ပုလဲမြို့နယ်

August 4, 2022

ပုလဲမြို့နယ်တွင် ပြည်သူ့နေအိမ်များကို စစ်ကောင်စီတပ်က မီးရှို့ဖျက်ဆီး

စစ်ကိုင်းတိုင်း၊ ပုလဲမြို့နယ်၊ သာယာကုန်းကျေးရွာရှိ ပြည်သူတွေရဲ့ နေအိမ်တွေကို သြဂုတ် ၄ ရက် မနက် ၈ နာရီလောက်မှာ စစ်ကောင်စီတပ်ဖွဲ့တွေက မီးရှို့ဖျက်ဆီးခဲ့ကြတယ်လို့ ဒေသခံတွေက ပြောပါတယ်။

အခုလို မီးရှို့ဖျက်ဆီးတာတွေ လုပ်ဆောင်တဲ့အဖွဲ့ဟာ အင်မထီးကျေးရွာအတွင်းမှာ တပ်စွဲနေထိုင်တဲ့ ပျူစောထီးအဖွဲ့နဲ့ စစ်ကောင်စီတပ်ဖွဲ့တို့ ပူးပေါင်းလုပ်ဆောင်ခဲ့တာဖြစ်တယ်လို့ ဆိုပါတယ်။

ဒေသခံတဦးက “အဲဒီစစ်ကောင်စီတပ်ဖွဲ့တွေဟာ ဒီနေ့မနက်ပိုင်းက အင်မထီး ကျေးရွာအတွင်းကနေ သာကုန်းကျေးရွာဘက်ကို ဦးတည်လာကာ မနက် ၇ နာရီလောက်မှာတော့ သာယာကုန်းကျေးရွာရဲ့ မြောက်ဘက် လမ်းခုလပ်တနေရာအရောက်မှာ PDF အဖွဲ့တွေက မိုင်းဆွဲတိုက်ခိုက်တာ” လို့ ပြောပါတယ်။ 

မိုင်းဆွဲတိုက်ခိုက်မှုကြောင့် စစ်ကောင်စီတပ်သား ၁၀ ယောက်လောက် ထိခိုက်ကျဆုံးမှုရှိတယ်လို့ခန့်မှန်း ပေမဲ့ အတိအကျတော့ မသိရသေးပါဘူး။

မိုင်းဆွဲတိုက်ခိုက်ခံရပြီးနောက်ပိုင်း သာယာကုန်းကျေးရွာအတွင်းကို စစ်ကောင်စီတပ်ဖွဲ့တွေ ဝင်ရောက်ကာ ပြည်သူတွေရဲ့နေအိမ်တွေကို မီးရှို့ခဲ့ကြတာလို့ ဒေသခံက ပြောပါတယ်။

လက်ရှိအချိန်ထိ ဒေသခံပြည်သူတွေဟာ ထွက်ပြေးနေကြရပြီး မီးလောင်ဆုံးရှုံးမှု အရေအတွက် အတိအကျ မသိရသေးသလို အနီးနားမှာရှိတဲ့ ကျေးရွာ ၆ ရွာလောက်က ပြည်သူတွေလည်း ထွက်ပြေးနေကြရတယ်လို့ ဆိုပါတယ်။

1 week Ago

June 16, 2022

ပုလဲမြို့နယ်တွင် စစ်ကောင်စီတပ်နှင့် PDF တိုက်ပွဲဖြစ်

စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းကျေးရွာမှာ တပ်စွဲပြီး ဒေသခံရွာသားတွေကို စစ်သင်တန်းပေးနေတဲ့ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တွေ ဇွန် ၁၆ ရက် မနက်  ၁၁ နာရီကစတင်ပြီး နေ့လယ် ၁၂ ခွဲအထိ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

တိုက်ပွဲဖြစ်ပွားတဲ့ ကျေးရွာအနီးက လက်ပကန်ရွာသားတဦးက “အစပိုင်းကတော့ မိုးခြိမ်းတာလားလို့ ထင်နေတာ။ ပစ်တဲ့အသံက တချက်ချင်းပစ်နေကြတာ။ နောက်ပိုင်းတော့ လက်နက်ကြီးသံတွေရော၊ လက်နက်ငယ်အသံတွေရော ဆူညံနေအောင်ကို ကြားရတယ်” လို့ ပြောပါတယ်။

ဇီးဖြူကုန်းကျေးရွာက စစ်ကောင်စီတပ်နဲ့ ပျူစောထီးတွေဟာ ပြီးခဲ့တဲ့ ဇွန် ၁၃ ရက်ကလည်း လက်ပကန်ရွာဘက်ကို စစ်ကြောင်းထိုးကာ အပစ်မဲ့ အသက် ၆၀ ကျော် အမျိုးသမီးတဦး၊ အသက် ၇၀ ကျော် အမျိုးသားနှစ်ဦးကို ရက်ရက်စက်စက် သတ်ဖြတ်ခဲ့ကြတယ်လို့ ဒေသခံရွာသားတွေက ပြောပါတယ်။

ဒေသခံ ပြည်သူ့ကာကွယ်ရေးအဖွဲ့ခေါင်းဆောင် ဗိုလ်နေက “ဒီနေ့တိုက်ပွဲကတော့ ၆၀ မမ ၁၅ လုံးနဲ့ ကျနော်တို့ တိုက်ပွဲအစပိုင်းမှာ ဖြစ်ပါတယ်။ နောက်ပိုင်း လက်နက်ငယ်တွေပါ အသုံးပြုပြီး သူပစ် ကိုယ်ပစ် တိုက်ပွဲဖြစ်ခဲ့တယ်။ အထိအခိုက် အကျအဆုံးကတော့ အတိအကျ မပြောနိုင်သေးဘူး။ ကျနော်တို့ဘက်ကတော့ လုံးဝ အထိအခိုက်မရှိခဲ့ဘူး။ အခုလို ဒီစ(--)တွေကို ဘာကြောင့်တိုက်ရတာလဲဆိုတော့ သူတို့က ရိက္ခာပြတ်ရင်လည်း အနီးပတ်ဝန်းကျင်က ရွာ‌တွေလာပြီး အနိုင်ကျင့် ပစ္စည်းလုယူတာတွေနဲ့ ဒေသခံတွေကို သတ်ဖြတ်တာတွေ ပြုလုပ်လို့”လို့ ပြောပါတယ်။

အခုတိုက်ပွဲမှာ ပုလဲမြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ ၂ Aung San Force၊ Royal Eagle၊ ပုံတောင်တိုက်ဂါးအဖွဲ့တို့ ပူးပေါင်းတိုက်ခိုက်ခဲ့တာဖြစ်တယ်လို့ ဒေသခံ တော်လှန်ရေးအင်အားစု ခေါင်းဆောင်တွေရဲ့ ပြောပြချက်အရ သိရပါတယ်။

2 months Ago
More News
Up