာတွေ ရှိနေတယ်လို့ ပုလဲဒေသခံတွေဆီက သိရပါတယ်။

၅၅ မိုင်အနီးကျေးရွာဟာ အိမ်ခြေ ၆၀ ကျော်နဲ့ လူဦးရေ ၃၀၀ နီးပါးနေထိုင်တဲ့ ပုံတောင် တောင်ပေါ်ဒေသရွာ ဖြစ်ပါတယ်။

3 months Ago
Up