ပိုးတွေ့လူနာ

July 9, 2021

မူဆယ်မြို့မ ရဲစခန်း၌ အချုပ်သား ၁၁ ဦး ကိုဗစ် ပိုးတွေ့၊ ၁ ဦး သေဆုံး

မြန်မာ - တရုတ်နယ်စပ် မူဆယ်မြို့မ ရဲစခန်းက  အချုပ်သား ၁၁ ဦးဆီမှာ  ဇူလိုင်လ ၉ ရက်မနက်က ကိုဗစ် - ၁၉ ရောဂါပိုး စစ်ဆေးတွေ့ရှိတယ်လို့ မူဆယ် ကိုဗစ် - ၁၉ ရောဂါ ကာကွယ် ထိန်းချုပ်ကုသရေး ကော်မတီဝင်က ပြောပါတယ်။

အချုပ်ကျနေတဲ့ အမျိုးသမီး ၁၀ ဦး၊ အမျိုးသား ၁ ဦး စုစုပေါင်း ၁၁ ဦးမှာ ပိုးတွေ့ခဲ့တာဖြစ်ပြီး ဒီမနက် ၂ နာရီလောက်က  မူဆယ်ခရိုင် ပြည်သူ့ဆေးရုံသစ်ကြီးမှာ ကိုဗစ်-၁၉ ရောဂါ ကုသမှုခံယူနေသူ အသက် ၅၅ နှစ်အရွယ်ရှိ အမျိုးသမီးကြီး တစ်ဦး သေဆုံးသွားတယ်လို့ သူက ပြောပါတယ်။

ပိုးတွေ့သူတွေကတော့ မူဆယ်မြို့တွင်းထဲက အပါအဝင် မူဆယ် ၁၀၅ မိုင်၊ နမ့်ခမ်း၊ ရန်ကုန်မြို့၊ ရန်ကုန်တိုင်း သုံးခွမြို့နယ်နဲ့ မကွေးတိုင်း အထက်မင်းလှတို့က ဖြစ်ပြီး ဆေးမှု၊ လူကုန်ကူးမှုနဲ့ ရာဇသတ်ကြီးမှုတွေ ဖြစ်ကြပါတယ်။

မူဆယ် ၁၀၅ မိုင် ကုန်သွယ်ရေးဇုန်က ပိုးတွေ့လူနာ ၁၀ ယောက် ကျော် အပါအဝင် မူဆယ်မှာ ဇူလိုင်လ ၈ ရက်နေ့က ပိုးတွေ့လူနာ ၆၁ ဦး ထပ်တိုးပြီး မန္တလေး - မူဆယ် တွဲကား ယာဉ်မောင်း အပါအဝင် စည်ပင်ဝန်ထမ်း၊ ဘဏ်ဝန်ထမ်းတွေနဲ့ပြည်တွင်းခွန် ဝန်းထမ်းအိမ်ရာ ကလည်း ပါပါတယ်။

မူဆယ်မှာ ပိုးတွေ့ များလာတာကြောင့် မူဆယ်ပြည်သူ့ဆေးရုံနဲ့ မူဆယ်ခရိုင် ပြည်သူ့ဆေးရုံသစ်ကြီးတွေမှ လူနာပြည့်နေကာ တရုတ်ကျောင်း ကွာရန်တင်း စင်တာမှာပါ ထားရတယ်လို့ဆိုပါတယ်။

မူဆယ်ဈေးတွေကို ဇူလိုင် ၇ ရက်နေ့ကစ ယာယီပိတ်ထားလိုက်ပြီဖြစ်ပြီး တချို့ ရပ်ကွက်တွေ ကတော့ ကိုယ့် အစီအစဉ်နဲ့ကိုယ်  Lockdown ချထားပါတယ်။

လက်ရှိ မူဆယ်မှာ ပိုးတွေ့ လူနာ ၃၀၀ ကျော် ရှိပြီဖြစ်ပြီး ကိုဗစ် တတိယလှိုင်း ကာလမှာ ၃ ဦး သေဆုံးပြီ ဖြစ်ပါတယ်။ 

