ပုဏ္ဏားကျွန်းတွင် လေဆင်နှာမောင်းနှင့်အတူ အမျိုးသမီး ၂ ဦး လွင့်ပါ သေဆုံး

June 12, 2017

ပုဏ္ဏားကျွန်းတွင် လေဆင်နှာမောင်းနှင့်အတူ အမျိုးသမီး ၂ ဦး လွင့်ပါ သေဆုံး

ရခိုင်ပြည်နယ်၊ ပုဏ္ဏားကျွန်းမြို့နယ်၊ ယိုးတရုတ်ကျေးရွာမှာ လေဆင်နှာမောင်း တိုက်ခတ်လို့ အမျိုးသမီး ၂ ဦး သေဆုံးသွားပြီး လူ ၄ ဦး ပြင်းထန်ဒဏ်ရာရှိကာ နေအိမ် ၃၄ လုံး ပျက်စီးဆုံးရှုံးသွားပါတယ်။ ဇွန် ၁၂ ရက်နေ့ မနက် ၃ နာရီဝန်းကျင်က ယိုးတရုတ်ကျေးရွာ အရှေ့စုရပ်ကွက်မှာ လေဆင်နှာမောင်း တိုက်ခတ်တာကြောင့် နေအိမ်တွေ ကျွတ်ထွက်ပြီး နေအိမ်မှာ အိပ်နေတဲ့ အမျိုးသမီး ၃ ဦး လေဆင်နှာမောင်းနဲ့ ပါသွားတာပါ။ ယိုးတရုတ်အုပ်ချုပ်ရေးမှူး ဦးဝင်းမောင်က “ဒီကနေ့ မနက် ၃ နာရီအချိန်လောက် လေဆင်နှာမောင်းတိုက်တာ။ အိမ်တွေက ရွာရဲ့အပြင်ကို လွင့်ထွက်သွားတယ်။ အိမ်ကို လေဆင်နှာမောင်းက ဆွဲခေါ်သွားတာ အိမ်နဲ့ ကိုတ် ၂၀၀ လောက်အဝေးကို လွင့်ထွက်သွားတယ်။ အိမ်မှာ သားအမိ ၃ ယောက်အိပ်နေတာပါ။ ၃ ယောက်လုံး လွှင့်ထွက်သွားတယ်။ အဲ့ဒီမှာအိပ်နေတဲ့ အမျိုးသမီး ၂ ဦး လေဆင်နှာမောင်းနဲ့ ပါသွားတာ။ အမျိုးသမီး ၂ ဦးလုံး ဆုံးသွားပါတယ်။ ကလေးကတော့ အိမ်နဲ့ ဂိုက် ၂၀၀ လောက်အကွာမှာ လွင့်ထွက်သွားတယ်။ ကလေးကတော့ ဒဏ်ရာအနည်းငယ်ရသွားပါတယ်။ စုစုပေါင်းနေအိမ်တွေကတော့ ၃၄ အိမ်ပျက်စီးသွားပါတယ်။ စုစုပေါင်းလူက ၄ ဦး ဒဏ်ရာရပါတယ်” လို့ ပြောပါတယ်။ လေဆင်နှာမောင်း တိုက်ပြီး သေဆုံးသွားသူ ၂ ဦးကတော့ ဒေါ်ရွှေမဖြူ အသက် ၈၂ နှစ်နဲ့ မခင်ချေအသက် ၂၉ နှစ် ယိးတရုတ်ကျေးရွာအရှေ့စုရပ်ကွက်ကဖြစ်ပြီး၊ မခင်ချေရဲ့ သမီးဖြစ်သူ ခိုင်ငြိမ်းဦး အသက် ၂ နှစ်ကတော့ ဦးခေါင်းအနည်းငယ်ဒဏ်ရာရှိသွားတယ်လို့ အုပ်ချုပ်မှူးက ဆိုပါတယ်။ ယိုးတရုတ်ကျေးရွာမှာ လေဆင်နှာမောင်း တိုက်ခတ်လို့ ပြင်းထန်ဒဏ်ရာရှိတဲ့ ၄ ဦးလည်း ယိုးတရုတ်တိုက်နယ်ဆေးရုံမှာ အတွင်းလူနာအဖြစ် ဆေးကုသမှုခံယူနေတယ်လို့ အုပ်ချုပ်ရေးမှူး ဦးဝင်းမောင်က ဆက်လက်ပြောပါတယ်။ “လေဆင်နှာမောင်းက အရမ်းပြင်းထန်တယ်။ အချိန်အနည်းငယ်သာ တိုက်ခတ်သွားတာ။ လေဆင်နှာမောင်းကြောင့် ပါသွားတဲ့ နေအိမ်တွေစာရင်းကို ပုဏ္ဏားကျွန်းအုပ်ချုပ်ရေးမှူးဆီ ပို့ထားပါတယ်။ သူကိုယ်တိုင်လည်း ရောက်ရှိလာပါတယ်။ ဒဏ်ရာရှိသွားတဲ့ လူတွေကို အတွင်းလူနာအဖြစ် ဆေးကုသထားပါတယ်။ သေဆုံးသွားတဲ့ လူ ၂ ဦးကို ကျနော်တို့ သင်္ဂြိုဟ်ဖို့ လုပ်နေပါတယ်။” သတင်း-ဝဏ္ဏခွာညို- ဓာတ်ပုံ သန်းဝင်း  
4 years Ago
Up