ဧရာဝတီတိုင်း၊ အင်္ဂပူမြို့နယ်မှာ ဆန္ဒပြလို့ ဖမ်းဆီးခံရသူ ၁၈ ဦးကို အင်္ဂပူမြို့နယ် စခန်းမှူးက တရားလိုပြုပြီး ပုဒ်မ ၅၀၅ (က) နဲ့ အမှုဖွင့်ပြီး အင်္ဂပူမြို့နယ်တရားရုံးမှာ ချုပ်ရမန်ယူထားပါတယ်။
အင်္ဂပူမြို့နယ်တွင်းက စုပေါင်းသပိတ်စစ်ကြောင်းကို ဖေဖေါ်ဝါရီ ၂၈ ရက်ကရဲတပ်ဖွဲ့နဲ့ စစ်တပ်က လူစုခွဲပြီး ဆန္ဒပြရာမှာ ပါဝင်ခဲ့တဲ့ ပြည်သူတွေကိုဖမ်းဆီးခဲ့ရာ စုစုပေါင်း ၁၉ ဦးဖမ်းဆီးခံရတာပါ။
အဆိုပါ ဖမ်းဆီးခံ ၁၉ ဦးထဲက လူငယ်တစ်ဦးကိုတော့ အသက်မပြည့်လို အာမခံနဲ့ ပြန်လွှတ်ပေးလိုက်ပါတယ်။
မန္တလေးတိုင်း မိုးကုတ်မြို့နယ်က သပိတ်ခေါင်းဆောင်တစ်ဦးဖြစ်တဲ့ အမျိုးသားစာပေဆုရ စာရေးဆရာ ဦးထက်နိုင် (တလုတ်)ကို ပုဒ်မ ၅၀၅ (က) နဲ့ တရားစွဲဆိုထားတယ်လို့ သပိတ်ကော်မတီကနေ သိရပါတယ်။
မိုးကုတ်မြို့မှာ ဖေဖော်ဝါရီ ၈ ရက်နေ့ကစပြီး စစ်အာဏာရှင်စနစ်ကို ဆန့်ကျင်ကြောင်း ပြည်သူ ထောင်သောင်းချီ နေ့စဥ် ဆန္ဒထုတ်ဖော်နေကြတာပါ။
သပိတ်စစ်ကြောင်းကို ဦးဆောင်တဲ့ သပိတ်ခေါင်းဆောင်တွေကို ပုဒ်မ ၅၀၅ (က) နဲ့ တရားစွဲဆိုထားတယ်လို့ သိရပါတယ်။
မိုးကုတ်မြို့က ရေပူဆရာတော်၊ ဦးစိုးဌေးနဲ့ စာရေးဆရာ ဦးထက်နိုင်တို့ကို ရဲတပ်ဖွဲ့က နေအိမ်တွေမှာ လိုက်လံရှာဖွေနေကြတာကြောင့် တိမ်းရှောင်နေကြတယ်လို့ သိရပါတယ်။
သတင်း - ဟန်နာထက်အောင်
ဧရာဝတီတိုင်းမှာ တရားစွဲဆိုခံရပြီး ပထမဆုံးအကြိမ် ရုံးထုတ်စစ်ဆေးခံခဲ့ရတဲ့ ဒေါင်းတို့မျိုးဆက် သံချပ်အဖွဲ့ကို ဖျာပုံနဲ့ ဒေးဒရဲမြို့နယ်တို့မှာ ပုဒ်မ ၅၀၅ (က)နဲ့ အမှုဖွင့်ထားပြီး ပုသိမ်မြို့မှာ ဆက်သွယ်ရေးဥပဒေပုဒ်မ ၆၆ (ဃ)နဲ့ အမှုဖွင့်ထားခံရကာ ဇွန်လအတွင်း ရုံးထုတ် စစ်ဆေးတာတွေ ပြုလုပ်သွားမှာ ဖြစ်ပါတယ်။
ဒေါင်းတို့မျိုးဆက်သံချပ်အဖွဲ့ဟာ ၂၀၁၉ ခုနှစ် သင်္ကြန်ကာလအတွင်း ရန်ကုန်တိုင်းနဲ့ ဧရာဝတီတိုင်းအတွင်းက မြို့နယ်တွေမှာ သံချပ်တွေလှည့်လည်ဖျော်ဖြေခဲ့တာနဲ့ပတ်သက်ပြီး နိုင်ငံတော် အကြည်ညိုပျက်စေမှုအပါအဝင် ဆက်သွယ်ရေးဥပဒေတွေနဲ့ တရားစွဲခံထားရတာပါ။ 
