နိုင်ငံရပ်ခြားက ပြန်လာကြသူတွေ နေအိမ်မှာပဲ နေပြီး အသွားအလာ ကန့်သတ်တဲ့ စည်းကမ်းတွေကို လိုက်နာစေဖို့ ပိုလန်အစိုးရက နေအိမ်ခြေချုပ်ဆိုတဲ့ အပလီကေးရှင်းတခုကို စတင်လိုက်ပါတယ်။
အဲဒီအပလီကေးရှင်းက နေအိမ်ခြေချုပ်ခံရတဲ့ ပိုလန်ပြည်တော်ပြန်တွေဆီ စာတိုပေးပို့ပြီး သူတို့အနေနဲ့ မိနစ် ၂၀ အတွင်းမှာ ဓာတ်ပုံတပုံကို အွန်လိုင်းပေါ် တင်ရမှာပါ။
အပလီကေးရှင်းဟာ မျက်နှာဖတ်ဆော့ဖ်ဝဲလ်ကို သုံးပြီး အဲဒီဓာတ်ပုံ တည်နေရာကို ရှာကာ စည်းကမ်း လိုက်နာခြင်း ရှိ၊ မရှိ စစ်ဆေးသွားမှာပါ။
အဲဒီအပလီကေးရှင်းကို အသုံးပြုနေတဲ့ အပန်းဖြေခရီးထွက်ပြီး ပြန်လာသူ ပိုကိုရာက “အပလီကေးရှင်းဟာ အသုံးပြုသူနဲ့ အကျွမ်းတဝင် မဖြစ်တာ၊ အမှားအယွင်းများတာနဲ့ ကိုယ် လုပ်ဆောင်ထားတဲ့အရာတွေကို မှတ်သားမထားတာနဲ့ ညွှန်ကြားချက် တိတိကျကျမပေးဘဲ အသုံးပြုသူတွေကို လုပ်ဆောင်ခိုင်းတာတွေ ရှိတယ်” လို့ ပြောပါတယ်။
ထိုင်းနဲ့ ဗီယက်နမ်က နေပြန်လာတဲ့ မာစင်ဇီးနစ်ကလည်း အပလီကေးရှင်းကို မတ်လ ၂၀ ရက်က ထည့်သွင်းခဲ့ပမယ့် ၄ ရက် ကြာတဲ့အထိ အပလီကေးရှင်းထဲ ခဏခဏ ပြန်ဝင်နေရတယ်လို့ ဆိုပါတယ်။
မတ်လ ၁၅ ရက်နေ့ကစလို့ ပိုလန်အစိုးရဟာ နိုင်ငံထဲ နိုင်ငံခြားသား ဝင်ရောက်တာကို တားမြစ်ခဲ့ပြီး ပိုလန် ပြည်တော်ပြန်တွေကိုလည်း ၁၄ ရက်တာ အသွားအလာကန့်သတ်တာတွေ မဖြစ်မနေ လုပ်ဆောင်ဖို့ စည်းကမ်းထုတ်ပြန်ခဲ့ပါတယ်။
ပိုလန်နိုင်ငံမှာ ဒီနေ့မနက်ပိုင်းအထိ ကိုရိုနာဗိုင်းရပ်စ် ကူးစက်ခံရသူ ၁၃၈၉ ဦး၊ သေဆုံးသူ ၁၆ ဦးနဲ့ ရောဂါသက်သာပျောက်ကင်းသူ ၇ ဦးရှိတယ်လို့ သိရပါတယ်။
3 years Ago