ရှမ်းပြည်နယ် မြောက်ပိုင်းမှာ ပိုးတွေ့ လူနာ ၃၀၀၀ ကျော် လာပြီဖြစ်ပြီး သေဆုံးသူ ၅၀ ကျော်အထိ ရှိလာပြီ ဖြစ်ပါတယ်။

Photo Crd# Muse COT

4 months Ago

June 28, 2021

စစ်ကိုင်းတိုင်းအတွင်း ကလေးနှင့်တမူးမြို့တို့ ပိုးတွေ့လူနာအများဆုံး ဖြစ်လာ

ကိုဗစ်တတိယလှိုင်းကာလ စစ်ကိုင်းတိုင်းအတွင်းရှိ ကလေးနဲ့ တမူးမြို့တွေဟာ  ပိုးတွေ့လူနာအများဆုံး မြို့တွေဖြစ်နေကြောင်း စစ်ကောင်စီလက်အောက်ခံ ကျန်းမာရေးနဲ့ အားကစားဝန်ကြီးဌာနရဲ့ စာရင်းတွေအရ သိရပါတယ်။ 

ဇွန်လ ၁ ရက်ကနေ ၂၆ ရက်အထိ စာရင်းတွေအရ ကလေးမြို့မှာ ၈၅၇ ယောက်၊ တမူးမြို့မှာ ၇၃၄ ယောက်ရှိနေပြီး တွန်းဇံမြို့က အယောက် ၄၇၀ နဲ့ တတိယအများဆုံးဖြစ်ပါတယ်။

မြန်မာနိုင်ငံမှာ ဇွန် ၁ ရက်မှ ၂၆ ရက်အတွင်း ပြည်တွင်း ကူးစက်လူနာ ၈၄၃၀ ယောက် ရှိပြီး ပြည်ပက  ဝင်လာသူတွေဆီမှာတော့ ပိုးတွေ့လူနာ ၂၉၆ ယောက်ရှိကာ  ပြည်ပပြန်တွေထဲက  ထိုင်းနိုင်ငံ နယ်စပ်က   ၁၀၅ ယောက်၊ မလေးရှားက အယောက် ၇၀၊ ဘင်္ဂလားဒေ့ရှ်က  ၆၅ ယောက်စီနဲ့ အများဆုံးဖြစ်ပါတယ်။

စစ်ကောင်စီရဲ့ တနေ့တာ အများဆုံး ဓာတ်ခွဲစစ်ဆေးနိုင်တဲ့ အရေအတွက်မှာ ငါးထောင်ကျော်လောက်ပဲရှိပြီး၊ ယခင်အာဏာမသိမ်းမီ ဇန်နဝါရီလက နှစ်သောင်းခွဲလောက်စစ်ဆေးနိုင်ခဲ့တာကြောင့် ဓာတ်ခွဲစစ်ဆေးနိုင်စွမ်းမှာ ငါးပုံတပုံလောက်သာရှိပါတယ်။ 

လက်ရှိတတိယလှိုင်းမှာပဲ  ကိုဗစ်-၁၉ မျိုးရိုးဗီဇ ပြောင်းလဲ တဲ့ပိုးတွေ့ရှိသူ ၁၁ ဦး တွေ့ရှိထားကြောင်းလည်း စစ်ကောင်စီလက်အောက်ခံ ကျန်းမာရေးနဲ့ အားကစားဝန်ကြီးဌာနက ကြေညာထားပါတယ်။

လက်ရှိမှာလည်း  ပိုးတွေ့များတဲ့  မြို့တွေကို စတေးဟုမ်း သတ်မှတ်ထားပြီး အခုနောက်ဆုံး ရှမ်းပြည်နယ်၊ လားရှိုးအပါအဝင် စတေးဟုမ်း မြို့နယ် (၁၀) မြို့နယ်ရှိပြီဖြစ်ပါတယ်။

4 months Ago
More News
Up