ပီလီ

September 18, 2021

ဂန္ထဝင်ဘောလုံးအကျော်အမော် ပီလီ ကျန်းမာရေး ပြန်ကောင်း

ဂန္ထဝင် ဘရာဇီးဘောလုံးအကျော်အမော် အသက် ၈၀ အရွယ် ပီလီရဲ့ ကျန်းမာရေး အခြေအနေ ပြန်လည်ကောင်းမွန်လာတယ်လို့ ဆာပေါ်လိုမြို့မှာရှိတဲ့ အဲလဘတ်အိုင်းစတိုင်း ဆေးရုံက သတင်းထုတ်ပြန်ပါတယ်။ 

ပီလီဟာ အသက်ရှူ မူမမှန်ဖြစ်ပြီး စိုးရိမ်ရတဲ့ အခြေအနေကြောင့် သောကြာနေ့ မနက်ပိုင်းက ဆေးရုံကို အရေးပေါ် တင်ထားရတာပါ။ 

ပီလီဟာ ဒီတပတ်အစောပိုင်းလေးကပဲ အူမကြီးအကျိတ်ကို ခွဲစိတ်မှုခံယူခဲ့ရပြီး အသက်ရှူတာ ပုံမှန်မဟုတ်လို့ ဆေးရုံတင်လိုက်ရတဲ့အတွက် သတင်းတွေမှာ စိုးရိမ်ရကြောင်း ရေးသားကြပါတယ်။ 

ဆေးရုံရဲ့ တရားဝင် ထုတ်ပြန်ချက်မှာတော့ ပီလီဟာ အသက်ရှူ ပုံမှန်မဖြစ်တဲ့ ဝေဒနာ ခဏတာကြုံခဲ့ရပြီး အိုင်စီယူ-အထူးကုသဆောင် ကုသမှုခံယူခဲ့ရာက တဖြည်းဖြည်း သက်သာလာပြီး အခုတော့ တည်ငြိမ်တဲ့ အနေအထား ရှိနေတယ်လို့ ဆိုပါတယ်။ 

ပီလီရဲ့ သမီးဖြစ်သူ ကိုင်လီ နက်စီမန်တိုက ပြည်သူချစ်တဲ့ သူမ ဖခင် ဘောလုံးသမားကြီးရဲ့  ကျန်းမာရေး ပြန်ကောင်းလာမှာ သေချာတယ်လို့ အင်စတာဂရမ်မှာ ရေးသားထားပါတယ်။

 သမိုင်းတလျှောက် အကောင်းဆုံး ဘောလုံးသမားအဖြစ် သတ်မှတ်ကြတဲ့ ပီလီဟာ ဒီနှစ်တွေအတွင်း အကူအညီမပါဘဲ လမ်းမလျှောက်နိုင်တဲ့အထိ ကျန်းမာရေး ဆိုးလာပြီး ကိုဗစ်-၁၉ ကပ်ဘေး မတိုင်ခင်ကတည်းက လူမြင်ကွင်းကနေ ပျောက်ကွယ်နေတာ ဖြစ်ပါတယ်။ 

2 months Ago

December 15, 2020

ဘလွန်းဒီအော ကမ္ဘာ့အကောင်းဆုံးအသင်းတွင် ပီလီ၊ မာရာဒိုနာနှင့်အတူ မက်ဆီနှင့် ရော်နယ်ဒို ပါဝင်

ပြင်သစ်ဘောလုံးမဂ္ဂဇင်းက ထုတ်ပြန်လိုက်တဲ့ ဘလွန်းဒီအောအိပ်မက်အသင်း Ballon d’Or Dream Team မှာ ပီလီနဲ့ မာရာဒိုနာတို့နဲ့အတူ ရော်နယ်ဒိုနဲ့ မက်ဆီတို့လည်း ရွေးချယ်ခံခဲ့ရပါတယ်။  အခုနှစ်မှာ ဘလွန်းဒီအောဆု ချီးမြင့်မယ့် အစီအစဉ် ဖျက်သိမ်းခဲ့ပေမယ့် ဘလွန်းဒီအော အိပ်မက်အသင်းကိုတော့ ရွေးချယ်ခဲ့တာပါ။ ဘလွန်းဒီအော အိပ်မက်အသင်းကို ကမ္ဘာတဝန်းက ဂျာနယ်လစ် ၁၇၀ ရဲ့ မဲပေးမှုနဲ့ ရွေးချယ်ခဲ့တာပါ။  ဂိုးသမားနေရာမှာ ရုရှားဂန္ထဝင်ဂိုးသမားကြီး ရာရှင်ကို ရွေးချယ်ခဲ့ပြီး သူက ၁၉၆၃ ခုနှစ်မှာ ဘလွန်းဒီအောဆု ရရှိခဲ့ဖူးပါတယ်။  ခံစစ် သုံးဦးနေရာမှာ  ကာဖူး၊ ဘက်ကင်ဘောင်ဝါနဲ့ မာဒီနီတို့ ရွေးချယ်ခံခဲ့ရပါတယ်။ ဂျာမနီ ဂန္ထဝင် ဘင်ကင်ဘောင်ဝါက ဘလွန်းဒီအော ၂ ကြိမ် ရယူခဲ့ဖူးပြီး  ဘလွန်းဒီအော ရယူဖူးတဲ့ တစ်ဦးတည်းသော နောက်ခံလူအဖြစ် လက်ရှိအချိန်အထိ မှတ်တမ်းတင်ထားဆဲ ဖြစ်ပါတယ်။  ကွင်းလယ်မှာတော့ လိုသာမားသီးယက်စ်၊ ဇာဗီ၊ ပီလီနဲ့ မာရာဒိုနာတို့ကို ရွေးချယ်ခဲ့ပါတယ်။ တိုက်စစ် သုံးဦးနေရာမှာ ဘရာဇီးတိုက်စစ်မှူးဟောင်း ရော်နယ်ဒို၊ ပေါ်တူဂီအသင်း ခေါင်းဆောင် စီရော်နယ်ဒိုနဲ့ အာဂျင်တီးနားအသင်းခေါင်းဆောင် မက်ဆီတို့ ရွေးချယ်ခံခဲ့ရပါတယ်။
12 months Ago
More News
Up